અમદાવાદ / નહેરુબ્રિજ પાસે થયેલી લૂંટનો ભેદ ઉકેલાયો, ફરિયાદી જ આરોપી નીકળ્યો, પોલીસે 51 લાખ રોકડ સહિત મુદ્દામાલ કબજે કર્યો

• નહેરુબ્રિજ પાસે થયેલી લૂંટનો ભેદ પોલીસે ઉકેલ્યો
• પોલીસે 51 લાખ રોકડ બાઈક અને રિક્ષા પણ કબજે કર્યા છે
• કમલેશ પ્રજાપતિએ જ પોતાની લૂંટનો પ્લાન બનાવ્યો હતો

અમદાવાદના નહેરુબ્રિજ પાસે થયેલી લૂંટનો ભેદ ઉકેલાયો છે. અમદાવાદ ક્રાઇમ બ્રાન્ચે લૂંટને અંજામ આપનારા પાંચ આરોપીઓની ધરપકડ કરી છે. ખુદ ફરિયાદી જ આરોપી નીકળ્યો છે, જેણે આ ઘટનાને અંજામ આપવા કાવતરું ઘડ્યું હતું. પોલીસે લૂટાયેલા 50 લાખથી વધુની રકમ પણ કબજે કરી છે.  ગઈકાલે નહેરુબ્રિજ પાસે ડી. નરેશ આંગડિયાનાં કર્મચારી બાઈક પર 50 લાખની રોકડ લઇને જઈ રહ્યા હતા ત્યારે લૂંટની ઘટના બની હતી. જોકે લૂંટ થઈ હોવાની ઘટનાના મેસેજ તાત્કાલિક પોલીસ સુધી પહોંચતા અલગ અલગ ટીમો આરોપીઓને પકડવા કામે લાગી હતી. આખરે ક્રાઇમ બ્રાન્ચે લૂંટને અંજામ આપનાર પાંચ આરોપીઓની ધરપકડ કરી છે. પોલીસે 51 લાખ રોકડ બાઈક અને રિક્ષા પણ કબજે કર્યા છે. 

ફરિયાદી જ આરોપી નીકળ્યો
પોલીસે આરોપીઓની પૂછપરછ કરતા ચોંકાવનારી વિગતો સામે આવી હતી. સમગ્ર લૂંટને અંજામ આપવામાં માસ્ટર માઈન્ડ આંગડિયા પેઢીનો કર્મચારી જ નીકળ્યો છે. પોતાની પાસેથી લૂંટ થઈ હોવાની ફરિયાદ કરનાર જ કર્મચારીએ લૂટનો માસ્ટર પ્લાન બનાવ્યો હતો. ડી. નરેશ આંગડિયા પેઢીમાં કામ કરતો કમલેશ પ્રજાપતિએ તેના એક મિત્ર અશ્વિન પ્રજાપતિ કે જે અન્ય આંગડિયા પેઢીમાં કામ કરે છે. બંને મિત્રોએ લૂટનો કીમિયો રચવાનું નક્કી કર્યું અને લૂંટના નાટકને અંજામ આપવા કમલેશ અને અશ્વિન બંને મિત્રોએ ગુનાહીત ઇતિહાસ ધરાવતો મેહુલસિંહ ઉર્ફે મનુનો સંપર્ક કર્યો અને અન્ય બે વ્યક્તિઓને પણ લૂટના નાટકમાં સામેલ કરી સમગ્ર મામલાને અંજામ આપ્યો હતો.

પ્લાન અંગે સાથી કર્મચારી છગનલાલ અજાણ હતો
ડી.નરેશ આંગડિયા પેઢીમાં કામ કરતા કમલેશ પ્રજાપતિ તેના અન્ય કર્મચારી છગનલાલ સાથે સીજી રોડ પરથી 50 લાખ રૂપિયા લઇને પોતાની કાલુપુર વિસ્તારમાં આવેલી ઓફિસ પર પરત ફરતા હતા ત્યારે પહેલેથી જ પ્લાન મુજબ અશ્વિન પ્રજાપતિ અને મેહુલસિંહ બાઈક પર આવ્યા અને બેગ લઈને નાસી ગયા હતા. જોકે કમલેશ પ્રજાપતિએ જ પોતાની લૂંટનો પ્લાન બનાવ્યો તેનાથી તેની સાથે રહેલો સાથી કર્મચારી છગનલાલ અજાણ હતો. લૂંટ બાદ કોઈને શંકા જાય નહીં તેથી કમલેશ પ્રજાપતિ પોલીસ મથક પહોંચી પોતાની સાથે લૂંટ થઈ હોવાની ફરિયાદ પણ નોંધાવી હતી.

લૂંટના માસ્ટર માઈન્ડ વિરૂદ્ધ પહેલા પણ ગુનો નોંધાઈ ચુક્યા છે
કમલેશ પ્રજાપતિએ પોતાની સાથે લૂંટની ઘટના બની હોવાની ફરિયાદ નોંધાવી અન્ય ચારેય આરોપીઓને મળ્યો હતો અને લૂંટની રકમના ભાગ પાડ્યા હતા. જેમાંથી 25 લાખ રૂપિયા કમલેશે પોતે રાખ્યા હતા જ્યારે અશ્વિન અને મેહુલસિંહ ને 10-10 લાખ આપ્યા હતા અને અન્ય બે આરોપીઓને અઢી-અઢી લાખ આપ્યા હતા. જોકે પોલીસે સીસીટીવી અને બાઈકને આધારે આખરે કમલેશ સહિત ચારેય આરોપીઓને પકડી પાડયા છે. પોલીસ તપાસમાં એવું પણ સામે આવ્યું છે કે લૂંટનો માસ્ટર માઈન્ડ કમલેશ વિરૂદ્ધ અંબાજીમાં દારૂનો કેસ નોંધાયો હતો. તેમજ આરોપી મયંક વિરૂદ્ધ 7 કેસ અને આરોપી મેહુલ વિરૂદ્ધ પણ એક કેસ નોંધાઈ ચૂક્યો છે.