બાળકીઓને ચોકલેટ આપી છેડતી કરી રહેલા ભાવેશ શિંગાળા નામના શખ્સની પોલીસે ધરપકડ કરી પોક્સો એક્ટ હેઠળ ગુનો નોંધ્યો
સુરતના કામરેજ વેલંજા વિસ્તારની ઘટના
બાળકીને હેરાન કરતા શખ્સને પોલીસે ઝડપી પાડ્યો
બાળકીઓને ચોકલેટ આપી છેડતી કરી હેરાન કરતો હતો
બાળકીઓને અપહરણની ધમકી આપતો હતો
સુરતના ઓલપાડના ઉમરા ગામે રહેતો વિકૃત માનસિકતા ધરાવતા એક નરાધમ વેલંજા ગામની બે સોસાયટીઓની નાની બાળકીઓની છેડતી કરી તેને લલચાવી-ડરાવી અપહરણ કરવાની કોશિશ કરી રહ્યો હોવાની ફરિયાદ કામરેજ પોલીસ મથકમાં થઈ હતી.જેના પગલે પોલીસે આ શખ્સ ગંભીર ગુનો આચરે તે પહેલા અગમચેતી બતાવી ઝડપી લીધો હતો.
બાળકીઓને ચોકલેટ આપી લલચાવતો હતો
કામરેજના વેલંજા ગામે અબ્રામા રોડ ઉપર આવેલ રહેઠાણની બાજુમાં આવેલ સ્વાગત સોસાયટીમાં રહેતા 2 વ્યક્તિઓની દીકરીઓને એક નરાધમ છેલ્લા બે માસથી બદઈરાદો રાખી રહ્યો હતો. આરોપી ઈસમ સફેદ કલરની એકટીવા ઉપર આવી નાની બાળકીઓને ચોકલેટ આપી બોલાવી છેડતી કરી લલચાવી,ડરાવી ઉપાડી જઇ અપહરણ કરવાની કોશિશ કરી રહ્યો હતો.જેની ફરિયાદ કામરેજ પોલીસ મથકે કરાઈ હતી.
પોલીસે વોચ ગોઠવી પકડી પાડ્યો
સુરત ગ્રામ્ય ડીવાયએસપી બી.કે.વનારે ગુનાની ગંભીરતા ધ્યાનમાં લઇ કામરેજ પોલીસ મથકના પોલીસ ઇન્સ્પેકટર આર.બી.ભટોળને વોચ રાખવા સુચના આપી હતી.જે સુચના આધારે આર.બી.ભટોળે ટીમ બનાવી ટેકનિકલ અને હ્યુમન ઇન્ટેલીજન્સ આધારે તપાસ શરૂ કરી હતી.કામરેજ પોલીસે બાતમીના આધારે ભાવેશ ઉર્ફે ભાવિન ધનજી શિંગાળા ,ઉમરા ગામ,ઓલપાડને ગણતરીના કલાકોમાં ઝડપી જેલના સળિયા પાછળ ધકેલી દીધો હતો.પોલીસે આ નરાધમ વિરુદ્ધ પોસ્કો અકેટ હેઠળ ગુનો નોંધી વધુ તપાસ હાથ ધરી છે.