છેતરપિંડી / મોરબીમાં ડોકટરોને જ ટાર્ગેટ કરી ભેજાબાજો BSNLના નામે આ રીતે ઉતારતા હતા બાટલીમાં, અંતે ત્રિપુટી ઝબ્બે

• મોરબીમાંથી ડોક્ટરો સાથે છેતરપિંડી કરતી ગેંગ ઝડપાઇ
• આરોપી BSNLના કોન્ટ્રાક્ટરની આપતા હતા ઓળખ
• પોલીસે 3 શખ્સની કરી ધરપકડ

મોરબી જિલ્લામાં જુદીજુદી હોસ્પિટલના ડોક્ટરનો સંપર્ક કરીને તેને બી.એસ.એન.એલ.ના તમામ કર્મચારોઓના મેડીકલ સારવારના કોન્ટ્રાકટની લાલચે ડોક્ટરો સાથે છેતરપીંડી કરતી ગેંગ ઝડપાઇ છે. ગઠિયા દ્વારા બી.એસ.એન.એલ.ના બહાને ખોટા ટેંડર બનાવી, બાટલીમાં ઉતરતા હતા. વાંકાનેરમાં ડોક્ટરની સાથે છેતરપિંડી કરીને લાખો રૂપિયાની છેતરપિંડી કરવા માટેની તૈયારીમાં રહેલા આરોપીને મોરબી જિલ્લા એસઓજીની ટીમે રંગે હાથે ઝડપી લીધા છે.

બાતમીને આધારે દબોચી લીધા

મોરબી જિલ્લાના જુદાજુદા વિસ્તારમાં ડોક્ટરોને બી.એસ.એન.એલ. ના એમ્પ્લોઇના મેડીકલ સારવારનો કોંટ્રાકટ આપવાનું કહેવામા આવે છે અને તેની સાથે એમ.ઓ.યુ. કરવાનું કહીને જે તે હોસ્પિટલના ડોક્ટર પાસેથી તેની અવેજીમાં લાખો રૂપિયાનું કમિશન માંગવામાં આવી રહ્યું છે. તેવી બાતમી પોલીસને મળી હતી. જેમાં  આ શખ્સો દ્વારા બી.એસ.એન.એલ. રાજકોટના બનાવટી દસ્તાવેજો થકી ડોકટરો પાસેથી લાખો રૂપીયા પડાવવાનો પ્રયાસ કરાઈ રહ્યો છે. જેને લઈને પોલીસે તપાસ હાથ ધરી હતી.જેમાં બી.એસ.એન.એલ.ના જનરલ મેનેજર યોગેશકુમાર ગઢશીરામ સાથે વાંકાનેરમાં આવેલ રોયલ કેર હોસ્પીટલના ડો.ધર્મેદ્રસિંહ ઝાલાએ વાત કરી હતી. બાદમાં છટકુ ગોઠવીને ડોકટરો પાસેથી લાખો રૂપીયાની છેતરપીંડી કરી રૂપીયા પડાવી લેનાર ગેંગના ત્રણ શખ્સોને એસઓજીની ટીમે ઝડપી લીધા હતા.

25500નો મુદામાલ કબજે 

આ અંગે વાંકાનેર સીટી પોલીસ સ્ટેશનમાં રમેશ રામસુભાગ પ્રજાપતી, સુનીલ દેવીદયાલ નામદેવ, હુઝુર ભોપાલ મધ્યપ્રદેશ અને સલમાન નબીમહમદ કુરેશીને ઝડપી લીધા હતા. પોલીસે આ શખ્સો પાસેથી બી.એસ.એન.એલ. ખોટા એલોટમેન્ટના ત્રણ લેટરો, 6 મોબાઇલ જેની કિંમત 16500 અને રોકડા રૂપીયા ૯૦૦૦, ડમી ચુંટણી કાર્ડ, બેંકના બે કાર્ડ, 1 થેલો આમ કુલ મળીને 25500નો મુદામાલ કબજે કર્યો છે.