કેન્દ્રીય પરિવહન મંત્રાલયે એક ડ્રાફ્ટ નોટીફીકેશન જાહેર કર્યુ છે જેમાં જુના વાહનોના કામકાજથી જોડાયેલી ફી વધારી દેવામાં આવી છે.
ગાડીના દસ્તાવેજ રિન્યુઅલ પડશે મોંઘા
15 વર્ષ જુની ગાડી છે તો ખર્ચવા પડશે પૈસા
ઓક્ટોબર મહિનાથી લાગૂ કરવા વિચારણા
આ પગલુ કેન્દ્ર સરકારના વ્હીકલ સ્ક્રેપેજ પોલીસી હેઠળ ઉઠાવવામાં આવ્યો છે. આ હેઠળ જો તમારી પાસે રહેલુ વાહન 15 વર્ષ કરતા જુનુ છે તો તેનુ રજીસ્ટ્રેશન સર્ટિફીકેટ એટલે કે RC રિન્યુ કરાવવા માટે તમારે પાંચ હજાર રૂપિયા સુધી ચુકવવુ પડી શકે છે.
8 ગણી વધી શકે છે ફી
આ વર્ષે ઓક્ટોબર બાદ તમારે આરસી રિન્યુ માટે સામાન્ય ફીઝમાંથી 8 ગણી વધારે ફી ચૂકવવી પડી શકે છે. આ સિવાય જૂના બાઇકના રજીસ્ટ્રેશન માટે 300 રૂપિયાની જગ્યાએ ઓક્ટોબર બાદ 1000 રૂપિયા સુધી ચૂકવવા પડી શકે છે. 15 વર્ષ જૂના કોમર્શિયલ વ્હીકલ એટલે કે બસ અને ટ્રક ફિટનેસ રિન્યુઅલ સર્ટીફીકેટ માટે અત્યારની તુલનામાં 21500 રૂપિયા એટલે કે 21 ગણી વધારે ચૂકવવી પડી શકે છે.
આપવી પડશે પેનલ્ટી
આ પ્રપોઝલ મુજબ પ્રાઇવેટ વાહનોના રજીસ્ટ્રેશન રિન્યુ કરાવવામાં મોડુ થશે તો દર મહિને 300થી 500 રૂપિયા સુધીની પેનલ્ટી ભરવી પડી શકે છે. માત્ર આટલુ જ નહી કમર્શિયલ વ્હીકલ્સ માટે ફીટનેસ સર્ટીફીકેટ રિન્યુઅલમાં મોડુ થશે તો 50 રૂપિયાની પેનલ્ટી લગાવવામાં આવશે.
ટેસ્ટમાં ફેલ થયેલા વાહનો સ્ક્રેપ કરવામાં આવશે
મહત્વનુ છે કે પ્રાઇવેટ વ્હીકલના માલિકોને 15 વર્ષ બાદ દર પાંચ વર્ષે રજીસ્ટ્રેશન સર્ટીફીકેટને રિન્યુ કરાવવુ પડે છે. આ જ રીતે કમર્શિયલ વ્હીકલને દર 8 વર્ષે ફિટનેસ સર્ટીફીકેટ કઢાવવુ પડે છે. જે વાહન ફીટનેસ ટેસ્ટમાં પાસ નહી થાય તેમને સ્ક્રેપમાં નાંખી દેવામાં આવશે.