ચીખલીના પૂર્વ વિસ્તારમાં આવેલા ગામોમાં 5 દિવસમાં અનેક પશુઑને વાડામાં જઈ શિકાર બનાવ્યા, દીપડાને પકડવાની કવાયત શરૂ
નવસારી જિલ્લામાં દીપડાનો આતંક યથાવત
ચીખલીના પૂર્વ વિસ્તારના ગામોમાં દીપડાના આંટાફેરા
ગ્રામ્ય વિસ્તારોમાં પશુઓને દીપડાએ બનાવ્યા નિશાન
દક્ષિણ ગુજરાતમાં અવાર નવાર આદમખોર દીપડાની દહેશત સામે આવી છે. ત્યારે નવસારી જિલ્લાના ચીખલીના પૂર્વ વિસ્તારમાં પણ દીપડાનો આતંક યથાવત છે. કુંકેરી ગામ આસપાસના વિસ્તારમાં કેટલાક દિવસથી દીપડો આટાફેરા મારી રહ્યો છે. જેમાં છેલ્લા 5 દિવસમાં 3 ગામોના પશુઓનો શિકાર કરતા ફફડાટ વ્યાપ્યો છે.વનવિભાગના અધિકારીઓને ગ્રામજનોએ દીપડાને પકડવા રજૂઆત કરી છે. જે બાદ વનવિભાગની ટીમે દીપડાને પકડવા કુંકેરી ગામે પાંજરા ગોઠવ્યા. છતાંય હજુ દીપડાની કોઈ ભાળ મળી નથી. હાલ ગામલોકો ભયના ઓથાર હેઠળ જીવી રહ્યા છે. ખેતરે જવાથી પણ ડરી રહ્યા છે.
છોટા ઉદેપુરમાં દીપડાએ મહિલા પર હુમલો કરતા મોત
તો ગઈ કાલે જ છોટાઉદેપુરના લગામી ગામે દીપડાએ મહિલા પર હુમલો કરી દીધો હતો. જેમાં મહિલાના શરીર પર ગંભીર ઈજાઓ પહોંચી હતી. જંગલમાં બનેલી આ ઘટનામાં દીપડો હુમલો કર્યા બાદ ચાલ્યો ગયો હતો. પણ હુમલામાં ગંભીર રીતે ઘવાયેલી મહિલાએ જંગલમાં દમ તોડી દીધો હતો. જ્યાંથી મૃતદેહને વન વિભાગના અધિકારીઑ દ્વારા રેસ્ક્યૂ કરવામાં આવ્યો હતો. વનવિભાગે દિપડાને પકડવા પાંજરું મુક્યું હતુ દીપડો હજુ સુધી પકડમાં ન આવતા જંગલ વિસ્તારમાં રહેતા લોકોમાં ડર ફેલાયો છે.
ગુજરાતમાં કેટલાય એવા જંગલ સાથે સકળાયેલા જિલ્લાઑ અને ગ્રામ્ય વિસ્તારો છે જ્યાં છાશવારે દીપડાની ઘટનાઓમાં પશુઓ અને લોકોના મોત થાય છે. પણ હજુ સુધી વન વિભાગ આ મામલે કોઈ નક્કર પગલા લઈ રહ્યું નથી. લોક માંગ એવી પણ ઉઠી છે કે જો સિંહને ડિવાઇઝ લગાવી ટ્રેસિંગ થઇ શકતું હોય તો કેમ દીપડાને ટ્રેક કરી હુમલાઓ અટકાવામાં તંત્ર પાંગળું સાબિત થઈ રહ્યું છે તે મોટો સવાલ છે.