રાજકોટમાં એક સોસાયટીમાં રહેતા વૃદ્ધને સોસાયટીના કમિટીનાં સભ્યો દ્વારા માનસિક ત્રાસ આપતા. વૃદ્ધે કંટાળી ઝેરી દવા ગટગટાવી આપઘાતનો પ્રયત્ન કરતા સારવાર દરમ્યાન તેઓનું મોત નિપજ્યું હતું.
રાજકોટમાં સોસાયટીના પ્રમુખ તેમજ ઉપપ્રમુખની જોરહુકમીથી વૃદ્ધે જીવન ટૂંકાવ્યું
વૃદ્ધે ઝેરી દવા ગટગટાવી આપઘાતનો પ્રયાસ કર્યો
સ્યુસાઈડ નોટમાં સોસાયટીનાં પ્રમુખ, ઉપપ્રમુખ સામે ગંભીર આક્ષેપો
રાજકોટમાં આવકાર સિટી એપાર્ટમેન્ટમાં રહેતા કારખાનેદારે જીતેન્દ્રભાઈ લક્ષ્મણભાઈ સાગપરિયા (ઉ.વર્ષ 55) એ પોતાના ઈલેક્ટ્રીક મોટર બાંધવાના કારખાનામાં 20 માર્ચનાં રોજ ઝેરી દવા ગટગટાવી આપઘાતનો પ્રયાસ કરતા તેઓને સારવાર અર્થે સિવિલ હોસ્પિટલ ખસેડવામાં આવ્યાં હતા. ત્યારે આ પોલીસને તેઓની પાસેથી સ્યુસાઈડ નોટ પણ મળી આવી હતી. જેમાં તેઓએ સોસાયટીનાં પ્રમુખ, ઉપપ્રમુખ સામે ગંભીર આક્ષેપો કર્યા હતા. સ્યુસાઈડ નોટમાં તેઓએ લખ્યું હતુ કે તેઓ માનસિક ત્રાસને કારણે આ પગલું ભરવાનો વારો આવ્યો છે. ત્યારે સારવાર દરમ્યાન તેઓનું મોત નિપજતા પોલીસે ગુનો નોંધી તપાસ હાથ ધરી છે.
મને જબરજસ્તીથી મકાન ખાલી કરવા પણ દબાણ કરી રહ્યા છેઃસગપરિયા જીતેન્દ્રભાઈ
સ્યુસાઈડ કરતા પહેલા સગપરિયા જીતેન્દ્રભાઈ લક્ષ્મણભાઈએ સ્યુસાઈડ નોટમાં લખ્યું હતું કે, મારી સોસાયટીમાં ચાલતી ગેરકાયદેસર કમિટીના પ્રમુખ, ઉપપ્રમુખે લોકોની હાજરીમાં જાહેરમાં મેઈન ગેટથી અંદર પાણી મારા ઘર સુધી ન આવે તેવી ખુલ્લી ધમકી આપી હતી. તેમજ મને જબરજસ્તીથી મકાન ખાલી કરવા પણ દબાણ કરી રહ્યા છે. ત્યારે મારે પાણી વેચાતું લેવું પડે છે, આ બાબતે અગાઉ મેં પોલીસમાં અરજી આપી હતી.
મારા મોત માટે કમિટીના પ્રમુખ, ઉપપ્રમુખ તેમજ વિંગના લોકો જવાબદારઃસ્યુસાઈડ નોટમાં ઉલ્લેખ
સ્યુસાઈટ નોટમાં વધુમાં તેઓએ લખ્યું હતું કે હું એટલો કંટાળી ગયો છું કે ફરિયાદ કરવા છતા આ લોકો છટકી જાય છે. મને પાણી વિના મારવા માંગે છે. તો હું ઝેર પીને આત્મહત્યા કરુ છું. છેલ્લે તેઓએ સ્યુસાઈટ નોટમાં લખ્યું કે આ પગલું ભરવા માટે મને મજબૂર કરનારને સરકાર કડકમાં કડક સજા આપે તેવી મારી અપીલ છે. જેથી મારા પરિવારને ન્યાય મળે. મારા મોત માટે કમિટીના પ્રમુખ, ઉપપ્રમુખ તેમજ વિંગના લોકો જવાબદાર છે.
જીતેન્દ્રભાઈનું સારવાર દરમ્યાન મોત નિપજતા સ્યુસાઈડ નોટનાં આધારે તાલુકા પોલીસે ગુનો નોંધી કાયદેસરની કાર્યવાહિ હાથ ધરી છે.