વિકૃતતાની હદ / પરણેલી છોકરીની અશ્લિલ તસવીરો-વીડિયો વાયરલ થતાં હડકંપ, કોણ કર્યું, કેમ કર્યું જાણીને હચમચી જશો

• યુપીના કન્નોજના એક શખ્સની શરમજનક કરતૂત
• દહેજની માગ પૂરી ન થતાં પતિએ પત્નીની પ્રાઈવેસી હણી લીધી
• પત્નીની અશ્લિલ તસવીરો સોશિયલ મીડિયામાં ફરતી કરી 

યુપીના કન્નોજમાં પૈસા માટે એક શખ્સે પોતાની પત્ની સાથે જે કામ કર્યું તે જાણીને ચોંકી જવાશે. પતિએ પત્નીની અશ્લિલ તસવીરો અને વીડિયો વાયરલ કરી દીધાં. મીડિયા રિપોર્ટ્સ અનુસાર, જ્યારે તેણે દહેજ કેસમાં સમાધાન કરવાની ના પાડી તો આરોપીએ તેની પત્નીની અશ્લીલ તસવીરો સોશિયલ મીડિયા પર પોસ્ટ કરી હતી. આ બાબતનો ખુલાસો થતાં પોલીસે આરોપી સામે ગુનો નોંધ્યો છે.

લગ્ન બાદ સાસરિયાઓએ 20 લાખ અને સોનાની ચેઈનની માગ શરુ કરી 
આ ઘટના કન્નૌજ જિલ્લાના તિરવા કોતવાલી પોલીસ સ્ટેશન વિસ્તારની છે. મહિલાની ફરિયાદ બાદ પોલીસે તપાસ શરૂ કરી છે. મહિલાએ આરોપી સાથે 25 નવેમ્બર 2020ના રોજ લગ્ન કર્યા હતા. તેણે આરોપ લગાવ્યો હતો કે લગ્ન પછી તરત જ તેના સાસરિયાઓએ 20 લાખ રૂપિયા અને સોનાની ચેઇનની માંગ શરૂ કરી દીધી હતી.

દહેજનો કેસ પાછો ન ખેંચ્યો એટલે નગ્ન તસવીરો પોસ્ટ કરી 
24 ડિસેમ્બર, 2021 ના રોજ, તેને ઘરમાંથી કાઢી મૂકવામાં આવી હતી અને 18 માર્ચ, 2022 ના રોજ, તેના પતિ સહિત સાત લોકો સામે એફઆઈઆર નોંધવામાં આવી હતી. તેણે કહ્યું કે, જ્યારે તેણે ફરિયાદ પાછી ખેંચવાની ના પાડી ત્યારે તેના પતિએ તેની તસવીરો સાથે છેડછાડ કરી હતી અને તેને સોશિયલ મીડિયા પર પોસ્ટ કરી હતી. 

અનેક લોકોના હાથમાં આવી નગ્ન તસવીરો અને વીડિયો

સોશિયલ મીડિયા પર અનેક લોકોના હાથમાં પીડિતાની તસવીરો આવી હોવાનું પણ કહેવાય છે. લોકોને આ ઘટના જાણીને આઘાત લાગ્યો હતો. એક પતિ ઉઠીને પોતાની પત્ની સાથે આવું કરે તે તો માન્યામાં જ ન આવે પરંતુ પૈસા માટે બધું કરી છૂટતા લોકોની આ દુનિયામાં ક્યાં ખોટ છે.