UKમાં મૂળ ગુજરાતી પત્ની બાદ પતિની પણ ઘરમાંથી લાશ મળી આવી છે. ગત સપ્તાહે યુકેમાં મિડલ્સબોરોમાં મેડિકલ સ્ટોર ચલાવતી જેસિકા પટેલની લાશ તેના નોર્થ ઈંગ્લેન્ડમાં આવેલા ઘરમાંથી મળી હતી. જેની હત્યાનો આરોપ તેના પતિ મિતેશ પટેલ પર લગાવાયો હતો. આ માટે તેને કોર્ટમાં હાજર પણ કરાયો હતો.
આ ઘટનાના એક સપ્તાહ પછી પત્ની જેસિકા પટેલની હત્યાના આ આરોપી મિતેશ પટેલની લાશ પણ તેના ઘરમાંથી મળી આવી હતી. 36 વર્ષીય મિતેશ પટેલ અને 34 વર્ષીય જેસિકા પટેલ મિડલ્સબોરોમાં મેડિકલ સ્ટોર ચલાવતા હતા. પતિ-પત્ની બંનેએ માન્ચેસ્ટરની યુનિવર્સિટીમાં સાથે અભ્યાસ કર્યો હતો અને ત્યાં જ બંને પ્રથમવાર મળ્યા હતા.
પોલીસ આ કેસમાં સઘન તપાસ કરી રહી છે. જોકે પોલીસે તપાસને અનુલક્ષીને વધુ વિગતો આપી નથી અને તપાસ ચાલુ હોવાથી પોસ્ટમોર્ટમ રિપોર્ટ્સની વિગતો પણ જાહેર કરવામાં આવી નથી. જેસિકાના મૃત્યુ બાદ તેના પરિવારજનો અને મિત્રોએ જણાવ્યું હતું કે જેસિકા એક ઉમદા માયાળુ તેમજ નિ:સ્વાર્થ વ્યક્તિ હતી અને તે પરિવાર અને મિત્રો સાથે પ્રેમાળ સ્વભાવથી રહેતી હતી. તે તેના પરિવારને સંપૂર્ણ સમર્પિત હતી તેને ગુમાવતા અસહ્ય દુ:ખની લાગણી અમને થઈ રહી છે.
આ દંપતીના પરિચિત લોકોએ પણ કહ્યું હતું ‘તેઓ બંને ઉમદા લોકો અને મિત્રતાપૂર્ણ હતા. પતિ-પત્ની બંનેએ જ્યારથી મેડિકલ સ્ટોર શરૂ કર્યો હતો ત્યારથી સમગ્ર વિસ્તારમાં ખૂબ જાણીતા બની ગયા હતા. તેમના પડોશીઓનાં જણાવ્યા પ્રમાણે મિતેશ અને જેસિકા બંને ખરેખર સારા લોકો હતા.
આ પડોશીઓ તેમના મેડિકલ સ્ટોરની નજીક જ રહે છે. તેઓ ત્રણ વર્ષથી મેડિકલ સ્ટોર ચલાવી રહ્યા હતા. પત્નીની હત્યા બાદ હવે પતિની પણ લાશ મળી આવતા પોલીસે તેમના ઘર તથા કામકાજના સ્થળે સઘન તપાસ શરૂ કરી છે.