રાજનીતિ / કોંગ્રેસના આ 7 MLAના નામ ક્રોસ વોટિંગ કર્યાની ચર્ચામાં, ફરી એકવાર તૂટી શકે છે કોંગ્રેસ: સૂત્ર

• કોંગ્રેસનો આંતરિક વિખવાદ ફરી થયો છતો
• મત આપવામાં કોંગ્રેસ MLAની જાગી અંતરઆત્મા
• પક્ષથી વિરોધ થઈ મૂર્મુને આપ્યા મત

ગઈકાલે રાષ્ટ્રપતિ ચૂંટણીના પરિણામ આવતાની સાથે જ ગુજરાતના રાજકારણમાં ગરમાવો આવ્યો છે. કારણ કે  એનડીએના ઉમેદવાર દ્રૌપદી મુર્મૂના સમર્થનમાં ગુજરાતમાંથી 10 વોટ વધુ પડ્યા છે એટલે કે વિપક્ષ કોંગ્રેસના ધારાસભ્યોએ મુર્મૂના સમર્થનમાં વોટ આપ્યા છે. ત્યારે ગુજરાત કોંગ્રેસના નેતૃત્વ અને ધારાસભ્યોની નારાજગી પર સવાલોનો મારો થઈ રહ્યો છે. ત્યારે હવે ગુજરાત કોંગ્રેસ દ્વારા પક્ષ સાથે ગદ્દારી કરનારા ધારાસભ્યોની ઓળખ કરવામાં આવશે. કોંગ્રેસના 7 ધારાસભ્યોએ ક્રોસ વોટિંગ કર્યુ છે.  જેની કોંગ્રેસ દ્વારા ઓળખ થશે. આવા ધારાસભ્યોની ઓળખ કરવા માટે કમિટીની રચના કરાશે અને તેનો રિપોર્ટ કેન્દ્રીય નેતૃત્વને સોંપવામાં આવશે. મહત્વનું છેરાષ્ટ્રપતિ ચૂંટણીમાં NDAના દાવા મુજબ દ્રોપદી મુર્મૂને 64 ટકા મત મળ્યા જ્યારે વિપક્ષ ઉમેદવાર યશવંત સિન્હાને 36 ટકા મત મળ્યા.   ગુજરાત વિપક્ષના 10 ધારાસભ્યોએ દ્રોપદી મુર્મૂના સમર્થનમાં વોટ કર્યા  દેશમાં 17 સાંસદો, 104 ધારાસભ્યોએ ક્રોસ વોટિંગ કર્યું હોવાની વિગતો મળી રહી છે.

કોંગ્રેસના કયા MLA કર્યું ક્રોસ વોટિંગ?
હાલ ગુજરાતભરમાં ચર્ચાનો વિષય એ છે કે કયા ધારાસભ્યોએ ક્રોસ વોટિંગ કર્યું? ત્યારે સૂત્રો દ્વારા VTV ગુજરાતની મહત્વની માહિતી મળી રહી છે. ક્રોસ વોટિંગથી ગુજરાત કોંગ્રેસ ફરી એક વાર તૂટી શકે છે ગુજરાતના સાત ધારાસભ્ય હાથ છોડી શકે છે. જેમાં સૂત્રો મુજબ પાલનપુરના MLA મહેશ પટેલે, વિસાવદરના ધારાસભ્ય હર્ષદ રિબડિયા, લલિત વસોયા, કિરીટ પટેલ, સંજય સોલંકી, કાલાવાડના ચિરાગ કાલરિયાએ ક્રોસ વોટિંગ કર્યું હોઈ શકે છે. મહત્વનું છે કે લલિત વસોયા, ચિરાગ કાલરિયા ભાજપ તરફી પ્રેમ જાહેર કરી ચુક્યા છે. કિરીટ પટેલ, સંજય સોલંકી પણ ભાજપ તરફી કુણ વલણ રાખી રહ્યા છે. 

ક્રોસ વોટિંગના આક્ષેપને લઈને બોલ્યા ધારાસભ્ય કિરીટ પટેલ
ધારાસભ્ય કિરીટ પટેલનું નામ પણ ક્રોસ વોટિંગમાં ચર્ચાઇ રહ્યું છે જે બાદ તેઓએ ખુલાસો કરતાં કહ્યું કે મે ક્રોસ વોટિંગ કર્યું નથી. આ વાત બિલકુલ ખોટી છે.  ક્રોસ વોટિંગ જે કોઈએ કર્યું હોય તેની તપાસ થાય તો દૂધનું દૂધ અને પાણીનું પાણી થાય.

કોંગ્રેસ મતદાનની વિગતની માગણી કરશે: રાઠવા
સમગ્ર મામલે જોર પકડતા વિપક્ષ નેતા સુખરામ રાઠવાએ પણ નિવેદન જાહેર કરતા કહ્યું છે કે NDA ઉમેદવારને ગુજરાતમાંથી કેટલા મત મળ્યા તેની માગણી  ગુજરાત કોંગ્રેસ દ્વારા કરવામાં આવશે. જેની માટે કેન્દ્રિય ચૂંટણી પંચને પત્ર લખી વિગતો માંગવામાં આવશે.વિગત મળ્યા બાદ નક્કી થશે કે ક્રોસ વોટિંગ થયુ કે નહીં?

રાષ્ટ્રપતિની ચૂંટણીમાં કોંગ્રેસ MLA દ્વારા ક્રોસ વોટિંગના આક્ષેપ મામલે પાલનપુર ધારાસભ્ય મહેશ પટેલે કહ્યું છે કે મે કોઇ ક્રોસ વોટિંગ નથી કર્યું. પક્ષના આદેશ પ્રમાણે વોટિંગ કર્યું છે. ક્રોસ વોટિંગની ખોટી વાત છે. કોંગ્રેસ સાથે પ્રમાણિકતા પ્રમાણે રહી કામ કર્યું છે અને હંમેશા કરતો રહીશ

• પાલનપુરના MLA મહેશ પટેલે કર્યું ક્રોસ વોટિંગઃ સૂત્ર 
• વિસાવદરના ધારાસભ્ય હર્ષદ રિબડિયાએ ક્રોસ વોટિંગ કર્યુંઃ સૂત્ર
• લલિત વસોયા, કિરીટ પટેલ, સંજય સોલંકીએ કર્યું ક્રોસ વોટિંગઃ સૂત્ર
• કાલાવાડના ચિરાગ કાલરિયાએ કર્યું ક્રોસ વોટિંગઃ સૂત્ર
• લલિત વસોયા, ચિરાગ કાલરિયા ભાજપ તરફી પ્રેમ જાહેર કરી ચુક્યા છે 
• કિરીટ પટેલ, સંજય સોલંકી પણ ભાજપ તરફી કૂણું વલણ જાહેર છે