સુરતમાં યોજાયેલા એક સમૂહ લગ્નમાં સમાજના નામે 61 લાખનો ચાંલ્લો આવ્યો. પરંતુ આ 61 લાખનો ચાંલ્લો શહીદોના નામ કરી દેવાયો છે. તમે એવું સાંભળ્યું છે કે કોઈ સમૂહ સગ્નમાં સૌથી પહેલા રાષ્ટ્રગીત ગવાયું હોય. નહીં જ સાંભળ્યું હોય. પરંતુ સુરતમાં યોજાયેલ સૌરાષ્ટ્ર પટેલ સેવા સમાજના સમૂહ લગ્નમાં શહીદોને શ્રદ્ધાંજલી આપતા 35 હજાથી વધુ લોકોએ રાષ્ટ્રગીતનું ગાન કર્યું. આ સમૂહ લગ્નમાં 261 યુગલોએ પ્રભુતામાં પગલા તો પાડ્યા. પરંતુ તે પહેલા બે મિનિટનું મૌન પાળી દેશના વીર જવાનોને શ્રદ્ધાંજલી આપી હતી.
સૌથી મહત્વની બાબત તો એ છે કે શ્રી સૌરાષ્ટ્ર પટેલ સેવા સમાજના 60માં સમૂહલગ્નમાં 61 લાખ રૂપિયાનો ચાંલ્લો થયો હતો. જે રકમને સમાજના વિકાસ માટે વાપરવામાં આવી હોય છે. પરંતુ આ વખતે પટેલ સમાજ દ્વારા આ રકમ પુલવામાં આતંકી હુમલામાં શહીદ થયેલા આપણા વીર સપૂતોના પરિવાજનોને ભેટ કરી દેવામાં આવી છે. જેમણે આપણી રક્ષા કરતા શહીદી વહોરી છે. તેવા જવાનોના પરિવાર સુધી આ સહાય પહોંચાડવામાં આવી છે.
એટલું જ નહીં પરંતુ રોજનો એક રૂપિયો આપવાના ફોર્મ પણ ભરવામાં આવ્યા હતાં. જેમાં 10 હજાર લોકો સભ્ય બન્યા છે. એક તરફ દરેક નાગરીકમાં બદલાની આગ છે. તો બીજી તરફ વીર જવાનોના પરિવારોને ફૂલ નહીં તો ફૂલની પાંખળી રૂપે પણ મદદ કરવાની આંસ છે. આજે 261 દીકરીઓને તેમના માતા-પિતા અને સમાજના આશિર્વાદ તો મળ્યા જ છે. પરંતુ તેની સાથે-સાથે શહીદ જવાનોના પરિવારના આશિર્વાદ પણ મળ્યા છે.