હવે કોણ? / અહેમદ પટેલ પછી કોંગ્રેસના ચાણક્ય અને સોનિયા ગાંધીના ભરોસાપાત્ર નેતા તરીકે હોઈ શકે આ નામ

• અહેમદ પટેલની વિદાય પછી કોંગ્રેસમાં સર્જાયો ખાલીપો 
• આ લોકો છે હાલ સોનિયા ગાંધીની સલાહકાર ટીમમાં 
• સોનિયા ગાંધીના ભરોસેમંદ લોકોમાં છે જૂના કોંગ્રેસીઓ 

મુખ્યત્વે એવું માનવામાં આવે છે કે સોનિયા ગાંધી અને રાહુલ ગાંધી બંનેના પોતાના ખાસ નેતાઓનું એક વર્તુળ છે અને કોઈ પણ મુદ્દાને લઈને તેઓ તેમની સાથે ચર્ચા વિચારણા કરે છે. એ રીતે જોતા અહેમદ પટેલ માતા પુત્ર બંનેના વિશ્વાસપાત્ર હતા જો કે સોનિયા ગાંધીની વધુ નજીક હતા તો હવે જોવાનું એ રહે છે  કે તેમની જગ્યા કોણ લેશે?

હાલની સોનિયા ગાંધીની સલાહકાર ટીમ 

આ મામલે પણ નેતાઓનું એક જૂથ છે જેમાં પણ અમુક સોનિયા ગાંધીના સૌથી વધુ ખાસ છે, હાલમાં આ જૂથમાં એવું મનાઈ રહ્યું છે કે પૂર્વ પીએમ મનમોહન સિંહ, પૂર્વ રક્ષા મંત્રી એ કે એન્ટોની, અંબિકા સોની વગેરે સામેલ છે. આ સાથે જ એક નોન પોલિટિકલ વ્યક્તિત્વ જે એક સમયે રાજીવ ગાંધીના સહપાઠી હતા તે સુમન દુબે પણ આ ગ્રુપમાં છે અને ગાંધી પરિવારની ઘણી ચેરિટી સંસ્થાઓ સાથે જોડાયેલા છે. 

આ સાથે જ રાજસ્થાનના મુખ્યમંત્રી અશોક ગેહલોત, પૂર્વ ગૃહમંત્રી સુશીલ કુમાર શિંદે, મલ્લિકાર્જુન ખડગે, રણદીપ સૂરજેવાલા અને કે સી વેણુગોપાલ પણ આ ગ્રુપમાં આવે છે, પરંતુ જો સોનિયા સલાહકાર ટીમને ત્રણ ગ્રુપમાં વિભાજીત કરાય તો આ લોકોને દ્વિતીય વર્તુળમાં સમાવી શકાય કેમ કે તેઓ સોનિયા ગાંધીની એટલી નજીક નથી. 

પંજાબ અને રાજસ્થાનના CM છે આ લિસ્ટમાં સામેલ 

ત્રીજા સર્કલમાં પંજાબના મુખ્યમંત્રી અમરિન્દર સિંહ, અભિષેક મનુ સિંઘવી, પી ચિદમ્બરમ અને પૂર્વમંત્રી જયરામ રમેશ જેવા નેતાઓ સામેલ છે. જયરામ રમેશને રાહુલ અને સોનિયા બંનેની ટીમા સામેલ કરી શકાય છે કેમ કે તેઓ બંનેના વિશ્વસનીય છે અને ગાંધી પરિવારના વફાદાર છે. 

જો કે હાલના સમયમાં રાજસ્થાનના મુખ્યમંત્રી અશોક ગેહલોત સોનિયા ગાંધીના સૌથી વિશ્વસનીય સલાહકાર તરીકે બહાર આવ્યા છે અને તેમને મોટી જવાબદારીઓ પણ આપવામાં આવી રહી છે, તેને જોઈને લાગી રહ્યું છે કે અહેમદ પટેલ પછી તેમની જવાબદારી અશોક ગેહલોતને મળી શકે છે.