તહેવારોની સીઝન બાદ ફરીથી લોકો માટે મોંધવારી વધુ એક ભેટ સાથે તૈયાર ઊભી હોય તેવુ જણાઈ રહ્યું છે. કારણ કે ફરીથી એકવાર પેટ્રોલ અને ડીઝલની કિંમતમાં બે રૂપિયા સુધીનો વધારો થઈ શકે છે. મનાઈ રહ્યું છે કે ક્રૂડ ઓઇલના વધતા ભાવને કારણે આ વધારો થઈ શકે છે.
પેટ્રોલ ડીઝલની કિંમતોમાં ફરી થઈ શકે છે ભાવવધારો
બે રૂપિયા જેટલી વધી શકે છે પેટ્રોલ ડીઝલની કિંમત
2021માં પેટ્રોલિયમનો વપરાશ વધવાનું અનુમાન છે
મહત્વ નું છે કે કોરોના રસી આવી જવાના સેંટિમેંટ્સ વચ્ચે સોમવારે વૈશ્વિક બજારમાં ક્રૂડ ઓઇલ ના ભાવમાં બે ટકાનો વધારો થયો હતો અને તેમાં મંગળવારે પણ તેજી આવી હતી. માર્ચ પછી પહેલીવાર ક્રૂડ ઓઇલ ના ભાવ પ્રતિ બેરલ 47 ડોલર પર પહોંચી ગયા છે.
વર્ષ 2021 માં ક્રૂડ વપરાશમાં વધારો થઈ શકે છે : ઓઇલ બ્રોકરેજ કંપનીઓ
ઓઇલ બ્રોકરેજ કંપનીઓનું કહેવું છે કે કોરોના વાયરસ રોગચાળા પર કાબૂ મેળવવાની અપેક્ષા સાથે વર્ષ 2021 માં પેટ્રોલિયમનો વપરાશ વધવાનો અંદાજ છે. સતત ટ્રાયલ્સથી પણ રસી ટૂંક સમયમાં આવવાની આશાઓ વધી છે અને ક્રૂડ ઓઇલ નો વપરાશ ઝડપથી વધી રહ્યો છે. ડિમાન્ડમાં વધારો થવાને કારણે બ્રેન્ટ ક્રૂડની કિંમત વધીને 46.72 ડોલર પર પહોંચી ગઈ છે.
નોંધનીય છે કે 6 માર્ચ પછીનું આ સૌથી ઉચ્ચતમ સ્તર છે. WTI પણ બેરલ દીઠ 43.38ની સપાટી પર વેચાયુ છે. ક્રૂડ ઓઇલ ના ભાવને અંકુશમાં રાખવા માટે OPEC અને સાથી દેશોએ ક્રૂડ ઉત્પાદનમાં 1.20 કરોડ બેરલનો ધરખમ ઘટાડો કર્યો હતો, પરંતુ મહામારી ના દબાણ હેઠળ માર્ચથી ભાવ 40 ડોલરની આસપાસ જ રહ્યા છે.
58 ડોલર સુધી પહોંચી શકે છે ક્રૂડ
દિલ્હીમાં પેટ્રોલ 5 દિવસમાં 95 પૈસા વધીને 81.59 રૂપિયા પ્રતિ લિટર થઈ ગયું છે. બજાર નિષ્ણાતો કહે છે કે વર્ષ 2021 ની શરૂઆતમાં ક્રૂડ ઓઇલ 58 ડોલર સુધી પહોંચી શકે છે. OPEC દેશો પણ 30 નવેમ્બરના રોજ ઉત્પાદન અને કિંમતો માટે બેઠક કરવાના છે.