વલસાડની રજિસ્ટ્રાર ઑફિસમાં રાજ્ય સરકારના મહેસૂલ મંત્રી રાજેન્દ્ર ત્રિવેદીએ કરી સરપ્રાઇઝ વિઝિટ
મહેસૂલ મંત્રી રિક્ષામાં પહોંચ્યા રજિસ્ટ્રાર ઑફિસ
વલસાડ રજિસ્ટ્રાર ઑફિસમાં સરપ્રાઇઝ વિઝિટ કરી
રાજેન્દ્ર ત્રિવેદીએ પૂછ્યું, અહીં કોઈએ રૂપિયા માંગ્યા છે?
રાજ્ય સરકારના મહેસૂલ મંત્રી રીક્ષામાં બેસીને વલસાડની રજિસ્ટ્રાર ઑફિસ પહોંચ્યા. જાણીને નવાઇ લાગીને, કે મહેસૂલ મંત્રી રિક્ષામાં ? જી હા, મંત્રીજીએ સરપ્રાઇઝ વિઝિટ પ્લાન કરી હતી અને કાર સુરક્ષા બંદોબસ્તનો તામ જામ કર્યા વિના જ તેઓએ રજિસ્ટ્રાર ઑફિસમાં એન્ટ્રી મારી.. આ જોતા લાગી રહ્યુ છે કે ગુજરાતમાં ચૂંટણીઓ આવી રહી છે.
મંત્રીની સરપ્રાઇઝ વિઝિટ
આમ તો ભ્રષ્ટાચાર અને સરકારી વિભાગ આ તો સિક્કાની બે બાજુ કહેવાય. પરંતુ ભ્રષ્ટાચારીઓ વિરુદ્ધ મહેસૂલ મંત્રી એક્શનમાં આવી ગયા હોય તેમ લાગી રહ્યુ છે. કારણ કે જેવા તેઓ ઑફિસ પહોંચ્યા કે તરત જ તેમણે દસ્તાવેજ કરાવવા આવેલા લોકો સાથે મુલાકાત કરી.. કેટલાક સવાલો પણ પૂછ્યા. તેઓએ એમ પણ પૂછ્યુ કે શું અહીં કોઇ અધિકારીએ કામ કરાવવા માટે તમારી પાસે રુપિયા માંગ્યા ?
અધિકારીઓમાં ફફડાટ
સરકારી કચેરીઓમાં જનતાને કેટલા ધક્કા ખાવા પડે છે તેની આપણને ખબર જ છે. લોકો લાંબી લાઇનો લગાવીને કલાકો સુધી પોતાના કામ માટે ઉભા રહેતા આપણે જોયા છે. ત્યારે આવા સમયે ખુદ મહેસૂલ મંત્રીએ જાતે સ્થળ મુલાકાત લેતા વલસાડ રજિસ્ટ્રાર ઑફિસના અધિકારીઓ તો રીતસર દોડતા થઇ ગયા હતા. મંત્રીશ્રીને આવેલા જોઇને અધિકારીઓમાં ફફડાટ વ્યાપી ગયો હતો,
અધિકારીઓને પણ પૂછ્યા સવાલો
રાજ્યના મહેસૂલ મંત્રી રાજેન્દ્ર ત્રિવેદીએ માત્ર જનતાને જ નહી પરંતુ અધિકારીઓને પણ કેટલાક સવાલો કર્યા. તેમણે અધિકારીઓને તાકીદ કરી હતી કે ઑફિસમાં કામ માટે આવતા લોકો માટે બેસવાની વ્યવસ્થા કરવામાં આવે. કામકાજ માટે આવેલા લોકોની યોગ્ય સંભાળ લેવામાં આવે તેમ પણ જણાવ્યું.