હવામાન વિભાગે દ્વારકામાં ભારે પવન ફૂંકાવાની આગાહી કરી. દરિયાકાંઠે 40થી 50કિમીની ઝડપે ફૂંકાઇ શકે પવન
દ્વારકામાં હવામાન વિભાગે આપ્યુ એલર્ટ
ઓખા, સલાયા બંદરો પર ભારે પવન ફૂંકવાની શક્યતા
દરિયાઇ પટ્ટીમાં 40થી 50 કિમી ઝડપે ફૂંકાઇ શકે છે પવન
રાજ્ય આખુ ઠંડીથી ઠુઠવાઇ રહ્યુ છે તે વચ્ચે હવામાન વિભાગે ખાસ દ્વારકાને લઇને એલર્ટ જાહેર કર્યુ છે. હવામાન વિભાગે જણાવ્યુ છે કે આગામી દિવસોમાં ઓખા અને સલાયા બંદરો પર ભારે પવન ફૂંકાવાની શક્યતા છે. તેમજ દરિયાઇ પટ્ટીમાં 40 થી 50 કિમીની ઝડપે પવન ફૂંકાવાની આગાહી કરી છે. જેને લઇને માછીમાર ભાઇઓ બહેનોએ કાંઠા વિસ્તાર છોડીને અન્ય સ્થળે ચાલ્યા જવાની સૂચના આપવામાં આવી છે.
22 જાન્યુઆરી સુધી દરિયો ન ખેડવો
હવામાન વિભાગની આગાહીને પગલે માછીમારોને કડક સૂચના આપવામાં આવી છે કે આગામી 22 જાન્યુઆરી સુધી કોઇ પણ માછીમાર દરિયો ખેડવા જશે નહી. દરિયો ન ખેડવાની કડક સૂચના આપી દેવામાં આવી છે. તો માછીમારોએ પણ આગાહીને પગલે દરિયા કાંઠે બોટ લાંગરી દીધી છે. દરિયામાં ઊંચા મોજા ઉછળશે તેવી સંભાવનાને પગલે સાગરખેડૂઓને સાવચેત કરવામાં આવ્યા છે.
કમોસમી વરસાદની પણ આગાહી
રાજ્યમાં ફરી કમોસમી વરસાદ પડી શકે છે. હવામાન નિષ્ણાંત અંબાલાલ પટેલે કમોસમી વરસાદની આગાહી કરી છે. તેમણે જણાવ્યુ છે કે રાજ્યમાં 18થી 20 જાન્યુઆરી સુધી કમોસમી વરસાદ પડી શકે છે. પશ્ચિમી વિક્ષોભના કારણે માવઠું થઇ શકે છે. તો કેટલાક વિસ્તારમાં વાદળછાયા વાતાવરણની શકયતા છે.