રાજ્ય આખુ ઠંડીથી ઠુઠવાઇ રહ્યુ છે તે વચ્ચે હવામાન વિભાગે જણાવ્યું હતું કે, આગામી ત્રણ દિવસોમાં સમગ્ર રાજ્યમાં પુનઃ કમોસમી વરસાદ પડી શકે છે.
રાજ્યમાં 3 દિવસ સુધી કમોસમી વરસાદની આગાહી
વેસ્ટર્ન ડિસ્ટર્બનસની અસરને પગલે રહેશે વરસાદ
દરિયાઈ કાંઠામાં 60 કિમિ ઝડપે પવનોની ગતિ તેજ રહેશે
ત્રણ દિવસ માછીમારોને દરિયો ન ખેડવા સૂચના
રાજ્યમાં આવતીકાલથી 3 દિવસ સુધી વરસાદી માહોલ રહેશે
રાજ્યમાં હવામાન વિભાગ દ્વારા ફરી એકવાર કમોસમી વરસાદની આગાહી કરવામાં આવી છે. તારીખ 20 થી 22મી જાન્યુઆરીએ રાજ્યના અનેક વિસ્તારોમાં કમોસમી વરસાદ પડશે. જેના કારણે જગતનો તાત ફરીથી મુશ્કેલીમાં મૂકાયો છે. હવામાન વિભાગના સુત્રોના જણાવ્યા અનુસાર વાતાવરણમાં સર્જાયેલા વેસ્ટર્ન ડિસ્ટર્બનસની અસરને પગલે રાજ્યના અનેક વિસ્તારોમાં કમોસમી વરસાદ પડશે.જેના કારણે ખેડૂતોએ સાવચેત રહેવા સૂચન આપી દેવામાં આવ્યું છે.
20 થી 22 જાન્યુઆરી સુધી માવઠું પડશે
આગાહીની વાત કરીએ તો સમગ્ર રાજ્યમાં 20 થી 22 જાન્યુઆરી સુધી કમોસમી વરસાદ પડશે. જેમાં 20 જાન્યુઆરીએ બનાસકાંઠા, પાટણ, કચ્છ, 21 જાન્યુઆરીએ અરવલ્લી, બનાસકાંઠા, પાટણ, સાબરકાંઠા, જૂનાગઢ, મોરબી, જામનગર, અને 22 જાન્યુઆરીએ દાહોદ, પંચમહાલ, વડોદરા, ભરૂચ, છોટા ઉદેપુરમાં કમોસમી વરસાદ પડવાની શક્યતાઓ છે.
ત્રણ દિવસ માછીમારોને દરિયો ન ખેડવા સૂચના
બીજી તરફ હવામાન વિભાગે ખાસ દ્વારકાને લઇને એલર્ટ જાહેર કર્યુ છે. હવામાન વિભાગે જણાવ્યુ છે કે આગામી દિવસોમાં ઓખા અને સલાયા બંદરો પર ભારે પવન ફૂંકાવાની શક્યતા છે. તેમજ દરિયાઇ પટ્ટીમાં 40 થી 60 કિમીની ઝડપે પવન ફૂંકાવાની આગાહી કરી છે. જેને લઇને માછીમાર ભાઇઓ બહેનોએ કાંઠા વિસ્તાર છોડીને અન્ય સ્થળે ચાલ્યા જવાની સૂચના આપવામાં આવી છે.