હોય નહિ ! / સુરતના વેપારીને ત્યાં આવેલા પાર્સલમાં કઈક એવું તો નીકળ્યું કે જાણીને તમે પણ ચક્કર ખાઈ જશો

• સુરતમાં એક કારખાનેદારને ઘરે આવ્યા પાર્સલ 
• પાર્સલમાંથી નીકળ્યો લાખથી વધુની કિમતનો દારુ
• દિલ્હીની કુરિયર કંપની સામે પોલીસ તપાસ શરુ  

ગુજરાતમાં દારુ અંગેનો કાયદો એવો કડક છે કે કાચા-પોચાના તો મોતિયા જ મરી જાય છે.આવા સંજોગોમાં  સુરતમાં એક કારખાનેદારના ઘરે મસમોટા 4 જેટલા  પાર્સલ આવ્યા અને પાર્સલ ખોલતા જ  કારખાનેદારની આંખો પોતાની જાત પર વિશ્વાસ ના કરી શકી. મસમોટા ચાર પાર્સલમાંથી રૂપિયા 1.31 લાખની કિમતની 96 જેટલી વિદેશી દારૂની બોટલ નીકળી હતી.

મસમોટા ચાર પાર્સલમાં 96 બોટલ દારુ 

સુરતની ઘટના જ એવી છે કે, હવે તમારે ત્યાં કોઈ પાર્સલ આવે તો જરા સંભાળજો તેમ કહેવું પડે છે. સુરતના ભટારમાં વિસ્તારમાં રહેતા એક કારખાનેદારના ઘરે દિલ્હીની માર્ક્સ એક્સપ્રેસ કુરિયર કંપનીનાચાર પાર્સલ આવ્યા હતા.કારખાનેદારને એમ કે, દીપાવલીના તહેવારોમાં કોઈએ કુરીયરથી ગિફ્ટ મોકલી હશે. આમ સમજીને તેમણે પાર્સલ ખોલવા શરુ કર્યા. જેમ એક પછી એક પાર્સલ ખોલવા લાગ્યા ત્યાં તેમની આંખો આશ્ચર્યથી વિસ્ફારિત થઇ ગઈ. ચાર પાર્સલમાં મળીને 96 જેટલી વિદેશી દારૂની બ્રાન્ડેડ બોટલ નીકળી હતી.જેની અંદાજીત કિમત રૂપિયા 1.31 લાખ જેટલી થવા જાય છે.

પોલીસ શોધે છે કોનું છે આ કૃત્ય 

કારખાનેદાર દંપતીએ તુરંત જ સ્થાનિક પોલીસને આખી ઘટનાનું વર્ણન કરતા પોલીસ આવી ચઢી હતી અને મુદામાલ કબજે કર્યો હતો.સાથોસાથ દિલ્હીની એ પાર્સલ ઓફિસમાં પણ તપાસ આદરી છે જ્યાંથી આ પાર્સલનો જથ્થો રવાના કરાયો હતો. હવે આ પાર્સલ કોણે મોકલ્યા છે તે અંગે પોલીસે તપાસ હાથ ધરી છે.