સીમા પર બંને પાડોશી દેશો સાથે વધતાં તણાવને પગલે ભારતીય સેનાએ એક મહત્વપૂર્ણ નિર્ણય લીધો છે, જેનાથી સેનાની ક્ષમતામાં વધારો તો થશે જ સાથે જ બોર્ડર પરની કાર્યક્ષમતામાં પણ વધારો થવાનું જણાઈ રહયું છે.
ચીન અને પાકિસ્તાન સાથે વધી રહ્યો છે બોર્ડર પર તણાવ
ભારતીય સેનાનું કરવામાં આવશે પુનર્ગઠન
2022 સુધીમાં પાંચ કમાન્ડમાં વહેંચવામાં આવશે
2022 સુધીમાં ભારતીય સૈન્યને પાંચ થિયેટર કમાન્ડ માં પુનર્ગઠન કરવાનું આયોજન છે. આ થિયેટર કમાન્ડ વિશેષ નિર્ધારિત ક્ષેત્રોના આધારે બનાવવામાં આવશે. પાકિસ્તાન અને ચીન ને લગતી સીમા માટે અલગ કમાન્ડ બનાવવામાં આવશે.
આવી રીતે હશે થિયેટર કમાન્ડ
એવું કહેવામાં આવી રહ્યું છે કે થિયેટર કમાન્ડ ના વિભાજન પછી ભારતીય સેના તેના લક્ષ્ય પર વધુ ધ્યાન કેન્દ્રિત કરી શકશે. દરેક કમાન્ડ માટે વિશેષ ફોકસ ક્ષેત્ર હશે.મોદી સરકારે CDS બિપિનસિંહ રાવતને થિયેટર કમાન્ડ બનાવવા માટેનો સંકેત આપ્યો છે. ચીન અને અમેરિકા જેવા દેશોમાં થિયેટર કમાન્ડ ની સિસ્ટમ પહેલેથી જ અસ્તિત્વમાં છે.
આવી રીતે વહેંચાયા કમાન્ડ
ઉત્તરીય થિયેટર કમાન્ડ લદ્દાખના કારાકોરમ પાસથી અરુણાચલ પ્રદેશની છેલ્લી પોસ્ટ કિબીથુ સુધીની જવાબદારી સંભાળશે. તેનું મુખ્ય મથક લખનઉમાં હશે. આ થિયેટર કમાન્ડ ચીન સાથેની સરહદ માટે હશે. તે જ સમયે, વેસ્ટર્ન કમાન્ડ પાકિસ્તાન સાથેની સરહદો પર પોતાનું ધ્યાન કેન્દ્રિત રાખશે. તેનું મુખ્ય મથક જયપુરમાં રહેશે. ત્રીજો થિયેટર કમાન્ડ તિરુવનંતપુરમમાં આધારિત હોઈ શકે છે. ચોથી કમાન્ડ એર ડિફેન્સ કમાન્ડ અને પાંચમી નેવી કમાન્ડ હશે.
આર્મી ચીફ જનરલ એમ.એમ. આર્મી ચીફ જનરલ મનોજ મુકુંદ નરવણે ગયા અઠવાડિયે કહ્યું હતું કે, ચીફ ઓફ ડિફેન્સ સ્ટાફ CDS ની નિમણૂક પછી લશ્કરી સુધારાઓનું આગળનું પગલું યુદ્ધ અને શાંતિ દરમિયાન આર્મીની ત્રણ પાંખની ક્ષમતાઓને સંકલન કરવા માટે એકીકૃત થિયેટર કમાન્ડ છે. જનરલ નરવણે એમ પણ કહ્યું હતું કે થિયેટર કમાન્ડ ગોઠવવાની પ્રક્રિયા 'ઇરાદાપૂર્વક' હશે અને પરિણામ મેળવવા માટે થોડા વર્ષોનો સમય લાગશે.
થિયેટર કમાન્ડ માં બધી સેનાના એકમ હશે
થિયેટર કમાન્ડ ની સ્થાપના એ સંયુક્ત લશ્કરી અભિગમ સાથે સામુહિક કમાન્ડર હેઠળ સેનાની ત્રણેય પાંખમાંથી ચોક્કસ સંખ્યામાં કર્મચારીઓને લાવીને માનવ શક્તિ અને સંસાધનોને તર્કસંગત બનાવવાનો છે. યોજના મુજબ, દરેક થિયેટર કમાન્ડમાં આર્મી, એરફોર્સ અને નેવીના એકમો હશે અને તે બધા ચોક્કસ ભૌગોલિક ક્ષેત્રમાં સુરક્ષા પડકારોનો સામનો કરવા કમાન્ડર હેઠળ કામ કરશે. હાલમાં આર્મી, એરફોર્સ અને નેવીની અલગ કમાન્ડ છે.