મોટી ટકોર / ઢોર માટે પુરતી જગ્યા રાખવાની જવાબદારી ઢોર માલિકની, ઢોરને રસ્તા પર રખડતા ના મુકી શકાયઃ ગુજરાત હાઈકોર્ટ

• ઢોર નિયંત્રણ કાયદા વિરુદ્વ જાહેર હિતની અરજી HCએ ફગાવી
• ઢોર માટે પુરતી જગ્યા રાખવાની જવાબદારી ઢોર માલિકનીઃ HC
• ઢોરને રસ્તા પર રખડતા ના મુકી શકાયઃ HC

ઢોર નિયંત્રણ કાયદા વિરુદ્વ જાહેર હિતની અરજી HCએ ફગાવી

ઢોર નિયંત્રણ વિધેયક મુદ્દે થયેલી જાહેરહિતની અરજી ગુજરાત હાઈકોર્ટે ફગાવી દીધી હતી.જાહેરહિતની અરજી પર ગુજરાત હાઇકોર્ટે ટકોર  કરી હતી. હાઇકોર્ટે કહ્યું કે પશુની જવાબદારી પશુપાલકની છે. ગૌચરની વૈકલ્પિક જગ્યા આપવાની માંગને પણ કોર્ટે ફગાવી હતી.

ઢોર માટે પુરતી જગ્યા રાખવાની જવાબદારી ઢોર માલિકનીઃ HC

મહત્વનું છે કે, શહેરી વિસ્તારની આસપાસ માલધારીઓને ગૌચરની વૈક્લ્પિક જગ્યા આપવામાં આવે તેવી અરજદારની માંગણીને હાઈકોર્ટે ફગાવી દીધી છે. કૉર્ટે પોતાના ચુકાદામાં નોંધ્યું કે પોતાના ઢોરની તકેદારી રાખવાની જવાબદારી પશુ માલિકોની છે.  ઢોર માટે પૂરતી જગ્યા રાખવાની જવાબદારી પણ ઢોર માલિકની હોવાનું હાઈકોર્ટે નોંધ્યું હતું. 

`પશુ માટે જગ્યા રાખવાની જવાબદારી માલિકની': HC

શહેરી વિસ્તારમાં ઢોર રાખી અને તેને રસ્તે રઝળતા મૂકવાની છૂટ પશુમાલિકોને આપી શકાય નહીં.  અબોલ પશુઓને રઝળતા મૂકી ઢોર માલિકો પોતાની સામાજિક અને નૈતિક જવાબદારીમાંથી છટકવા માંગે તે ચલાવી શકાય નહીં. તેમજ રઝળતા પશુ પકડાય તો એ માટે થતા દંડની રકમ ઘટાડવા માટે સક્ષમ સત્તા મંડળ સમક્ષ રજૂઆત કરવાની કૉર્ટે છૂટ આપી છે. 

આગામી વિધાનસભાના સત્રમાં કાયદો રદ્દ કરાશે-સી.આર.પાટીલ

બીજી તરફ આજે રખડતા ઢોર નિયંત્રણ કાયદા મુદ્દે ભાજપ પ્રદેશ પ્રમુખ સી.આર.પાટીલે પત્રકાર પરિષદ યોજી હતી. જેમાં તેઓએ જણાવ્યું હતું કે,  આગામી વિધાનસભાના સત્રમાં કાયદો રદ્દ કરાશે. વિધાનસભા સત્ર પૂર્ણ થઇ ચૂક્યું છે, જેથી  કાયદો હાલમાં સ્થગિત કરાયો છે. માલધારી સમાજના લોકોએ અમને રજૂઆત કરી હતી. મુખ્યમંત્રીએ ખૂબ સકારાત્મક પ્રત્યુતર આપ્યો હતો. મુખ્યમંત્રીએ ખૂબ સકારાત્મક પ્રત્યુતર આપ્યો હતો. મેં મુખ્યમંત્રી સાથે પણ ચર્ચા કરી છે. વધુમાં પાટીલે કહ્યું કે, ગુજરાતનાં લોકોને ગાય રાખવા માટે લાયસન્સ લેવું પડે તે યોગ્ય નથી અને દંડ હજારો રૂપિયા આપવો પડે તે પણ યોગ્ય નથી, મેં મુખ્યમંત્રીને રજૂઆત કરી છે.