ગાંધીનગર / ગુજરાતીઓના આરોગ્ય સાથે હવે નહીં થાય ચેડા, સરકારે આ સુવિધાનો કર્યો પ્રારંભ 

• રાજ્યના દરેક જીલ્લામાં ફુડ ટેસ્ટિંગ ઓન વ્હીલ કાર્યરત  રહેશે 
• રાજ્યમાં કુલ 22 ફુડ ટેસ્ટિંગ મોબાઈલ લેબોરેટરી વાન કાર્યરત બની 
• ખાદ્યપદાર્થની તમામ ચકાસણી સ્થળ ઉપર જ કરાશે

આરોગ્ય મંત્રી ઋષિકેશભાઇ પટેલે જણાવ્યું છે કે,રાજ્યના નાગરિકોને જીવનજરૂરી ખાદ્ય ચીજવસ્તુઓનો જથ્થો શુદ્ધ અને ગુણવત્તાયુક્ત મળી રહે તે માટે રાજ્યના દરેક જિલ્લામાં સેફ્ટી ઓન વ્હીલ કાર્યરત કરાવવા રાજ્ય સરકાર કટીબદ્ધ છે. જેના ભાગરૂપે  આજે ગાંધીનગર ખાતે કેન્દ્ર સરકાર પુરસ્કૃત વધુ 13 મોબાઈલ ફૂડ ટેસ્ટિંગ વાનને લીલી ઝંડી આપી પ્રસ્થાન કરવામાં આવી છે. 

જો નમુનો ભેળસેળયુક્ત પુરવાર થશે તો તેની સામે કાયદાકીય રીતે કડક પગલા લેવાશે 

આ અંગે આરોગ્યમંત્રીએ વધુ કહ્યું કે, નાગરીકોને અશુદ્ધ અને ભેળસેળ વાળો ખાદ્ય પદાર્થ ન લેવો પડે તે માટે આ મોબાઈલ વાન વિવિધ જિલ્લાઓમાં કાર્યરત કરાવવામાં આવશે. નાગરીકો સામેથી ટેસ્ટિંગ માટે ખાદ્ય પદાર્થ લઈને આવશે તો તેનું વિનામુલ્યે પણ ટેસ્ટિંગ કરી આપવામાં આવશે. જો નમુનો ભેળસેળયુક્ત પુરવાર થશે તો સામેથી સેમ્પલ લઈને તેની સામે કાયદાકીય રીતે કડક પગલા લેવાશે.

મોબાઈલ વાન રાજ્યભરમાં પરિભ્રમણ કરી જનજાગૃતિ કેળવાશે 

તેમણે ઉમેર્યુ કે,તત્કાલીન મુખ્યમંત્રી નરેન્દ્રભાઇ મોદી દ્વારા રાજ્યના નાગરિકોના સ્વાસ્થ્યની દરકાર કરીને 2013 માં બે ફુડ સેફ્ટિ વાન કાર્યરત કરાવવામાં આવી હતી. અદ્યતન ટેક્નોલોજી ધરાવતા કોમ્પ્યુટરાઈઝડ સાધનો દ્વારા ખાદ્યચીજોની ચકાસણી માટે રાજ્ય સરકાર દ્વારા કરાયેલ શ્રેષ્ઠ કામગીરીને પરીણામે કેન્દ્રીય આરોગ્ય મંત્રી મનસુખભાઇ માંડવિયા દ્વારા ગુજરાતને નવી 13 મોબાઈલ વાન વિનામુલ્યે પૂરી પાડવામાં આવી છે. જેનું રાજ્યભરમાં પરિભ્રમણ કરાવીને ખાદ્ય પદાર્થોની ગુણવત્તા સંદર્ભે જનજાગૃતિ કેળવાશે.  
     
 

ખાદ્યપદાર્થની તમામ ચકાસણી સ્થળ ઉપર જ કરાશે

ઋષિકેશ પટેલે ઉમેર્યું કે, આ મોબાઈલ વાન અદ્યતન ટેક્નોલોજીયુક્ત સાધનોથી સુસજ્જ છે. આ સાધનો દ્વારા સ્થળ પર જ નમુનાનું પરીક્ષણ થઈ શકે તે માટે મિલ્ક ટેસ્ટિંગ  મશીન દ્વારા ટેસ્ટિંગ કરી દૂધમાં ફેટ, એસ.એન.એફ., પ્રોટીન તથા એમોનીયમ સલ્ફેટ, સુક્રોઝ, વોટર મોલ્ટોડ્રેક્સ્ટ્રીન, યુરીયા જેવા કેમિકલ્સ શોધી શકાશે ઉપરાંત ખાદ્યતેલ કે જેમાં વારંવાર ખાદ્યચીજોના તેલને ચકાસવા માટેનું મશીન પણ આ વાનમાં છે. આ ઉપરાંત પેકિંગમાં મળતાં પીવાનાં પાણીમાં TDSની માત્રા સહીતની તમામ ચકાસણી સ્થળ ઉપર જ કરાશે. અને જે નમુનો ભેળસેળ યુક્ત ઠરે તો તેની સામે કાયદાકીય રીતે કડક પગલાં લેવાશે.