VTV વિશેષ / અમેરિકાની ચૂંટણી અને રાજનીતિમાં ભારતીયો કેમ મહત્વના, જાણો 25 વર્ષનું આ ખાસ વિશ્લેષણ

કમલા હેરિસના માતા શ્યામલા ગોપાલન તામિલનાડુના હતા જેઓએ બ્રેસ્ટ કેન્સર ઉપર રિસર્ચ કર્યું હતું. આજે કમલા હેરિસ ઉપરાષ્ટ્રપતિને રેસમાં છે જે દર્શાવે છે કે રાજકીય અને ઉદ્યોગ દ્રષ્ટિએ ભારતીય અમેરિકનોએ કેટલી હરણફાળ ભરી છે.

કાયદાના ક્ષેત્રમાં કામગીરી આદરી હતી કમલા હેરિસે

કેલિફોર્નિયામાં જન્મેલા કમલા હેરિસે તેમની કારકિર્દીની શરૂઆત અલમેડા કાઉન્ટીના ડિસ્ટ્રિક્ટ એટર્ની તરીકે 1990માં કરી. 2004માં હેરિસ સેન ફ્રાન્સિસ્કોના ડિસ્ટ્રિક્ટ એટર્ની બન્યા અને ત્યાર બાદ તેઓ 2010માં સમગ્ર કેલિફોર્નિયા રાજ્યના એટર્ની જનરલ બન્યા. તેઓ 2016માં USના સેનેટમાં ચૂંટાયા. આ પછીના જ વર્ષે અમેરિકાના હાઉસ ઓફ રિપ્રેઝન્ટેટિવમાં 4 વધુ ભારતીય અમેરિકનો ચૂંટાયા. 

આ જ સમયગાળામાં ભારતીય મૂળના બે અન્ય નેતાઓ બોબી જિંદાલ અને નિક્કી હેલીએ લુઇઝિયાનાના અને સાઉથ કેરોલિનાના ગવર્નર તરીકે ફરજ બજાવી. નોંધનીય છે કે 1995 સુધી અમેરિકામાં ભારતીય મૂળના ફક્ત 1 ચૂંટાયેલા નેતા હતા જયારે 2020માં ભારતીય મૂળના 10 નેતાઓ ચૂંટાઈને ફરજ બજાવી રહ્યા છે. આમ ભારતીયોની ઇન્ફ્લુઅન્સ અમેરિકાના રાજકારણ ઉપર વધી રહી છે. 

આંકડાકીય રીતે જોઈએ તો 1980ના ગાળાની સરખામણીમાં ભારતીય અમેરિકાનોની સંખ્યા 10ગણી થઇ ગઈ છે. 1980માં 3 લાખ ભારતીય અમેરિકનોની સામે 2010ના આંકડા પ્રમાણે 31 લાખ કરતા વધુ ભારતીય અમેરિકનો USAમાં રહે છે. 

આ કારણે ભારતીય અમેરિકનો છે ટોચના ધનાઢ્ય સમુદાયોમાંથી એક

ભારતીયો અમેરિકામાં મેડિસિન, સાયન્સ, એન્જિન્યરિંગ, ટેક્નોલોજી અને મેથેમેટિક્સને લગતા ક્ષેત્રોમાં અગ્રેસર છે. આ ઉપરાંત ખાસ કરીને આપણા પટેલ સમાજે હોટલ ઇન્ડસ્ટ્રીમાં વર્ચસ્વ જમાવ્યું છે. આ કારણે ભારતીય અમેરિકન સમાજ અમેરિકાના આર્થિક રીતે સૌથી સુખી સમુદાયમાંથી એક છે. તેઓ અમેરિકાની વસ્તીના ફક્ત 1% છે પરંતુ તેઓ સિલિકોન વેલીના ત્રીજા ભાગના સ્ટાર્ટ અપ માટે જવાબદાર છે. આ ઉપરાંત અમેરિકાની કુલ હાઈ ટેક્નોલોજી કંપનીના 8% કંપનીઓ ભારતીય અમેરિકન્સ દ્વારા શરુ કરવામાં આવી છે. અમેરિકામાં શરુ થયેલી ફોર્ચ્યુન 500 કંપનીઓની 2% કંપનીઓ ભારતીયોના નેતૃત્વ હેઠળ છે જેમાં મુખ્યત્વે ગૂગલ (સુંદર પીચાઈ), માઈક્રોસોફ્ટ (સત્યા નાદેલા), IBM (અરવિંદ ક્રિષ્ના)નો સમાવેશ થાય છે. અમેરિકામાં દર 7 ડોક્ટરે એક ભારતીય ડોક્ટર છે. ડોનાલ્ડ ટ્રમ્પના ટોચના ડોક્ટર સીમા વર્મા છે. એવું માનવામાં આવે છે કે અમેરિકાની કુલ મોટેલમાંથી અડધી મોટેલ ભારતીયોની માલિકી હેઠળની છે. 

આ ઉપરાંત અમેરિકામાં કલ્પન મોદી (કાલ પેન), અઝીઝ અન્સારી, મીંડી કલિંગ જેવા અભિનેતાઓ પણ પોતાનું પરફોર્મન્સ આપી રહ્યા છે. આવા ટોચના ક્ષેત્રોમાં હોવાને કારણે ભારતીય અમેરિકનો સૌથી ધનાઢ્ય સમુદાયમાંથી એક છે. આજે ભારતીય અમેરિકન ઘરની સરેરાશ વાર્ષિક આવક 90711 ડોલર છે. જયારે એશિયન અમેરિકન ઘરની સરેરાશ વાર્ષિક આવક 67022 ડોલર છે.