એક તરફ સરકારની નીતિઓ અને વિવિધ કામોથી શિક્ષકો પરેશાન છે. પોતાની માગોને લઈને ધરણા કરી રહ્યા છે. માનસિક ત્રાસ અનુભવી રહ્યા છે. પરંતુ એક એવી પણ શાળા છે. જેના શિક્ષકો આવી તકલીફો વચ્ચે પણ ભાવી પેઢીને આગળ વધારવા મહેનત કરી રહ્યા છે. બદલાતા સમય સાથે તાલ મિલાવી વિદ્યાર્થીઓને અપડેટ રાખવા કમરકસી રહ્યા છે.
કઈ છે આ શાળા અને કેવી રીતે ત્યાંના શિક્ષકો વિદ્યાર્થીઓને કરે છે અપડેટ?
આ શાળા આપશે ટક્કર!
પ્રથમનજરે જ આકર્ષી જાય તેવું શાળાનું મકાન છે. જ્ઞાનવર્ધક ચિત્રોથી સજાવેલી દીવાલો છે અને ગણિતના પાયાના ખ્યાલો શીખવતા પગથિયા પરના ચિત્રો છે. આ ફૂલડાં જેવા વિદ્યાર્થીઓ અને ડિજિટલ સિસ્ટમથી સજ્જ આ ક્લાસરૂમ છે. કોઈને પણ અહીં ભણવા માટે આકર્ષી લેતી આ શાળા જૂનાગઢ જિલ્લામાં આવેલા વંથલી તાલુકાના શાપુર ગામની સરકારી પ્રાથમિક શાળા છે. એટલે જ તો વંથલી તાલુકાના અનેક વાલીઓ પોતાના બાળકોને ખાનગી શાળામાં મોકલવાના બદલે શાપુરગામે આવેલી આ પ્રાથમિક શાળામાં ભણવા મોકલી રહ્યા છે.
આ શાળાની ખાસિયત માત્ર તેનું આકર્ષક બિલ્ડિંગ જ નથી પરંતુ અહીંનું શિક્ષણભોગ્ય વાતાવરણ પણ વિદ્યાર્થીઓ અને વાલીઓને આકર્ષી રહ્યું છે. આ શાળાના આચાર્ય અને શિક્ષકો અહીં માત્ર નોકરી નથી કરી રહ્યા પરંતુ તેઓ સાચા અર્થમાં પોતાનો જ્ઞાનધર્મ નિભાવી રહ્યા છે. એટલે જ તો આ ગામના અગ્રણીઓ પણ શાળા અને કર્મચારીઓના પ્રયાસોથી સંતુષ્ટ અને રાજી છે. જો સરકારી શાળા આવી હોય તો પછી બાળકોને શા માટે ખાનગી શાળામાં મૂકવા જોઈએ?
આ શાળાના ટેક્નોસેવી શિક્ષકોએ માગણી કરતાં આ શાળાને પણ જ્ઞાનકુંજ પ્રોજેક્ટ હેઠળ આવરી લેવામાં આવી છે. શાળા બે વર્ગખંડો અદ્યતન જ્ઞાનકુંજ પ્રોજેક્ટ હેઠળ બનાવવામાં આવ્યા છે. આ બન્ને વર્ગખંડોમાં ઈ-કન્ટેન્ટ સોફ્ટવેર રીડ ટુ મી સોફ્ટવેર ઈન્ટેલ ઈસ્પેસ અને ડિજિટલ પેન તેમજ સ્પિકર સાથેની માઈક સિસ્ટમ દ્વારા ભણાવવામાં આવે છે. આ ક્લાસરૂમના સ્ટડી બોર્ડ ઈન્ટરએક્ટ ટચથી સજ્જ છે. જેમાં ડિજિટલ પેનથી લખવામાં આવે છે. એટલું જ નહીં આ સોફ્ટવેરથી કોઈપણ પ્રકારના સ્ટડી ટુલ્સ ઓનલાઈન જ મળી રહે છે. બાળકોને ભણવામાં અને શિક્ષકોને શીખવવામાં ખૂબ રસ પડે છે. આ રીતે ડિજિટલ શિક્ષણ વંથલીની બીજી ખાનગી સ્કૂલોમાં પણ આપવામાં આવતું નથી એક માત્ર વંથલીની પે સેન્ટર સાપુર શાળામાં જ ડિજિટલ શિક્ષણ આપવામાં આવે છે. તાલુકા મથક વંથલીથી પણ અનેક વિદ્યાર્થી આ ડિજિટલ ક્લાસરૂમથી આકર્ષાઈને અહીં સાપુર ગામ સુધી ભણવા આવે છે.
સૌ ભણે સૌ આગળ વધે એ ધ્યેયને વરેલી આ શાપુર પ્રાથમિક શાળામાં વિદ્યાર્થીઓ પણ ભણવા હોંશે હોંશે આવે છે. ડિજિટલ શિક્ષણની શરૂઆત કરતા વિદ્યાર્થીઓને શીખવામાં સરળતા થઈ ગઈ છે. તમામ વિષયોનો અભ્યાસ લેપટોપ અને પ્રોજેક્ટથી કરાવવામાં આવતાં વિદ્યાર્થીઓને ખૂબ ફાયદો થયો છે.
રાજ્યના તમામ ગામોમાં શાપુર ગામ જેવી અદ્યતન શાળા બનાવવામાં આવે તો ગરીબ બાળકો તેનો લાભ લઈ શકે અને પ્રાઇવેટ સ્કૂલો ઉપર અંકુશ મેળળી શકાય. તે સાથે સૌને મફતમાં શિક્ષણ આપવાના સરકારનો ઉદેશ્ય પણ સાર્થક થઈ શકે.