BIG NEWS / આનંદો ! 2 વર્ષ પછી, 'ફરવાના' દિવસ પાછા આવ્યા: આ તારીખે શરૂ થશે નિયમિત આંતરરાષ્ટ્રીય ફ્લાઇટ્સ

• ઉડ્ડયન ઉદ્યોગ માટે કોરોનાનો ખરાબ તબક્કો આખરે 2 વર્ષ પછી સમાપ્ત થયો
• સરકારે 27 માર્ચથી સુનિશ્ચિત આંતરરાષ્ટ્રીય ફ્લાઇટ સેવાઓ ફરી શરૂ કરવાનો નિર્ણય લીધો છે
• કોવિડ-19 મહામારીને કારણે લગભગ બે વર્ષથી આંતરરાષ્ટ્રીય ફ્લાઇટ્સ બંધ છે.

ઉડ્ડયન ઉદ્યોગ માટે કોરોનાના ખરાબ તબક્કાનો આખરે 2 વર્ષ બાદ અંત આવી રહ્યો છે. સરકારે 27 માર્ચથી સુનિશ્ચિત આંતરરાષ્ટ્રીય ફ્લાઇટ સેવાઓ ફરી શરૂ કરવાનો નિર્ણય લીધો છે. કોવિડ-19 મહામારીને કારણે લગભગ બે વર્ષથી આંતરરાષ્ટ્રીય ફ્લાઇટ્સ બંધ છે. નાગરિક ઉડ્ડયન મંત્રાલયના અધિકારીઓએ મંગળવારે આ માહિતી આપી.મહત્વનું છે કે, દેશમાં સુનિશ્ચિત આંતરરાષ્ટ્રીય ફ્લાઇટ સેવાઓ 23 માર્ચ, 2020 થી સ્થગિત કરવામાં આવી હતી. જો કે, જુલાઈ 2020 થી, લગભગ 35 દેશો સાથે 'એર બબલ' વ્યવસ્થા હેઠળ આંતરરાષ્ટ્રીય ફ્લાઇટ્સ ભારતમાંથી કાર્યરત છે.

Scheduled international flight services to resume from March 27 after two years: Aviation ministry officials

— Press Trust of India (@PTI_News) March 8, 2022

સરકારના નિર્ણયથી ઉડ્ડયન ઉદ્યોગ જગત ખુશ છે

સરકારના આ નિર્ણય માટે નાગરિક ઉડ્ડયન મંત્રીનો આભાર માનતા, એસટીઆઈસી ટ્રાવેલ ગ્રુપ અને કોન્ફેડરેશન ઓફ ટુરીઝમ પ્રોફેશનલ્સના પ્રમુખે જણાવ્યું કે, સરકારનો આ  ખૂબ જ સારો નિર્ણય છે. મહત્વનું છે કે, ફ્લાઈટ્સ બંધ હોવાથી નાના ટુર ઓપરેટરો કોરોના પછી સૌથી વધુ પરેશાન હતા. ત્યારે સરકારના આ સાથે નાના સ્થળો પર વિમાનોની અવરજવર ફરી શરૂ થશે. તેમજ આ નિર્ણયથી દેશની અર્થવ્યવસ્થાને મોટો વેગ મળશે.

કોરોના સંકટથી 25 લાખ નોકરીઓ ખતમ થઈ ગઈ

છેલ્લા બે વર્ષમાં કોરોના અને લોકડાઉનના કારણે આ ઉદ્યોગમાં કામ કરતા 25 લાખ લોકોએ પોતાની નોકરી ગુમાવી છે. ઈન્ટરનેશનલ ફ્લાઈટ્સ શરૂ ન થવાને કારણે વધુ 10 લાખ લોકોની નોકરી જોખમાઈ રહી છે. નાગરિક ઉડ્ડયન મંત્રાલયના જણાવ્યા અનુસાર, નાણાકીય વર્ષ 2020-21 દરમિયાન કોવિડ-19 મહામારીને કારણે ભારતીય એરલાઇન્સ અને એરપોર્ટને લગભગ 20 હજાર કરોડ રૂપિયાનું નુકસાન થયું છે.તે જ સમયે, એરપોર્ટનું સંચાલન કરતી કંપનીઓને પણ પાંચ હજાર કરોડ રૂપિયાથી વધુનું નુકસાન થયું છે.

ઘણા દેશો વિદેશી પ્રવાસીઓ માટે દ્વાર ખુલ્લા છે

કોરોનાની અસરનો અંત જોઈને વિશ્વના ઘણા દેશોએ તેને વિદેશી પ્રવાસીઓ માટે ખોલી દીધો છે. જેમાં અમેરિકા, ઓસ્ટ્રેલિયા, ન્યુઝીલેન્ડ, ફિલિપાઈન્સ, બાલી, મલેશિયા જેવા દેશોનો સમાવેશ થાય છે. આવી સ્થિતિમાં હવે વિદેશી પ્રવાસીઓ માટે ભારત ખોલવાની માંગ ઉઠી છે. જો કે, આ માટે જરૂરી છે કે પ્રથમ આંતરરાષ્ટ્રીય ફ્લાઇટ્સ શરૂ કરવામાં આવે.

આંતરરાષ્ટ્રીય ફ્લાઇટ્સ બંધ થવાને કારણે 60 થી 65 અબજ ડોલરનું નુકસાન
 
ઉલ્લેખનીય છે કે, સરકારના કુલ ટેક્સ કલેક્શનમાં ટ્રાવેલ અને હોસ્પિટાલિટીનો ફાળો લગભગ 10% છે. 2019ની વાત કરીએ તો, ટ્રાવેલ અને હોસ્પિટાલિટી ઉદ્યોગે એકલા વિદેશી પ્રવાસીઓ પાસેથી 30 બિલિયન ડોલરની કમાણી કરી હતી. કોવિડ પહેલા એટલે કે 2019 માં, લગભગ 25 મિલિયન ભારતીયો વિદેશમાં ફરવા ગયા હતા.તે જ સમયે 11 મિલિયન વિદેશીઓ ભારતમાં આવ્યા હતા. આ રીતે, છેલ્લા બે વર્ષમાં આંતરરાષ્ટ્રીય ફ્લાઇટ્સ બંધ થવાને કારણે લગભગ 60 થી 65 અબજ ડોલરનું નુકસાન થયું છે.