ઓનલાઈન / યુવતીને ‘ક્વીકર જોબ’ એપ પર રિઝ્યૂમ અપલોડ કરવું ભારે પડ્યું

તમે નોકરીની શોધમાં છો? તો ઓનલાઇન નોકરી માટે તમારો રિઝ્યૂમ અપલોડ કરતાં પહેલાં એક વખત વિચારજો, કારણ કે થલતેજમાં રહેતી યુવતીને નોકરી માટે ક્વીકર જોબ નામની એપ્લિકેશન પર રિઝ્યૂમ અપલોડ કરવાનું ભારે પડ્યું છે. ઠગ ટોળકીએ નોકરી આપવાના બહાને અલગ અલગ રૂપિયા ભરાવી યુવતી પાસેથી ૧.૬૪ લાખ રૂપિયા પડાવી લીધા હોવાનો કિસ્સો સામે આવ્યો છે.

થલતેજમાં રહેતી યુવતીએ સોલા પોલીસ મથકમાં ફરિયાદ નોંધાવી છે. યુવતી હાલ કોઈ કામ કરતી ન હોવાથી તે નોકરીની શોધ કરતી હતી. થોડા દિવસ પહેલાં તેને નોકરી માટેની ક્વીકર જોબ નામની એપ્લિકેશન પર તેનો રિઝ્યૂમ અપલોડ કર્યો હતો.

જે બાદ અજાણ્યા નંબર પરથી યુવતીને નોકરી માટે ફોન આવ્યો હતો અને ફોન કરનારે કહ્યું કે તમે નોકરી માટે તમારો ‌રીઝ્યૂમ અપલોડ કર્યો છે. તો હું તમને ઈ-મેઇલ આઇડી આપું છું તેના પર તમારો રિઝ્યૂમ અપલોડ કરો. ફોન કરનારે આમ કહેતાં યુવતીએ રિઝ્યૂમ મોકલી આપ્યા બાદ એક યુવતીએ તેણીને  ફોન કરી કહ્યું કે, તમારી એક્ઝામ લેવાની છે, જેથી તમારે હજાર રૂપિયા ભરવાના રહેશે. ત્યારબાદ યુવતીએ હજાર ભરતાં તેના ઈ-મેઈલ પર એક એક્ઝામ પેપર પણ આવ્યું. જે પેપર પૂર્ણ કરી તેમણે તેની સાથે પોતાના કેટલાક ડોક્યુમેન્ટ પણ મોકલી આપ્યા હતા.

થોડા સમય પછી યુવતી પર ફોન આવ્યો હતો કે, તમને એચડીએફસી બેન્કમાં નોકરી મળી છે, જેનો એનઓસી લેટર મેળવવા માટે તમારે રૂપિયા ૭૫૦૦ ભરવા પડશે. આમ કહેતાં ફોન કરનારે આપેલ બેન્ક એકાઉન્ટમાં યુવતીએ રૂપિયા ભરી દેતાં તેના ઈ-મેઈલ આઈડી પર એક એનઓસી લેટર મોકલી આપ્યો હતો. જે બાદ ટ્રેનિંગ લેટર માટે રૂપિયા ૩૦ હજાર, અને પછી અલગ અલગ બહાનાં બનાવી યુવતી પાસેથી 1.64 લાખ રૂપિયા પડાવી લીધા.