ભારતમાં ડેટિંગ એપ્સ યુવાનોમાં ખૂબ પોપ્યુલર થઈ છે. જોકે ડેટિંગ એપ અને સાઇટ્સ ફ્રોડનું પણ પ્લેટફોર્મ બન્યા છે. થોડા દિવસો પહેલા ફિલ્મ ડ્રીમ ગર્લ રિલીઝ થઈ હતી, જેમાં ડેટિંગ અને ચેટિંગના નામે ચાલતા કૌભાંડની વાત છે.તમને જાણીને આશ્ચર્ય થશે કે ઓનલાઇન ડેટિંગના નામે જબરદસ્ત રેકેટ ચાલી રહ્યું છે.
જે લોકો ફેક એપ્લિકેશન અને વેબસાઇટ્સ ચલાવે છે, તેઓ પહેલા મહિલાઓની બનાવટી પ્રોફાઇલ બનાવી અપલોડ કરે છે.યુવાનોને મેમ્બરશીપ લેવા માટે સિલ્વર,ગોલ્ડ અને પ્લેટિનમ ઓફર આપવામાં આવે છે. આ પછી રજિસ્ટ્રેશન માટે એક હજાર રૂપિયાની પણ માંગણી કરવામાં આવે છે.
રજિસ્ટ્રેશન બાદ મેમ્બર્સનો કોન્ટેકટ કરવામાં આવે છે. વાતચીત દરમિયાન યુવકોને ત્રણથી ચાર લાખ રૂપિયા જમા કરાવવા કહેવામાં આવે છે, જેથી તેઓ તેમની પસંદગીની છોકરી સાથે ડેટ પર જઈ શકે. તેમને વચન પણ આપવામાં આવે છે કે તેમના નાણાં પરત કરવામાં આવશે. જો કે, પૈસા જમા કરાવ્યા પછી, યુવતી થોડા સમય માટે સતત વાતો કરે છે અને તે પછી એકાએક કોલ આવતા બંધ થઇ જાય છે.
જ્યારે યુવક પૈસા પાછા માંગે છે, ત્યારે તેમને ફરી રૂપિયા જમા કરાવવા કહેવામાં આવે છે.જો કે, છેતરપિંડીનો ભોગ બનનારને કયારેય પણ પૈસા પાછા મળતા નથી. ફેક ડેટિંગ વેબસાઇટ્સ બનાવનારા લોકો પોલીસથી બચવા માટે સતત તેમની ઓફિસની જગ્યા બદલતા રહે છે. ઉપરાંત આ લોકો ફીચર ફોનનો ઉપયોગ કરે છે. એટલું જ નહીં, સતત સીમ કાર્ડ બદલતા રહે છે. ગત નવેમ્બરમાં એક ઘટના સામે આવી હતી.જેમાં કોલકાતાની રહેવાસી 25 વર્ષીય નિવેદિતાએ હૈદરાબાદના ઘણા છોકરાઓને ડેટિંગ એપથી ફસાવ્યા હતા.
નિવેદિતા અંગ્રેજીમાં અનુસ્નાતક હતી, પરંતુ તે બે વર્ષથી બેકાર હતી. તેને કોઈ મિત્રએ મહિનાના 20 હજાર રૂપિયાની નોકરીની ઓફર કરી ત્યારે તેણે ઘરના લોકોને જાણ કર્યા સિવાય કોલ સેન્ટરમાં કામ કરવાનું શરૂ કર્યું.દિવાળી પહેલા જ વિશાખાપટ્ટનમ પોલીસ અને કોલકાતાના સાયબર ક્રાઇમની ટીમે કોલસેન્ટરમાં દરોડો પાડી 23 મહિલાઓ અને 26 લોકોની ધરપકડ કરી હતી.