કાલોલના બાકરોલ નજીકથી પસાર થતી કરાડ નદીમાં સફેદ ફીણના ગોટેગોટા સર્જાયા છે. હાલોલ GIDCનું પ્રદુષિત પાણી વરસાદી પાણી સાથે નદીમાં આવતા ફીણ બની રહ્યાં છે. છેલ્લા ઘણા વર્ષોથી આ સમસ્યા સર્જાય છે.
ઉલ્લેખનીય છે કે, કેમિકલયુક્ત પાણીને લઈને નદી કાંઠાના આ પાણીનો ઉપયોગ કરતા સ્થાનિકોને ચામડીના રોગ થઇ રહ્યાં છે. તેમજ પાણીમાં રહેલા જળચરને પણ નુકસાન થઇ રહ્યું છે. અનેક વખત રજુઆત કરવામાં આવી છતાં આ સમસ્યાનું નિરાકરણ આવતું નથી.
એક તરફ વરસાદની મોસમ જામી છે અને કેટલાય જળાશયોમાં નવા નીરનું આગમન થઇ રહ્યું છે ત્યારે વરસાદના પાણીની આડમાં કેટલાક લોકો દ્વારા ફેક્ટરીનું પ્રદુષિત પાણી વહેતા પાણીમાં ઠાલવતા હોય છે જેના કારણે ચોખ્ખું પાણી પ્રદુષિત થાય છે.
આવી જ એક ઘટના પંચમહાલ જિલ્લાના કાલોલ ખાતે બની હતી. હાલોલ GIDCનું પ્રદુષિત પાણી કાલોલના બાકરોલ નજીકથી પસાર થતી કરાડ નદીમાં ઠાલવવામાં આવતા સફેદ ફીણના ગોટેગોટા આસપાસમાં ઉડવા લાગ્યા હતા.