મહામારી / ભારતમાં કોરોનાનો પહેલો 'અનોખો કેસ', આસામની ડોક્ટર મહિલા સાથે જે થયું તેનાથી વધી ચિંતા

• ભારતમાં કોરોનાના ડબલ એટેકનો પહેલો કેસ નોંધાયો
• આસામમાં મહિલા ડોક્ટર કોરોના બે અલગ અલગ વેરિયન્ટથી સંક્રમિત
• હોસ્પિટલમાં દાખલ કરાઈ, તબિયત સારી 

દિબ્રુગઢમાં ICMR ના પ્રાદેશિક ચિકિત્સા સંશોધન કેન્દ્રના પરીક્ષણોમાં આ ખુલાસો થયો છે. વેક્સિનના બન્ને ડોઝ લીધા હોવા છતાં પણ ડોક્ટર બીજા ડોઝના એક મહિના બાદ કોરોનાના અલ્ફા અને ડેલ્ટા વેરિયન્ટથી સંક્રમિત થઈ છે. જોકે તેની તબિયત સારી થઈ જવાથી તેને હોસ્પિટલમાંથી રજા પણ આપી દેવાઈ હતી. 

ICMR ના વરિષ્ઠ વૈજ્ઞાનિક ડો.બીજી બોરકાકોટીએ જણાવ્યું કે બમણું સંક્રમણ ત્યારે થાય છે કે જ્યારે બે વેરિયન્ટ એક વ્યક્તિને એકીસાથે અથવા ઘણા ઓછા સમયમાં સંક્રમિત કરે છે. જ્યારે કોઈ વ્યક્તિ કોરોનાના એક પ્રકારથી સંક્રમિત થાય અને એન્ટીબોડી વિકસીત થતા પહેલા સંક્રમણના 2-3 દિવસમાં બીજા પ્રકારથી સંક્રમિત થાય ત્યારે આવું બને છે. 

બેલ્જિયમમાં બે-બે વેરિયન્ટને કારણે 90 વર્ષીય વૃદ્ધા મોત થયું હતું 
ઉલ્લેખીય છે કે બેલ્જિયમમાં 90 વર્ષીય વૃદ્ધાનું કોરોનાના બે-બે વેરિયન્ટને કારણે નિધન થયાનો કિસ્સો બન્યો છે. વૃદ્ધા બ્રિટનના આલ્ફા અને સાઉથ આફ્રિકાના બીટા વેરિયન્ટથી સંક્રમિત થઈ હતી. ડોક્ટરોએ જણાવ્યું કે આ દુનિયામાં પહેલા પ્રકારનો કેસ છે. વૈજ્ઞાનિકોએ જણાવ્યું કે મહિલાને બે અલગ અલગ વેરિયન્ટનો ચેપ લાગ્યો છે. આ કેસ સામે આવ્યાં બાદ સવાલ ઉઠવા લાગ્યાં કે શું કોરોનાના અલગ અલગ વેરિયન્ટની સામે વેક્સિન કેટલી અસરકારક રહેશે. 

ટેસ્ટમાં કોરોનાના બે વેરિયન્ટ હોવાની પુષ્ટિ થઈ 

આ વૃદ્ધાનું મોત માર્ચ મહિનામાં થયું હતું. તેણે વેક્સિન લીધી નહોતી. તે એકલી રહેતી હતી અને ઘરમાં જ તેની સારવાર ચાલતી હતી. તેને જ્યારે હોસ્પિટલમાં ભરતી કરવામાં આવી ત્યારે ઓક્સિજન લેવલ બરાબર હતું પરંતુ હોસ્પિટલના દાખલ થયાના પાંચ દિવસમાં તેનું મોત થયું હતું. ટેસ્ટમાં તેના શરીરમાં કોરોનાના બે વેરિયન્ટ હોવાની પુષ્ટિ થઈ હતી. મોલિક્યુલર બાયોલોજિસ્ટ એન્નેએ જણાવ્યું કે જે સમયે વૃદ્ધાને બે વેરિયન્ટનો ચેપ લાગ્યો તે સમયે ત્યાં આલ્ફા અને બીટા વેરિયન્ટ ફેલાઈ રહ્યાં હતા. દુનિયાભરમાં ડબલ ઈન્ફેક્શનની ઉપેક્ષા કરાઈ રહી છે કારણ કે ચિંતાવાળા વેરિયન્ટનું ટેસ્ટિંગ ઓછું થઈ રહ્યું છે.