હિમાચલ પ્રદેશ / માંડ ખુરશી મળી ત્યાં પાછું ઉપડ્યું કમઠાણ, આ રાજ્યમાં શરુ થયો 'ઓપરેશન લોટસ'નો ડર, નેતાનો દાવો

• હિમાચલ પ્રદેશમાં કોંગ્રેસની સરકાર પર ઓપરેશન લોટસનો ખતરો ? 
• BJP MLA ઈન્દ્રસિંહ ગાંધીએ જયરામ ઠાકુરને ફરી CM બનવાનો દાવો કર્યો
• ભાજપ સરકારમાં મંત્રી રહી ચૂકેલા વિક્રમસિંહે પણ ઓપરેશન લોટસ ની પોસ્ટ મૂકી હતી 

હિમાચલ પ્રદેશમાં કોંગ્રેસની સરકાર બન્યાને 20 દિવસ થઈ ગયા બાદ હવે એક મોટા સમાચાર સામે આવ્યા છે. નોંધનિય છે કે, સીએમ સુખવિંદર સિંહ અને ડેપ્યુટી સીએમ મુકેશ અગ્નિહોત્રીએ 12 ડિસેમ્બર 2022ના રોજ ચાર્જ સંભાળ્યો હતો, પરંતુ હજુ સુધી કેબિનેટની રચના થઈ નથી. બીજી તરફ મંડી જિલ્લાની બાલ્હ વિધાનસભાના ભાજપના ધારાસભ્ય ઈન્દ્ર સિંહ ગાંધીએ જયરામ ઠાકુરને રાજ્યમાં ફરીથી સીએમ બનવાનો દાવો કર્યો છે. આ સાથે જ કોંગ્રેસના નેતાઓએ તેમના નિવેદન પર પલટવાર કર્યો છે. આ પહેલા ભાજપ સરકારમાં મંત્રી રહી ચૂકેલા વિક્રમ સિંહે પણ ' ઓપરેશન લોટસ 'ને લઈને પોસ્ટ મુકી હતી, પરંતુ બાદમાં તેમની પોસ્ટ એડિટ કરી હતી.

વાસ્તવમાં ભાજપના ધારાસભ્ય ઈન્દ્ર સિંહ ગાંધીએ એક ખાનગી ચેનલને આપેલા ઈન્ટરવ્યુમાં કહ્યું કે, ઓપરેશન લોટસ શરૂ થઈ ગયું છે અને કોંગ્રેસ પણ આ વાતથી વાકેફ છે. તેમણે કહ્યું કે હું જેટલું જાણું છું એટલું આપી રહ્યો છું. આ સાથે તેમણે કહ્યું કે, કોંગ્રેસના 18 ધારાસભ્યો ગાયબ છે. દિલ્હીમાં બેઠેલા નેતાઓ આ વિશે વધુ જાણે છે. જ્યારે તેમને પૂછવામાં આવ્યું કે, શું ભાજપે કોંગ્રેસના ધારાસભ્યોને છીનવી લીધા છે તો તેમણે કહ્યું કે, કદાચ.
 
આ તરફ ભાજપ સરકારમાં મંત્રી રહેલા વિક્રમ સિંહે પણ ફેસબુક પર એક પોસ્ટ શેર કરી હતી. પોસ્ટમાં તેમણે લખ્યું, 'કોંગ્રેસ સરકાર અમારા દબાણમાં નહીં, તેના પોતાના વજનથી પડશે.@ઓપરેશન લોટ્સ . જોકે બાદમાં તેમણે પોતાની પોસ્ટ એડિટ કરી અને ઓપરેશન લોટસ હટાવી દીધું.

કોંગ્રેસના ધારાસભ્યએ શું કહ્યું ? 

સિરમૌર જિલ્લાના નાહનના કોંગ્રેસના ધારાસભ્ય અજય સોલંકીએ ભાજપના ધારાસભ્યના નિવેદન પર પ્રતિક્રિયા આપી અને કહ્યું કે, ઓપરેશન લોટસનું ભાજપનું સ્વપ્ન અધૂરું રહેશે. અજય સોલંકીએ કહ્યું કે, ભાજપ ઓપરેશન લોટસને લઈને ભ્રામક પ્રચાર કરી રહી છે. રાજ્યમાં ટૂંક સમયમાં કેબિનેટની રચના કરવામાં આવશે. તેમજ ધારાસભ્યોના ગાયબ થવા પર તેમણે કહ્યું કે, તમામ ધારાસભ્યો પોતપોતાના મતવિસ્તારમાં સ્વતંત્ર રીતે કામ કરી રહ્યા છે. આ પહેલા કોંગ્રેસના નેતા કૌલ સિંહે પણ મંડીમાં ઈન્દર સિંહ ગાંધી પર વળતો પ્રહાર કર્યો હતો.

તો શું કોંગ્રેસ પાસે છે બહુમતી ? 

હિમાચલમાં 68 વિધાનસભા બેઠકો છે, જેમાંથી કોંગ્રેસે 40 જીતી છે, જ્યારે ભાજપના ધારાસભ્યોએ 25 બેઠકો જીતી છે. ત્રણ અપક્ષો પણ જીતીને વિધાનસભામાં પહોંચ્યા છે. હિમાચલમાં સરકાર બનાવવા માટે 35 ધારાસભ્યોની જરૂર છે.