રાજ્યમાં બુટલેગરો જાણે બેફામ બન્યા હોય તેવા ઘાટ સર્જાયો છે. દર એક બે દિવસે રાજ્યમાંથી વિદેશી દારૂ ઝડપાયાના કેસ સામે આવી રહ્યા છે. જોકે, અહીં વાત વિદેશ દારૂની એક બે બોટલની નથી પરંતુ કાર, ટેમ્પો અને ટ્રેલર ભરીને લાખીની કિંમતનો દારૂ પકડાઈ રહ્યો છે. હવે આવા જ એક બનાવમાં અંકલેશ્વર પોલીસે અંકલેશ્વરના નર્મદા બ્રિજ ટોલ પ્લાજા પાસે દારૂ ભરેલું ટેન્કર ઝડપાયું છે.
પોલીસે 30 લાખથી વધુનો મુદ્દામાલ કબ્જે કર્યો
બનાવની વિગત પ્રમાણે આ દારૂ એક ટેન્કરમાં સંતાડીને લાવવામાં આવી રહ્યો હતો. જેના ભાગરૂપે અંકલેશ્વર પોલીસે નર્મદા બ્રિજ ટોલ પ્લાજા પાસે વોચ ગોઠવી હતી. દરમિયાન બાતમી મુજબના વર્ણન વાળી એક ટેન્કર સુરતથી ભરૂચ તરફ આવતા જોઈ અંકલેશ્વર પોલીસે તેની થોભી તલાસી લીધી હતી. તલાસી દરમિયાન પોલીસને ટેન્કરમાંથી વિદેશી દારૂ સહિત 30 લાખથી વધુનો મુદ્દામાલ મળી આવાતાં ટેન્કરમાં સવાર બે શખ્શો લક્ષ્મણ ચૌધરી અને ગેનારામ બેનિવાલની ધરપકડ કરી કાયદેસરની કાર્યવાહી હાથ ધરી હતી.