લોકસભા ચૂંટણી 2024 / ચૂંટણી પંચે આપી મોટી ચેતવણી, સ્ટાર પ્રચારકો પોતાની પાસે રાખી શકશે માત્ર આટલા રૂપિયા

Lok Sabha Election 2024 : લોકસભા ચૂંટણીના પડઘમ વચ્ચે એક મોટા સમાચાર સામે આવી રહ્યા છે. લોકસભા ચૂંટણીની જાહેરાત બાદ દેશભરમાં રાજકીય ધમાસાણ શરૂ થઈ ગયું છે. તમામ પક્ષોએ પોતપોતાના ઉમેદવારો માટે પ્રચાર કરી રહેલા સ્ટાર પ્રચારકોની યાદી પણ જાહેર કરી દીધી છે. આ દરમિયાન ચૂંટણી પંચે એ પણ નક્કી કર્યું છે કે, સ્ટાર પ્રચારકો પાસે 1 લાખ રૂપિયાથી વધુ રોકડ ન હોવી જોઈએ.

ભાજપના સ્ટાર પ્રચારકોમાં વડાપ્રધાન નરેન્દ્ર મોદી, ગૃહમંત્રી અમિત શાહ, ભાજપ અધ્યક્ષ જેપી નડ્ડા છે. એ જ રીતે TMC સુપ્રીમો મમતા બેનર્જી, પૂર્વ કોંગ્રેસ અધ્યક્ષ સોનિયા ગાંધી, રાહુલ ગાંધી, પ્રિયંકા ગાંધી, શરદ પવાર, અખિલેશ યાદવ અને તેજસ્વી યાદવ જેવા વિવિધ પક્ષોના સ્ટાર પ્રચારકોનો ચૂંટણી પ્રચાર શરૂ થઈ ગયો છે.

શું છે ચૂંટણી પંચની સૂચના?
આ લોકસભા ચૂંટણીમાં ચૂંટણી પંચે નિર્ણય લીધો છે કે, કોઈપણ સ્ટાર પ્રચારક પોતાના ખિસ્સામાં 1 લાખ રૂપિયા સુધી રાખી શકે છે. ચૂંટણી પંચના જણાવ્યા અનુસાર, કોઈપણ પક્ષનો ઉમેદવાર પોતાના ખિસ્સામાં 50 હજાર રૂપિયાથી વધુ નહીં રાખી શકે અને તેના માટે પ્રચાર કરવા આવેલા સ્ટાર પ્રચારક પોતાના ખિસ્સામાં 1 લાખ રૂપિયાથી વધુ નહીં રાખી શકે. જો નિર્ધારિત રકમ કરતાં વધુ રકમ વસૂલવામાં આવશે તો ચોક્કસપણે રકમ જપ્ત કરવામાં આવશે. તેમજ તે વ્યક્તિ સામે કાર્યવાહી કરવામાં આવશે.

વધુ વાંચો: અરવિંદ કેજરીવાલે આપી 6 ગેરંટી, સુનિતા કેજરીવાલે રેલીમાં વાંચ્યો CMનો સંદેશ 

ચૂંટણી પંચે એવી પણ સૂચનાઓ આપી છે કે, ઉમેદવારો તેમના રોજિંદા ખર્ચ માટે અલગ રજિસ્ટર રાખશે અને તેની સંપૂર્ણ વિગતો દરરોજ ચૂંટણી પંચને મોકલશે. આ રજિસ્ટરમાં ઉમેદવારો ક્યારે, ક્યાં અને કેટલી રેલીઓ યોજી અને તેના પાછળ કેટલો ખર્ચ થયો તેનો સંપૂર્ણ હિસાબ રાખશે એટલું જ નહીં તેઓ સમગ્ર વિડિયો રેકોર્ડિંગ પણ કરાવશે. રોજિંદા ફૂલોના હાર, ખાણીપીણી, ઢોલ, ડાન્સ પાર્ટી, વાહનો વગેરેના દરો પણ ચૂંટણી પંચ દ્વારા નક્કી કરાયેલા દર મુજબ ચૂકવવાના રહેશે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો