મહામારી / આ દેશમાં એક જ દિવસમાં 574 કોરોનાના દર્દીઓના મોત, વડપ્રધાને કહ્યું નહીં લાગે લૉકડાઉન

• દુનિયામાં કોરોના દર્દીઓની સંખ્યા ૭.૯૭ કરોડને પાર પહોંચી 
• ૧૭.૪૮ લાખ લોકો મૃત્યુ પામ્યા
• બ્રિટનમાં એક જ દિવસમાં ૫૭૪ દર્દીઓના થયાં નામ 

બોરિસ જોનસને દેશમાં લોકડાઉનની શક્યતા પર સ્પષ્ટ ઇનકાર કરી દીધો છે. જોનસનના જણાવ્યા મુજબ પરિસ્થિતિ પર જલદી કાબૂ મેળવવાની કોશિશ થઇ રહી છે. બ્રિટનમાં ગુરુવારે એક જ દિવસમાં મૃત્યુ પામનારનો આંકડો ૫૭૪ વધી ગયો છે. 

એક અઠવાડિયામાં બે નવા કોવિડ-૧૯ના વેરિયન્ટ

આ પહેલાં બુધવારે ૭૪૪ સંક્રમિતનાં મોત થયાં હતાં. દેશમાં અત્યાર સુધી કુલ ૬૯,૬૨૫ લોકોનાં મોત થઇ ચૂક્યાં છે. આ સાથે કુલ કેસમાં પણ ૩૯,૦૦૦થી પણ વધુનો વધારો જોવા મળ્યો છે. દેશમાં એક અઠવાડિયામાં બે નવા કોવિડ-૧૯ વેરિયન્ટ જોવા મળ્યા છે. વૈજ્ઞાનિકો તેના પર રિસર્ચ કરી રહ્યા છે. 

વેક્સિનેશન ડ્રાઇવ યુદ્ધના ધોરણે ચાલુ

દેશમાં વેક્સિનેશન ડ્રાઇવ પણ ઝડપથી ચલાવાઇ રહી છે. અત્યાર સુધી છ લાખ લોકોને વેક્સિનનો પહેલો ડોઝ આપી દેવાયો છે. બ્રિટને યુરોપમાં ફાઇઝર-બાયોએનટેકને સૌથી પહેલાં મંજૂરી આપી છે. અહીં આ મહિનાની શરૂઆતમાં વેક્સિનેશન શરૂ થયું હતું. સરકારનું કહેવું છે કે ખૂબ જ જલદી દેશના સૌથી વધુ પ્રભાવિત વિસ્તારમાં વેક્સિનેશન પ્રોસેસ પૂરી કરાશે. 

અમેરિકામાં કોરોનાથી રાહતના સંકેત નથી

અમેરિકામાં કોરોનાથી રાહતના સંકેત નથી. અહીં કેટલાંક રાજ્યમાં હાલત ખૂબ ખરાબ છે, તેમાં કેલિફોર્નિયાનું નામ સૌથી પહેલાં લેવામાં આવે તેમ છે. માત્ર આ રાજ્યમાં કેસ ૨૦ લાખથી વધુ થઇ ચૂક્યા છે. દેશમાં અત્યાર સુધી ૩,૨૬,૦૦૦થી વધુ લોકો મૃત્યુ પામ્યા છે. યુરોપીય દેશો ક્રિસમસમાં ડરેલા છે. મોટા ભાગના દેશોએ પ્રતિબંધમાં છૂટછાટ આપી નથી.