દુનિયાના ટોચના ઓલરાઉન્ડર બેન સ્ટોક્સે પોતાનો વર્કલોડ મેનેજ કરવા અને માનસિક રીતે તાજા રહેવા માટે આગામી IPLમાંથી દૂર રહેવાનો નિર્ણય કર્યો છે. બ્રિટિશ મીડિયામાં આવેલા સમાચાર અનુસાર તે ઉનાળાની સિઝનમાં ઈંગ્લેન્ડની ઘરેલુ શ્રેણી પર પોતાનું ધ્યાન કેન્દ્રિત કરવા ઇચ્છે છે.
એશીઝમાં સ્ટોક્સનું પ્રદર્શન નિરાશાજનક
એશીઝમાં સ્ટોક્સનું પ્રદર્શન નિરાશાજનક રહ્યું હતું, જ્યાં તેણે માત્ર ૨૩૬ રન બનાવી અને ચાર વિકેટ જ વિકેટ ઝડપી હતી. ઓસ્ટ્રેલિયા સામેની ટેસ્ટ શ્રેણીમાં ઈંગ્લેન્ડને ૪-૦થી કારમી હારનો સામનો કરવો પડ્યો હતો. ઈંગ્લેન્ડના આ કારમા પરાજયનું ઠીકરું હવે IPL પર ફૂટ્યું છે.
બેન સ્ટોક્સ આગામી IPLની બહાર રહેશે
ઈંગ્લેન્ડના ભૂતપૂર્વ કેપ્ટન ડેવિડ ગ્રોવર સહિત ઘણા ભૂતપૂર્વ ખેલાડીઓ ઈંગ્લેન્ડના આ ખરાબ પ્રદર્શનનો દોષ IPL પર ઢોળી ચૂક્યા છે. ઈંગ્લેન્ડના એક અખબારના જણાવ્યા અનુસાર- ''સ્ટોક્સ આગામી IPLની બહાર રહેશે. સ્ટોક્સ માટે ગત વર્ષ ઘણું મુશ્કેલીભર્યું રહ્યું છે. તેના પિતા ગ્રેડનું ૧૩ મહિના પહેલાં નિધન થયું હતું. તેણે માનસિક રીતે સ્વસ્થ થવા માટે લાંબો બ્રેક લીધો હતો. ત્યાર બાદ આંગળીમાં ફ્રેક્ચરને કારણે IPL-૨૦૨૧ના પ્રથમ તબક્કામાંથી બહાર થઈ ગયો હતો અને પછી બીજા તબક્કા માટે પણ પોતાની ટીમ રાજસ્થાન રોયલ્સ સાથે જોડાયો નહોતો.''
જોફ્રા આર્ચર પણ આગામી IPLથી દૂર રહેશે
હવે સ્ટોક્સે ન્યૂઝીલેન્ડ સામેની ઘરેલુ શ્રેણીને મહત્ત્વ આપવા IPLથી દૂર રહેવાનો નિર્ણય કર્યો છે. સ્ટોક્સ ઉપરાંત જોફ્રા આર્ચર પણ આગામી IPLથી દૂર રહેશે. ઈંગ્લેન્ડના ટેસ્ટ કેપ્ટન જો રૂટે અગાઉ ઈશારો કર્યો હતો કે તે ૨૦૨૨ની IPLમાં રમશે, પરંતુ હવે તેણે પણ યુ-ટર્ન લીધો છે. રૂટે ૨૦૧૮ની IPL હરાજીમાં નહીં વેચાયા બાદ IPLની કોઈ સિઝન રમી નથી. ગત સપ્તાહે તેણે કહ્યું હતું કે તે IPLની હરાજીમાં સામેલ થવાનું વિચારી રહ્યો છે. હવે ઓસ્ટ્રેલિયા સામે કારમા પરાજય બાદ જો રૂટે એ વાતની પુષ્ટિ કરી છે કે તેણે IPLમાં રમવાનો પ્રસ્તાવ ઠુકરાવી દીધો છે.