દેશના ફરી એકવાર કાળા નાણાં અંગે થયા મોટા ખુલાસા 

ભારતના અનેક ધનિકોના નામ કાળા નાણાં અંગે ફરી પ્રકાશમાં આવ્યાં છે ભારત સહિત દુનિયાના અનેક મોટાં માથાંઓ વેપારીઓએ ટેક્સ હેવન એવા દેશોમાં કાળું નાણું છુપાવ્યું છે. હવે આ ફર્મના કેટલાક એવા દસ્તાવેજો સામે આવ્યા છે કે જેના કારણે જૂના વેપારીઓ સામે ટેક્સ ચોરીના આક્ષેપોને બળ મળ્યું છે. 
 
નાણાં મંત્રાલયે સ્પષ્ટતા કરી હતી કે નવા ખુલાસામાં કાયદાનું પાલન કરતી સંસ્થાઓએ તપાસ શરૂ કરી દીધી છે. આ કેસમાં ભારતીય જનતા પાર્ટીના એક નેતાનું નામ પણ ખુલ્યું છે. પશ્ચિમ બંગાળના ખ્યાતનામ વેપારી શિશિર કે. બજોરિયાએ 'હૈપ્ટિક' નામની કંપની ઊભી કરી હતી. 

મળતી માહિતી મુજબ કેન્દ્રસરકારે એક મલ્ટિ એજન્સી ગ્રૂપ (એમએજી) બનાવ્યું છે. જે યાદીમાં સામેલ ૪૨૬ ભારતીયો અંગે તપાસ કરી રહ્યું છે. આ તપાસના આધારે આશરે ૧ ૦૦૦ કરોડના કાળા નાણાંની માહિતી મળી છે. લીક થયેલા પનામા પેપર્સના અનેક દિગ્ગજ ભારતીયમાં પીવીઆર સિનેમાના માલિક અજય બીજલી અને તેમના પરિવારના સભ્યો હાઇક મેસેન્જરના સીઇઓ અને ટેલિકોમ કંપની એરટેલના સુનીલ મિત્તલના પુત્ર કેવીન મિત્તલ એશિયન પેઇન્ટ્સના સીઆઇઓ અશ્વિન દાણીના પુત્ર જલજ દાણી સામેલ છે. 
 
દસ્તાવેજો મુજબ બ્રિટિશ વર્જિન આઇસલેન્ડ કંપની માર્ડી ગ્રેસ હોલ્ડિંગ્સના માલિક લોકેશ શર્માએ ૨૦૧૬માં પનામા પેપર્સ લીક બાદ કંપનીમાં પોતાની ભાગીદારી ૩૦ ગણી વધારી છે. ઉલ્લેખનીય છે કે વર્ષ ૨૦૧૬માં પનામા પેપર્સ મામલે ખુલાસો થયો હતો તો તેની અસર પણ દેખાઇ હતી. વૈશ્વિક સ્તરે ૧૫૦થી વધુ તપાસ શરૂ થઇ હતી. 

જેમાં ફસાયેલા ૪૨૬ ભારતીયો સામે તપાસમાં કેન્દ્રીય તપાસ સંસ્થાઓ જોડાયેલી છે. આ મામલે ભારતમાં અત્યાર સુધી ૫૮થી વધુ સર્ચ અને સંપત્તિ જબ્તીની કાર્યવાહી થઇ ચૂકી છે. ભારતીય કોર્ટોમાં ૧૫થી વધુ કેસો દાખલ થઇ ચૂક્યા છે.