સુધારો જરૂરી / નકલી ડૉક્ટરો વિરુદ્ધ મજબૂત કાયદાની જરૂર, માત્ર 1 હજાર રૂપિયાનો જ ચૂકવવો પડે છે દંડ

• IMAના નાણાવિભાગના ચેરમેનનુ નિવેદન 
• `બોગસ ડૉકટરો અંગે કાયદાઓમા ફેરફાર જરૂરી'
• `લૂલા કાયદાથી છૂટી જાય છે બોગસ ડૉકટરો'

નકલી ડોકટર મુદ્દે ઇન્ડિયન મેડિકલ એસો.ના નાણા વિભાગના ચેરમેનનુ નિવેદન સામે આવ્યું છે. રાજ્યમાં બોગસ ડોકટર અંગે ચેરમેન બિપીન પટેલે કહ્યું હતું કે, બોગસ ડૉકટર માટે વર્ષો પહેલા બનેલા સામાન્ય કાયદા આજે પણ યથાવત્ છે. જેના કારણે સામાન્ય ચાર્જ ભરી બોગસ ડૉકટર સહેલાઈથી છૂટી જાય છે. આવું ન થાય તે માટે બોગસ ડોક્ટર અંગે કાયદાઓમા ફેરફાર કરવાની જરૂર છે. ઉલ્લેખનીય છે કે બે મહિનામાં ગામડાના વિસ્તારોમાંથી મોટી સંખ્યામાં બોગસ ડૉકટરો ઝડપાયા છે.

રાજ્યમાં બોગસ ડોક્ટરોનો રાફડો ફાટ્યો છે. તો બીજી તરફ ઉંઘતું તંત્ર પણ અચાનક એકાએક જાગ્યું છે. અને બોગસ ડોક્ટરોને ઝડપવા દોડમ દોડ કરી રહ્યું છે. છેલ્લા એક મહિનામાં રાજ્યમાંથી 70થી વધુ બોગસ ડોક્ટરો ઝડપાયા છે. પરંતુ સવાલ એ છે કે, ગામડા લેવલે બોગસ ડોક્ટરો કેમ ફૂલ્યા-ફાલ્યા છે? કેમ બોગસ ડોક્ટરોની દુકાનો ગામડાઓમાં ચાલી રહી છે? 

કોરોનાએ આપણી આરોગ્ય સુવિધાઓને તો ઉઘાડી પાડી જ દીધી છે. પરંતુ તેની સાથે-સાથે ગામડા લેવલે આરોગ્યની કેટલી સુવિધાઓ ઉભી કરાઈ તેની પણ પોલંપોલ હવે ખુલ્લીને આંખે વળગી છે. કારણ કે, રાજ્યના ગામડાઓમાં બોગસ ડોક્ટરોની દુકાનો હવે ધમધમી રહી છે. છેલ્લા એક જ મહિનામાં અચાનક જાગેલા તંત્રએ રાજ્યમાંથી 74 બોગસ ડોક્ટરો ઝડપી પાડ્યા છે. જેઓ કોઈપણ પ્રકારની ડીગ્રી-કે સર્ટિફિકેટ વિના ગામડાઓમાં દવાખાના ચલાવી રહ્યા હતા. ડિગ્રીની વાત તો દૂર પરંતુ કેટલાક લોકો તો માત્ર 8 થી 10 ધોરણ ભણેલા હોવાનું પણ સામે આવ્યું છે.