અહીંના તપસિયા વિસ્તારમાં રોજ સવારે એક યુવક પૂરી લગનથી રસ્તાની સફાઈ કરતો જોવા મળે છે. આ યુવક અન્ય સફાઈ કર્મચારી જેવો સાધારણ નથી, બલકે અસાધારણ પ્રતિભા ધરાવતો રાષ્ટ્રીય સ્તરનો ચક બોલ ખેલાડી છે. કોરોના મહામારીના કારણે તેની આર્થિક સ્થિતિ એટલી બગડી ગઈ કે તેણે હાથમાં ઝાડું ઉપાડવું પડ્યું, જોકે તેણે ચક બોલની પ્રેક્ટિસ છોડી નથી.
કોરોના સંકટે આ વ્યક્તિને કર્યો મજબૂર
ચકબૉલ પ્લેયર બન્યો સફાઇકર્મી
કોરોનાએ છીનવી લીધી લોકોની નોકરીઓ
તપસિયા વિસ્તારના ગોબરા કબ્રસ્તાન રોડ ખાતે રહેતા ૨૫ વર્ષીય ચક બોલ ખેલાડી વિજય દાસે જણાવ્યું, ''કોરોના પહેલાં હું ફક્ત ઇન્જેક્શનની ડિલિવરીનું કામ કરતો હતો. લોકડાઉનમાં નાણાંની તંગી સર્જાઈ. મેં કોલકાતા નિગમમાં કામચલાઉ સફાઈ કર્મચારી માટે આવેદન કર્યું ને મારી પસંદગી થઈ ગઈ. છેલ્લા પાંચેક મહિનાથી હું સફાઈકામ કરું છું. રોજ સવારના પાંચથી નવ વાગ્યા સુધી રસ્તાની સફાઈ કરું છું. ત્યાર બાદ ઇન્જેક્શનની ડિલિવરીના કામમાં લાગી જાઉં છું. ત્યાર બાદ ચારથી સાત વાગ્યા સુધી હું પ્રેક્ટિસ કરું છું. કોઈ પણ કામ નાનું કે મોટું નથી હોતું.''
વિજય વધુમાં કહે છે, ''મને એ વાતની ખુશી છે કે મારી ગણના કોરોના વોરિયર તરીકે થાય છે. મેં સફાઈનું આ કામ એટલા માટે પસંદ કર્યું, કારણ કે મને આવું જ કોઈ કામ જોઈતું હતું, જેમાં વધુ સમય આપવો ના પડે અને હું મારી પ્રેક્ટિસ ચાલુ રાખી શકું.''
વિજય દાસના પરિવારમાં મીનુ અને પત્ની શીલા છે. મા પણ અન્યના ઘરમાં કામ કરે છે. પત્ની શીલા દાસ પણ રાષ્ટ્રીય સ્તરની એથ્લીટ છે અને દોડ તેમજ લાંબી કૂદમાં ઘણા મેડલ જીતી ચૂકી છે.
વિજયે ૨૦૧૨થી ચક બોલની ટ્રેનિંગ શરૂ કરી. ટૂંક સમયમાં જ તે આ રમતમાં નિપુણ બની ગયો. પછીના વર્ષે જ તેણે હરિદ્વાર અને ૨૦૧૪માં ઇન્દોરમાં યોજાયેલી નેશનલ સિનિયર ચક બોલ ટૂર્નામેન્ટમાં ભાગ લીધો અને મેડલ પણ જીત્યા. વિજય અત્યાર સુધીમાં બે સિલ્વર અને એક બ્રોન્ઝ મેડલ જીતી ચૂક્યો છે. ચક બોલ રમવા છતાં વિજયનું સપનું ભવિષ્યમાં ફૂટબોલર બનવાનું છે. તે કોલકાતા લીગના સેકન્ડ ડિવિઝનમાં ટેન્ગરા એફસી તરફથી ગોલકીપર તરીકે રમી ચૂક્યો છે. વિજયે જણાવ્યું, ''ચક બોલ હેન્ડબોલ જેવી જ રમત છે, જોકે ચક બોલની રમતના નિયમ થોડા અલગ છે.''