સાબરકાંઠા વિસ્તારમાંથી વધુ 30 લાખ રૂપિયાનું ડ્રગ્સ ઝડપાતા સનસનાટી મચી ગઈ છે. રૂપિયા 30 લાખના ડ્રગ્સ સાથે હિમતનગરના એક શખ્સની ધરપકડ.
સાબરકાંઠાથી ઝડપાયો ડ્રગ્સ જથ્થો
રૂપિયા 30 લાખના ડ્રગ્સ સાથે એકની ધરપકડ
બે દિવસ પહેલા જ મહેસાણામાં ચરસ ઝડપાયું
ગુજરાતમાં અનેક વિધ જગ્યાએ ડ્રગ્સનું દૂષણ ફેલાયું હોય તેમ હજુ ત્રણ દિવસ પહેલા જ કાલુપુર રેલવે સ્ટેશનથી સવા કરોડની કિમતનું ડ્રગ્સ પકડાયાની શાહી સુકાઈ નથી,ત્યાંજ સાબરકાંઠા વિસ્તારમાંથી વધુ 30 લાખ રૂપિયાનું ડ્રગ્સ ઝડપાતા સનસનાટી મચી ગઈ છે. રૂપિયા 30 લાખના ડ્રગ્સ સાથે હિમતનગરના એક શખ્સની ધરપકડ કરવામાં આવી છે.
30 લાખનો ડ્રગ્સનો જથ્થો
ગુજરાતમાં ડ્રગ્સના બંધાણીઓને માલ સપ્લાય કરવાનો કાળો કારોબાર તેજીથી વિકસ્યો હોય તેમ કચ્છના મુંદ્રા બંદર બાદ અમદાવાદના કાલુપુર રેલવે સ્ટેશન, મહેસાણા બાદ હવે સાબરકાંઠામાંથી રૂપિયા 30 લાખના ડ્રગ્સ સાથે હિમતનગરના ઈરશાદખાન પઠાણની ધરપકડ કરવામાં આવી છે. માત્ર 26 જ વર્ષનો ઈરશાદ મોતીપુરાથી અમદાવાદ આવી રહ્યો હતો તે દરમિયાન પીપલોદી ગામેથી ઝડપાઈ ગયો હતો. ઈરશાદ ખાન ડ્રગ્સનો કેરિયર છે? ડ્રગ્સનો સપ્લાય કોણે કરવાનો હતો ? ડ્રગ્સ ક્યાંથી લાવ્યો જેવા કેટલાય સવાલો હવે પોલીસ તપાસમાં આવશે. આ પરથી ગુજરાતના ખૂણે-ખૂણે ડ્રગ્સ પહોચાડવા કોણે સોપારી લીધી છે.તેના નેટવર્કનો પર્દાફાશ થઇ શકે તેમ છે.
મહેસાણામાં 15 કિલો ચરસ સાથે ત્રણ ઝબ્બે
ડ્રગ્સ માફિયાઓ ડ્રગ્સ અને અન્ય નશીલા પદાર્થો ગુજરાતમાં ઘુસાડી રહ્યા છે. રાજ્યના યુવાનોને ગેરમાર્ગે દોરવાનું કામ ચાલી રહ્યું છે. થોડા દિવસ અગાઉ કચ્છના મુન્દ્રા બંદર પર અંદાજે 3 હજાર કિલો હિરોઈન ઝડપાયું હતું. તો 2 દિવસ અગાઉ અમદાવાદથી MD ડ્રગ્સ સાથે 3 શખ્સોની અટકાયત કરાઈ હતી. તેવામાં હવે મહેસાણાથી 15 કિલો ચરસ ઝડપાયું હતું. મહેસાણાના ફતેપુરા સર્કલ પાસેથી ટ્રાફિક પોલીસના ચેકિંગમાં કારમાંથી 15 કિલોથી વધુ ચરસ ઝડપાયું છે. કારમાં ચરસ સાથે 3 શખ્સો પણ ઝડપાયા હતા. ટ્રાફિક પોલીસે SOG અને LCBને આ અંગે જાણ કરતા SOG અને LCB પોલીસ ઘટનાસ્થળે પહોંચીને તપાસ શરૂ કરી દીધી હતી.
કાલુપુર સ્ટેશનથી સવા કરોડનો જથ્થો ઝડપાયો
ગુજરાત નારકોટીક્સ કંટ્રોલ બ્યુરોને માહિતી મળી હતી કે કેટલાક શખ્સો ગુજરાતમાં ટ્રેન મારફતે ડ્રગ્સ ઘુસાડવાની ફિરાકમાં છે. માહિતી મળતા જ એલર્ટ થઇ ચુકેલા NCBએ અમદાવાદના કાલુપુર રેલવે સ્ટેશન પર વોચ ગોઠવી હતી. હાવડા-ગાંધીધામ ટ્રેનમાંથી 3 શખ્સોની અટકાયત કરી લીધી હતી. આ શખ્સો 1 કિલો જેટલો MD ડ્રગ્સનો જથ્થો લઇ જઈ રહ્યા હતા. નાર્કોટિક્સ વિભાગની ટીમે ડ્રગ્સ લાવનાર પ્રવીણ ભાટીની ધરપકડ કરી હતી. સાથે જ 2 રિસીવર સરોજ ગોસ્વામી અને અબ્દુલ ગનીની પણ ધરપકડ કરવામાં આવી હતી. NCB હવે એ તપાસ કરશે કે આ ત્રણેય પહેલી વાર ખેપ લગાવી છે કે ગુજરાતમાં વારંવાર ખેપ લગાવી રહ્યા હતા. આ જથ્થો કોણ મંગાવે છે અને કોને સપ્લાય કરવાનો હતો. આ તમામ પાસાઓ પર પૂછપરછ ચાલી રહી છે.