કાર્યવાહી / કેન્દ્ર સરકારે Google પર ફટકાર્યો રૂ.936 કરોડનો દંડ, જાણો કયા કારણોસર લેવામાં આવ્યા એક્શન

• CCIએ ગૂગલની વિરુદ્ધ લીધો મોટો નિર્ણય 
• સર્ચ એન્જિન ગૂગલ પર 936.44 કરોડ રૂપિયાનો ફટકાર્યો દંડ 
• 20 ઓક્ટોબરે પણ ફટકાર્યો હતો દંડ

કોમ્પિટિશન કમિશન ઓફ ઈન્ડિયા (CCI)એ મંગળવારે સર્ચ એન્જિન ગૂગલ પર 936.44 કરોડ રૂપિયાનો દંડ ફટકાર્યો છે. કમિશન દ્વારા આ દંડ પ્લે સ્ટોરની નીતિઓના સંબંધમાં અયોગ્ય વેપાર વ્યવહાર માટે લાદવામાં આવ્યો છે.

વર્તનમાં સુધારો કરવાનો આપ્યો નિર્દેશ
તપાસમાં CCIને જાણવા મળ્યું કે ગૂગલે તેના વર્ચસ્વની સ્થિતિનો દુરુપયોગ કર્યો છે. CCIએ કંપનીને આપવામાં આવેલા આદેશમાં અન્યાયી વ્યાપારી પ્રથાઓને રોકવાનો નિર્દેશ આપ્યો છે. CCI દ્વારા જારી કરાયેલા નિવેદન અનુસાર, કોમ્પિટિશન કમિશન ઓફ ઈન્ડિયાએ Googleને નિર્દેશ આપ્યો છે કે તે એક નિર્ધારિત સમયમર્યાદામાં તેના વર્તનમાં સુધારો કરે. એક અઠવાડિયા કરતા પણ ઓછા સમયમાં આ બીજી વખત છે, જ્યારે ગૂગલ વિરુદ્ધ સીસીઆઈએ મોટો નિર્ણય લીધો છે.  

આ પહેલા પણ ફટકારવામાં આવ્યો હતો દંડ
અગાઉ 20 ઓક્ટોબરના રોજ નિયમનકારે એન્ડ્રોઇડ મોબાઇલ ઉપકરણોના સંદર્ભમાં બહુવિધ બજારોમાં તેના વર્ચસ્વનો દુરુપયોગ કરવા બદલ ગૂગલ પર રૂ. 1,337.76 કરોડનો દંડ લાદ્યો હતો.

Google તરફથી કરવામાં આવી નથી કોઈ ટિપ્પણી
Googleનું Play Store Android મોબાઇલ ઇકોસિસ્ટમમાં એપ્લિકેશન ડેવલોપર્સ માટે મુખ્ય વિતરણ ચેનલની રચના કરે છે, જે તેના માલિકોને બજારમાં લાવવામાં આવેલી એપ્લિકેશનનો ઉપયોગ કરવાની મંજૂરી આપે છે. દંડ ઉપરાંત સીસીઆઈએ કહ્યું કે, ગૂગલે એપ ડેવલપર્સને એપ્સ ખરીદવા માટે કોઈપણ થર્ડ પાર્ટી બિલિંગ અથવા પેમેન્ટ પ્રોસેસિંગ સેવાઓનો ઉપયોગ કરવાથી પ્રતિબંધિત ન કરવો જોઈએ. CCIના આદેશ પર હાલ Google તરફથી કોઈ ટિપ્પણી કરવામાં આવી નથી.

રેગ્યુલેટર અન્ય બાબતોમાં પણ કરી રહ્યું છે ગૂગલની તપાસ 
આ પહેલા 21 ઓક્ટોબરે ગૂગલે કહ્યું હતું કે, તે એન્ડ્રોઇડ ડિવાઇસ મામલે ઓર્ડરની સમીક્ષા કરશે. CCI દ્વારા લાદવામાં આવેલ દંડની રકમ કંપનીના સરેરાશ સંબંધિત વ્યવસાયના સાત ટકા છે. નિવેદન અનુસાર, Googleને જરૂરી નાણાકીય નિવેદનો અને અન્ય સંબંધિત દસ્તાવેજો પ્રદાન કરવા માટે 30 દિવસનો સમય આપવામાં આવ્યો છે, રેગ્યુલેટર અન્ય બાબતોમાં પણ ગૂગલની તપાસ કરી રહ્યું છે. આમાં સમાચાર સામગ્રી અને સ્માર્ટ ટીવીના સંબંધમાં ઇન્ટરનેટ ચીફ દ્વારા કથિત સ્પર્ધા વિરોધી પ્રવૃત્તિઓનો સમાવેશ થાય છે.

ફેબ્રુઆરી 2018માં ગૂગલને ફટકાર્યો હતો 136 કરોડ રૂપિયાનો દંડ
કમિશને ફેબ્રુઆરી 2018માં ઓનલાઈન 'સર્ચ' માટે ભારતીય બજારમાં અયોગ્ય વ્યવસાય પ્રથાઓ માટે ગૂગલ પર 136 કરોડ રૂપિયાનો દંડ ફટકાર્યો હતો. સીસીઆઈએ ઈન્ટરનેટ કંપનીને એપ ડેવલપર્સ પર એવી કોઈ પણ શરત ન લાદવા કહ્યું છે કે જે તેમને આપવામાં આવતી સેવાઓ માટે ગેરવાજબી, ભેદભાવપૂર્ણ અથવા અસંગત હોય.