કાર્યવાહી / પરીક્ષા દરમિયાન ખુલ્લેઆમ ચોરી થઇ રહ્યાનો વીડિયો સામે આવ્યા બાદ સૌરાષ્ટ્ર યુનિવર્સિટી એક્શનમાં, લીધો આ મોટો નિર્ણય

• સૌરાષ્ટ્ર યુનિવર્સીટીની પરીક્ષાનો વીડિયો વાયરલનો મામલો
• પીડીએમ કોલેજમાંથી પરીક્ષામાં ચોરીનો વીડિયો થયો હતો વાયરલ
• સૌરાષ્ટ્ર યુનિવર્સિટી કોલેજના સંચાલકોને નોટિસ પાઠવી માંગશે ખુલાસો

સૌરાષ્ટ્ર યુનિવર્સિટીની ચાલી રહેલી પરીક્ષામાં ગેરરીતિ અંગેનો એક વીડિયો સોશિયલ મીડિયામાં વાયરલ થયો છે. જેમાં પરીક્ષાર્થી કાપલી સાથે પરીક્ષાખંડમાં પહોંચ્યો હતો. પરીક્ષાર્થીએ પોતાના જ મોબાઇલમાં કાપલી, હોલ ટિકિટ અને આન્સર સીટ સાથેનો વીડિયો બનાવી વાયરલ કર્યો હતો. આ વાયરલ વીડિયો પી.ડી.એમ કૉલેજનો હોવાનું સામે આવતા સૌરાષ્ટ્ર યુનિવર્સિટી એક્શનમાં આવી છે. સૌરાષ્ટ્ર યુનિવર્સિટી પી.ડી.એમ કૉલેજના સંચાલકોને નોટિસ પાઠવી આ અંગે ખુલાસો માંગશે. 

પરીક્ષામાં ચોરીનો વીડિયો થયો હતો વાયરલ
ઘટના અંગે મળતી માહિતી અનુસાર, સૌરાષ્ટ્ર યુનિવર્સિટી પર પરીક્ષા દરમિયાન ગેરરીતિના અનેક આક્ષેપો લાગી ચુક્યાં છે. અનેક ઘટનાઓ મુદ્દે બદનામ સૌરાષ્ટ્ર યુનિવર્સિટીની કલગીમાં વધારે એક છોગું ઉમેરાયું છે. ગતરોજ સોશિયલ મીડિયા પર એક વીડિયો વાયરલ થયો હતો, જેમાં વિદ્યાર્થી ચાલુ પરીક્ષાએ બેન્ચ પર કાપલી મુકીને ખુલ્લેઆમ ચોરી કરતો હોવાનો વીડિયો વાયરલ થયો હતો.  જોકે, VTV આ વીડિયોની પુષ્ટિ કરતું નથી.

કૉલેજને નોટિસ પાઠવી માંગવામાં આવશે ખુલાસો
તપાસમાં આ વાયરલ વીડિયો પી.ડી.એમ કોલેજનો હોવાનું સામે આવતા સૌરાષ્ટ્ર યુનિવર્સિટીએ કાર્યવાહી હાથ ધરી છે. સૌરાષ્ટ્ર યુનિવર્સિટી દ્વારા પરીક્ષામાં ચોરીને લઇ કોલેજના સંચાલકો પાસેથી ખુલાસો માંગવામાં આવશે. 

6 દિવસ પહેલા પરીક્ષામાં ગેરરીતિ આવી હતી સામે
સૌરાષ્ટ્ર યુનિવર્સિટીમાં પરીક્ષા દરમિયાન ગેરરીતિના અનેક બનાવો પ્રકાશમાં આવવા પામ્યા છે. ત્યારે 6 દિવસ પહેલા જ સેમેસ્ટર-1 ના અલગ- અલગ વિભાગના કુલ 59 હજારથી વધુ વિદ્યાર્થીઓ પરીક્ષા આપી હતી.  પરીક્ષા શરૂ થયાના 6 દિવસમાં કુલ 8 વિદ્યાર્થીઓ પરીક્ષામાં ગેરરીતિ કરતા ઝડપાયા હતા. ત્યારે યુનિવર્સિટીએ કોપી કેસ કરી કાર્યવાહિ હાથ ધરી હતી.

સૌરાષ્ટ્ર યુનિવર્સિટીએ લીધો હતો આ નિર્ણય
સૌરાષ્ટ્ર યુનિવર્સિટીમાં ગત 13 ઓક્ટોબરનું BBA અને B.com સેમ-5નું એક-એક પેપર લીક થવાની ગંભીર ઘટના પ્રકાશમાં આવતા હજારો વિદ્યાર્થીઓનું ભાવિ જોખમાયું હતું અને તેમાંથી B.comનું એક પેપર છાત્રોએ બીજી વખત આપવું પડ્યું હતું. પેપર લીક થતા જ તમામ પરીક્ષાઓમાં QR કોડ સાથેનું પેપર કાઢવાનો સૌરાષ્ટ્ર યુનિવર્સિટીના કુલપતિ ગિરીશ ભીમાણીએ ત્વરીત નિર્ણય કર્યો હતો.