સ્માર્ટ સિટી વડોદરામાં તંત્રની ખૂલી પોલ, 23 કરોડના ખર્ચે બનાવેલા સિટી બસ સ્ટેન્ડ આગળ કરી દેવાયા દબાણો, મુસાફરો પરેશાન
હાઈટેક બસના સપના સામે કરોડોનો ખર્ચ પાણીમાં
વડોદરામાં સિટી બસના સ્ટોપ પર થયા દબાણો
23 કરોડ રૂપિયાના ખર્ચે બનેલુ બસ સ્ટેન્ડ પાણીમાં
સ્માર્ટસિટી કહેવાતા વડોદરામાં હાઇટેક બસો અને અન્ય સુવિધાને લઇને દેખાડવામાં આવેલા મોટા સપના પોકળ સાબિત થયા છે. સિટી બસ સ્ટોપ કે જ્યાં હાઇટેક બસસ્ટેન્ડ આપવાની વાત કરવામાં આવી હતી પરંતુ કહેવાતા સ્માર્ટ સિટીમાં અત્યારે સામાન્ય બસ સ્ટેન્ડના પણ ઠેકાણા નથી. વીટીવી ન્યૂઝના કેમેરામાં સ્માર્ટ સિટી નહીં પરંતુ લાપરવાહ તંત્રની પોલ કેદ થઇ છે.
સિટી બસ સ્ટેશન શોધવુ પડે તેવી સ્થિતિ
સિટી બસ સ્ટોપ પણ અત્યારે બસ સ્ટેન્ડ ક્યાં છે તે શોધવુ મુશ્કેલ બન્યુ છે કારણ કે એક તરફ હોર્ડિંગ્સથી સ્ટેન્ડ ઢંકાઇ ગયુ છે તો બીજી તરફ તંત્ર દ્વારા મંડપ બાંધીને દબાણ કરાતા બસ સ્ટેન્ડનો કોઇ મતલબ જ રહેતો નથી. આવી સ્થિતિમાં બસ વાળા પણ સ્ટેન્ડથી દૂર બસ ઉભી રાખે છે જેથી બીમાર અને વૃદ્ધ પેસેન્જરોએ મુશ્કેલી વેઠવી પડે છે. આ અંગે એક વૃદ્ધ મુસાફરે જણાવ્યું કે અનેકવાર રજૂઆત કરી પણ બસવાળા સાંભળતા નથી. બસમાં બેસવા કાયમ દોડવુ પડે છે. 23 કરોડના ખર્ચે બનાવેલુ બસ સ્ટેન્ડ પાણીમાં ગયુ તેવી પરિસ્થિતિ હાલ નિર્માણ પામી છે.
સ્માર્ટ ડિસ્પ્લે પણ નથી કરી રહ્યા કામ
સ્માર્ટ સિટી વડોદરા કેટલુ સ્માર્ટ છે તેતો આ સ્માર્ટ ડિસ્પ્લે બતાવી રહ્યા છે. ડિસપ્લે બોર્ડમાં કઇ બસ ક્યારે આવશે તેની જાણકારી પણ અપાતી નથી. માત્ર નામના જ ડિસ્પ્લે બોર્ડ છે તે કહેવુ કાંઇ ખોટુ નહીં. ત્યારે અહીં સવાલ એ થાય છે તંત્ર દ્વારા શા માટે આડેધડ મુસાફરોને અગવડતા પડે તે પ્રકારે દબાણો કરવામાં આવી રહ્યા છે. ક્યાં સુધી બસો પાછળ મુસાફરોએ દોડતા રહેવુ પડશે ? જો કોઇ ઇજાગ્રસ્ત થયુ તો જવાબદાર કોણ ?