મોંઘવારી / નવા વર્ષથી આટલી વસ્તુમાં મોંઘવારી વેઠવાની તૈયારી રાખજો, મોદી સરકારના નિર્ણયથી વધવાના છે ભાવ

• સામાન્ય માણસને વધુ એક ઝટકો 
• 1 જાન્યુઆરીથી મોંઘી થશે આ વસ્તુઓ 
• 5થી 12 ટકા વધી જશે GST

1 જાન્યુઆરીથી આ બધુ થઈ જશે મોંઘુ 

ભારતમાં આવતા વર્ષની શરૂઆતથી એટલે કે જાન્યુઆરી 2022થી દરેકના ખિસ્સા પર બોજ વધવાનો છે. સામાન્ય માણસને આવતા મહિના એટલે કે જાન્યુઆરી 1, 2022થી ઘણી વસ્તુઓ પર વધતા ટેક્સનો સામનો કરવો પડશે. તમને જણાવી દઈએ કે નવું વર્ષ તમારા માટે ખુશીઓ લઈને આવી રહ્યું છે પરંતુ મોંઘવારી તમને થોડી પરેશાન કરી શકે છે. કપડા અને ચંપલ અને ચપ્પલ ખરીદવાથી લઈને ખાવાનું ઓનલાઈન ઓર્ડર કરવું ઘણું મોંઘું થઈ જશે.

જીએસટીના દરો વધશે

મહત્વનું છે કે, 1 જાન્યુઆરીથી, રેડીમેડ ગારમેન્ટ્સ પર GSTનો દર 5% થી વધીને 12% થશે. તેનાથી રેડીમેડ કપડાના ભાવમાં વધારો થશે. કાપડના વેપારીઓનું કહેવું છે કે GST વધવાથી રિટેલ બિઝનેસ પર ખરાબ અસર પડશે. રેડીમેડના વેપાર સાથે સંકળાયેલા વેપારીઓ જીએસટીમાં વધારાનો વિરોધ કરી રહ્યા છે. જો કે સરકાર પોતાના નિર્ણયથી પીછેહઠ કરવાના મૂડમાં નથી.આવી સ્થિતિમાં ગ્રાહકોને નવા વર્ષથી તૈયાર વસ્ત્રો ખરીદવા માટે વધુ પૈસા ચૂકવવા પડશે. આ ટેક્સ સ્લેબમાં નવો ફેરફાર 1 જાન્યુઆરી, 2022થી લાગુ થશે.

GSTના દરમાં વધારાથી લોકો નાખુશ

સામાન્ય લોકો પણ GSTના દરમાં વધારાથી ખુશ નથી. લોકોનું કહેવું છે કે GST વધવાને કારણે કપડાના ભાવમાં નોંધપાત્ર વધારો થશે જેના કારણે સામાન્ય માણસને ઘણી મુશ્કેલીનો સામનો કરવો પડશે. કોરોનાના સમયમાં વેપારીઓ પહેલેથી જ પરેશાન છે. માર્કેટમાં બિલકુલ કામ નથી, GST વધ્યા બાદ વેપારી વધુ પરેશાન થશે.

આ રીતે ટેક્સ સ્લેબ બદલાશે

નોંધનીય છે કે અત્યાર સુધી 1,000 રૂપિયા સુધીની કિંમતના ફૂટવેર 5% GST હેઠળ આવે છે પરંતુ શૂઝ, એડહેસિવ, રંગો વગેરે 18% ટેક્સને આધિન છે, જેના કારણે ઇન્વર્સ ટેક્સ માળખું લાગુ થાય છે. આ સિવાય ચામડા પર 12% ટેક્સ લાગે છે. આ કારણે ઈનપુટ ટેક્સ ક્રેડિટ લેવી પડે છે અને સરકારે રિફંડ આપવાનું હોય છે. ફૂટવેરના મામલામાં સરકારે વાર્ષિક આશરે રૂ. 2,000 કરોડનું રિફંડ આપવું પડે છે. ફૂટવેર, કપડાં અને ખાતર પરની ડ્યુટી સ્ટ્રક્ચરમાં ફેરફાર ગયા વર્ષે જ જૂનમાં થવાનો હતો પરંતુ કોરોના રોગચાળાને કારણે તેને મોકૂફ રાખવામાં આવ્યો હતો.

ઓનલાઈન ફૂડ ઓર્ડર કરનારાઓને નવું વર્ષ ભારે પડશે.

કપડાં અને પગરખાં ઉપરાંત, જો તમે ખાવાનું ઓનલાઈન ઓર્ડર કરવાના પણ શોખીન છો, તો તમારા ખિસ્સાને ભારે ફટકો પડશે. કારણ કે 1 જાન્યુઆરીથી કંપનીઓએ ઓનલાઈન ફૂડ ડિલિવરી એપ ઝોમેટો એપ અને સ્વિગી એપ પરથી ફૂડ ઓર્ડર કરવા પર પણ ટેક્સ ચૂકવવો પડશે.

કંપનીઓ ગ્રાહકો પાસેથી પૈસા વસૂલશે

નવા વર્ષથી ફૂડ ડિલિવરી એપ્સ પર પણ 5% GST લાગશે. જો કે, તેનાથી યુઝર્સને કોઈ ફરક પડવાનો નથી કારણ કે તે પહેલાથી જ સ્પષ્ટ થઈ ગયું છે કે સરકાર આ ટેક્સ ગ્રાહકો પાસેથી નહીં, પરંતુ એપ કંપનીઓ પાસેથી વસૂલ કરશે. પરંતુ હંમેશા એવું રહ્યું છે કે જો સરકાર તરફથી કોઈ કંપની પર કોઈ બોજ હોય ​​તો એપ કંપનીઓ કોઈને કોઈ રીતે ગ્રાહકો પાસેથી વસૂલ કરે છે. આવી સ્થિતિમાં ઓનલાઈન ફૂડ ઓર્ડર કરનારાઓને નવું વર્ષ ભારે પડશે.