સુરતમાં વરસાદી માહોલ જોવા મળી રહ્યો છે ત્યારે ભારે વરસાદને કારણે મોટી દુર્ઘટના થતા રહી ગઇ, વહેલી સવારે બ્રિજનો ભાગ એકાએક નમી પડ્યો
સુરતમાં બ્રિજનો ભાગ એકાએક નમી પડ્યો
સુરત-ઓલપાડને જોડતા બ્રિજનો ભાગ નમી પડ્યો
ઓવરબ્રિજ નમી પડતા વાહન વ્યવહારને અસર
ગુજરાતમાં વરસાદી માહોલ જામ્યો છે. બનાસકાંઠા, રાજકોટ, સુરત સહિત વિવિધ વિસ્તારોમાં વરસાદ વરસી રહ્યો છે. ક્યાંક વરસાદ ખેડૂતો માટે આશીર્વાદ સમાન તો ક્યાંક ખેડૂતોને નુકસાન વેઠવાનો વારો આવ્યો છે. જો કે ધોધમાર વરસાદને કારણે તંત્રની પોલ પણ ખુલી જવા પામી છે. ત્યારે વાત કરીએ સુરતની તો સુરતમાં વહેલી સવારથી વરસાદ વરસી રહ્યો છે. ક્યાંક નીચાણવાળા વિસ્તારમાં પાણી ભરાયા તો ક્યાંય ડેમ ઓવરફ્લો થયો છે. પરંતુ વહેલી સવારે એક મોટી દુર્ઘટના ટળી !
બ્રિજનો ભાગ નમી પડ્યો
સુરત-ઓલપાડને જોડતા બ્રિજનો ભાગ એકાએક નમી પડ્યો. સરોલી ઓવરબ્રિજનો એક તરફનો ભાગ ધસી પડ્યો હતો. વહેલી સવારે 4 વાગ્યાની આસપાસ આ ઘટના બની હતી. જો કે કોઇ સદનસીબે જાનહાનિ થઇ હોવાનું સામે આવ્યુ નથી પરંતુ ઓવરબ્રિજ નમી પડતા વાહનવ્યવહારને અસર પહોંચી હતી. તંત્રએ બેરિકેડ મૂકીને ધસી ગયેલા ભાગને કોર્ડન કર્યો હતો. લગભગ 50થી 60 ફૂટ જેટલો બ્રિજનો ભાગ બેસી ગયો છે. વર્ષો પહેલા આ બ્રિજ રાજ્યના માર્ગ અને મકાન વિભાગ દ્વારા બનાવાયો હતો. માટી નાંખીને આજુબાજુ દિવાલ ચણીને આ એપ્રોચ રોડ બનાવી દેવાયો હતો જેને કારણે આ દુર્ઘટના સર્જાઇ. આ બ્રિજનો કોઇ ઓલ્ટરનેટીવ ન હોવાથી બ્રિજ ચાલુ રખાયો હતો. પરંતુ હાલ તો તંત્ર દ્વારા સમારકામની કામગીરી તાબડતોબ શરૂ કરી દેવામાં આવી છે.
ભારે વરસાદને કારણે આવુ થયુ- હેમાલી બોઘાવાલા, મેયર
આ અંગે સુરતના મેયર હેમાલી બોઘાવાલાએ સ્થળ મુલાકાત લીધી અને નિવેદન આપતા જણાવ્યું કે ભારે વરસાદને કારણે આવુ બન્યું. તાત્કાલિક અસરથી બ્રિજ બંધ કરવામાં આવ્યો છે. તેમજ બ્રિજના સમારકામનું કામ યુદ્ધના ધોરણે કરવામાં આવી રહ્યું છે. તો તંત્ર દ્વારા એમ પણ જણાવાયુ કે ઓલ્ટરનેટ રૂટ પણ બનાવવામાં આવી રહ્યો છે. અને નમી પડેલા બ્રિજનું તાત્કાલિક સમારકામ કરીને સાંજે સુધીમાં ખુલ્લો મુકી દેવાશે.
ઉમરપાડામાં નદી નાળા-છલકાયા
સુરતના ઉમરપાડા તાલુકામાં મુશળધાર વરસાદ વરસ્યો. ઉમરપાડામાં છેલ્લા 3 દિવસથી સતત વરસાદ વરસતા નદી નાળા છલકાયા. ઉમરપાડા તરફ જતા માર્ગો પરના નાળામાં પાણીની ભારે આવક થવા પામી. જે પાણી જાહેરમાર્ગ પર ફરી વળતા વાહન વ્યવહારને અસર થવા પામી હતી.
પરવત પાટિયા તરફ અવરજવર બંધ કરાઇ
સુરત-કડોદરા હાઇવે પાણીમાં ગરકાવ થયો. ભારે વરસાદને કારણે ખાડી વિસ્તાર જળબંબાકાર થયો. પરવત પાટીયા પાસે રસ્તા પર પાણી ભરાતા બે કિલોમીટર લાંબો ટ્રાફિકજામના દ્રશ્યો સર્જાયા હતા. કલાકો સુધી લોકો પાણીને કારણે રસ્તા પર અટવાયા હતા. જો કે સતત વરસાદ રહેતા પરવત પાટિયા તરફ અવરજવર બંધ કરાઇ. મોડલ ટાઉન પાર્ક પાણી-પાણી થયું. ઘૂંટણ સમા પાણી ભરાતા સ્થાનિકોએ હાલાકી વેઠવાનો વારો આવ્યો.
દુકાનોમાં ઘુસ્યા વરસાદી પાણી
તો આ તરફ સુરતના કીમ વિસ્તારમાં વરસાદી પાણી ફરી વળ્યા. કીમ વિસ્તારમાં 50થી વધુ દુકાનોમાં પાણી ઘુસી ગયા. તેમજ કીમ પૂર્વ વિસ્તારમાં વરસાદી પાણી ભરાયા હોવાનું સામે આવ્યું છે.
સુરતમાં મોડી રાત્રે ધોધમાર વરસાદ થતા ઠેર ઠેર પાણી ભરાવાના દ્રશ્યો જોવા મળ્યા હતા. દુકાનોમાં પાણી ભરાતા કરોડોના માલ-સામાનને નુકસાન પહોંચ્યુ છે.