કરુણાંતિકા / લગ્નના ઘરમાં છવાયો માતમ, ફેરાંના કલાકો પહેલા જ થયું વરરાજાનું મોત, સારવાર દરમિયાન મિત્રએ પણ ગુમાવ્યો જીવ

• બાઈક સ્લીપ ખાઈ જતાં બંન્ને મિત્રો રોડ પર પટકાયા 
• બન્ને મિત્રોના મોત થતાં વાહણા ગામ હિબકે ચઢ્યું હતું.
• એકનું પાલનપુર અને બીજાનું મહેસાણા દવાખાનામાં મોત નીપજ્યું હતું. 

બન્ને મિત્રોના મોત થતાં વાહણા ગામ હિબકે ચઢ્યું હતું.

સરસ્વતીના વાહણા ગામના બે મિત્રો ડીસાના ધરપડા ગામે ગત રવિવારે સાંજે બાઈક લઈને લગ્નમાં જઈ રહ્યા હતાં.તે દરમિયાન આસેડા નજીક અચાનક બાઈક સ્લીપ ખાઈ જતાં બંન્ને જણા રોડ પર પટકાતાં તેઓને ગંભીર ઈજાઓ થતાં ખાનગી વાહનમાં સારવાર અર્થે ડીસા અને ત્યાર બાદ પાલનપુર ખસેડવામાં આવ્યા હતા. જ્યાં બંનેનાં વારાફરતી મૃત્યુ થયા હતાં. ઇજાગ્રસ્ત ભરતજી બચુભાઈ ઠાકોરનું પાલનપુર હોસ્પિટલમાં સારવાર દરમિયાન મોત નીપજ્યું હતું. જ્યારે ભરતજી પ્રધાનજી ઠાકોરનું મહેસાણા ખાતે મંગળવારે રાત્રે મોત થયું હતું. બન્ને મિત્રોના મોત થતાં વાહણા ગામ હિબકે ચઢ્યું હતું.

ભરતજી પ્રધાનજી ઠાકોરના આજે જ લગ્ન હતાં 

મૃતક ભરતજી પ્રધાનજી ઠાકોરના 10 ફેબ્રુઆરી એટલે કે, આજે જ લગ્ન હતાં  જેના લગ્નના એક દિવસ અગાઉ અકસ્માતમાં મોત થતાં પરિવાર પર આભ તુટી પડ્યું હતું. મૃતક ભરતજી પ્રધાનજી ત્રણ બહેનો વચ્ચે એકનો એક ભાઈ હતો. લગ્નની કંકોત્રીથી માંડી બધી તૈયારીઓ થઈ ગઈ હતી. સગાં વહાલાં અને મિત્રોને આમંત્રણ માટે કંકોત્રીનું પણ વિતરણ થઈ ગયું હતું. પણ જે દિવસે શરણાઈના સૂર અને ઢોલ વાગવાના હતાં તે પહેલા માતમ છવાયો હતો. 

પિતાના મોતથી 6 માસના દીકરાએ પિતાની છત્ર છાયા ગુમાવી

આ અકસ્માતમાં મોતને ભેટેલા ભરતજી બચુજી ઠાકોર પરિણિત હતા અને પરિવારમાં 6 માસનો દીકરો પણ છે. આ નાનકડા બાળકે પિતા અને પત્ની તેમના પતિ ગુમાવતા મા- દિકરો નોંધારા બન્યા હતા. એક સાથે રોડ અકસ્માતમાં એક જ ગામના બે મિત્રોનાં મોત થતાં ગામમાં ગમગીની છવાઈ હતી.