ભારતીય ઘરમાં લગ્નો ખુબ જ ધામધૂમથી થાય છે. સંબંધ થાય ત્યારથી સગાઇ અને લગ્ન સુધી અનેક રિવાજો હોય છે. લગ્નને લઇને કેટલીક ધારણા હોય છે જેને તોડતો એક વીડિયો ખુબ વાયરલ થઇ રહ્યો છે.
લગ્ન બાદ વિદાય સમયે કન્યાની આંખમાં આંસુ સાથે પતિ સાથે કારની બેક સીટ પર બેસવુ અને સાસરે જવુ આ જ પ્રકારની માન્યતા હંમેશાથી ચાલતી આવી છે પરંતુ એક વીડિયો ઇન્ટરનેટ પર વાયરલ થઇ રહ્યો છે. જેમાં કન્યા પોતે ગાડી ચલાવીને સાસરે જઇ રહી છે.
વાયરલ થયો અનોખી વિદાયનો વીડિયો
આજકાલ સોશ્યલ મિડીયા પર એક દુલ્હનની વિદાયનો વીડિયો વાયરલ થઇ રહ્યો છે. લાલ પાનેતરમાં અને લગ્નના ઘરેણા પહેરેલી દુલ્હન ડ્રાઇવિંગ સીટ પર બેઠી છે અને એક સુંદર સ્મિત સાથે વીડિયો અને તસવીર વાયરલ થઇ રહી છે. આ વીડિયો ઇન્ટરનેટ પર ખુબ વાયરલ થઇ રહ્યો છે. આ દુલ્હનનુ નામ સ્નેહા સિંઘી છે અને તે કોલકાતાની રહેવાસી છે.
પતિને લઇને સાસરે પહોંચી દુલ્હન
સ્નેહા પ્રોફેશનલી એક શેફ છે અને કોલકાતામાં તેના ઘણા કેફે છે. પોતાની વિદાયમાં તેણે સ્ટીરિયોટાઇપથી હટીને પોતે જ ગાડી ડ્રાઇવ કરી હતી. ગાડીની બાજુની સીટમાં તેનો પતિ સૌગાત ઉપાધ્યાય બેઠો છે અને બેક સિટ પર તેનો દિયર ગૌહર છે. બેકગ્રાઉન્ડમાં સ્નેહાના સસરાનો અવાજ આવી રહ્યો હતો, તેમને ચિંતા થઇ રહી હતી કે વહુ પાનેતરમાં કેવી રીતે ડ્રાઇવ કરશે ત્યારે તેના પતિએ સમજાવ્યા કે તે મેનેજ કરી લેશે.
મજાકમાં કરી હતી ડ્રાઇવિંગની વાત
સ્નેહાએ મિડીયા સાથેની વાતચીતમાં જણાવ્યું કે તેણે પોતાના પતિને મજાકમાં કહ્યુ હતુ કે વિદાય વખતે તે કાર ડ્રાઇવ કરશે. બાદમાં તે વાતને ભૂલી ગઇ હતી પરંતુ વિદાય વખતે તેના પતિએ તેને યાદ કરાવ્યુ અને તે કાર ચલાવીને સાસરે પહોંચી ગઇ એટલુ જ નહી વિદાય વખતે તેણે હસી-ખુશીથી પિયરના લોકોને બાય પણ કહ્યું.