મેડીકલ સ્ટોરના લાયસન્સ માટે લાંચ માગનાર અધિકારી ફરાર વચેટિયો ઝપટમાં

સુરતમાં ફૂડ અન્ડ ડ્રગ્સના એક અધિકારીની લાંચ માગવાની ઘટના સામે આવી છે. શહેરના કાપોદ્રા વિસ્તારમાં એક વ્યક્તિએ મેડિકલ સ્ટોર શરૂ કરવા માટે લાઈસન્સ કઢાવવા માટે ફૂડ એન્ડ ડ્રગ્સના એક અધિકારીએ તેની પાસેથી રૂપિયા 25 હજારની માંગણી કરી હતી. એટલું જ નહીં પણ જો આ 25 હજારની રહમ નહીં મળે તો લાઈસન્સ પણ નહી મળે તેવી ધમકી પણ આ અધિકારીએ આપી હતી. 

જો કે બાદમાં સમગ્ર મામલો 18 હજારમાં વચેટિયા કેવિન નામના વ્યક્તિ મારફતે સેટલ કરવામાં આવ્યો હતો. નક્કિ કરેલી રકમ વચેટિયો વ્યક્તિ એટલે કે કેવિન લેવા માટે પહોંચ્યો હતો અને તેજ સમયે એસીબીએ આવીને તેની રંગે હાથે ઝડપી પાડયો હતો. જો કે આ ઘટનાનો મુખ્ય આરોપી નવનીત માલાણી ફરાર થવામાં સફળ રહ્યો હતો.

ડ્રગ્સ ઈન્સપેક્ટર નવનીત માલાણીને વોન્ટેડ જાહેર કરીને ACB દ્વારા વધુ તપાસ હાથ ધરવામાં આવી છે.  
ઉલ્લેખનીય છે કે ગત મોડી રાત્રીના સમયે કેવિન આ નાણાં લેવા માટે કાપોદ્રા વિસ્તારમાં આવ્યો હતો જ્યાં તે એસીબીના છટકામાં ઝડપાઇ ગયો હતો. જોકે આ મામલાનો મુખ્ય આરોપી નવનીત માલાણીને જ્યારે એસીબીના છટકાની વાત માલુમ પડતાની સાથે તે ફરાર થઈ ગયો હતો.

હાલ ACB દ્વારા તેને વોન્ટેડ જાહેર કરી તેની તપાસ શરૂ કરી છે. હાલ તો આ આરોપી અધિકારી ફરાર છે પણ તેની શોધખોળ ACB કરી રહી છે. જો કે ફૂડ એન્ડ ડ્રગ વિભાગમાં ACB તપાસ કરે તો અનેક આવા કેસ સામે આવી શકે એમ છે.