વળાંક / બનાસકાંઠામાં આત્મહત્યા કરેલી યુવતીની લાશ એક સપ્તાહ પછી બહાર કઢાઈ, ચોંકાવનારો ઘટસ્ફોટ

• પાંથવાડાની ચકચારી ઘટના
• આત્મહત્યા કેસમાં નવો વળાંક 
• સપ્તાહ બાદ લાશને પોસ્ટમોર્ટમ માટે કઢાઈ  

બનાસકાંઠાના નાના એવા ગામમાં સપ્તાહ પૂર્વે બનેલી અરેરાટીભરી ઘટનામાં નવો વળાંક આવ્યો છે. સપ્તાહ પૂર્વે પાંથવાડા ગામની યુવતીએ આત્મહત્યા કરી હતી.આ કેસમાં પરિવારજનોને મૃતક યુવતી પર દુષ્કર્મ અને બ્લેકમેલિંગ થયાના યુવતીના અવાજમાં પૂરાવા મળતા ત્રણ શખ્સો સામે ફરિયાદ નોંધાઈ છે. પરિવારજનોએ પોસ્ટમોર્ટમની  માંગણી કરતા દફનાવાયેલી યુવતીના અવશેષોને પોસ્ટમોર્ટમ માટે મોકલી અપાયા છે. 

પરિવારજનોના પગ નીચેથી સરકી ગઈ જમીન 

ઘટનાની વિગત પ્રમાણે, બનાસકાંઠા પછાત ગણાતા પાંથવાડા વિસ્તારની એક યુવતીએ ગત સપ્તાહે ઘરમાં જ આત્મહત્યા કરી મોત વહાલું કર્યું હતું. પરિવારજનો પણ સ્તબ્ધ હતા કે, યુવતી એ આવું અંતિમ પગલું ભરવાનું કોઈ દેખીતું કારણ પણ નહતું. શોકસંતપ્ત પરિવારજનોના હાથમાં મૃતક યુવતીનો મોબાઈલ આવ્યો. મોબાઈલમાં યુવતીના અવાજમાં સગા સાથે વાતચીતનું રેકોર્ડીંગ પણ મળ્યું.આ રેકોર્ડીંગ સંભાળતા જ પરિવારજનોના પગ તળેથી જમીન સરકી ગઈ.

આપવીતીનું રેકોર્ડીંગ યુવતીના મોબાઈલમાં 

મૃતક યુવતીએ પોતાના સગા સાથે જે વાતચિત કરી હતી તેનું રેકોર્ડીંગ ફોનમાં હતું.આ વાતચીતમાં યુવતી પોતાની આપવીતી કહી રહી હતી. યુવતીના અવાજમાં રેકોર્ડીંગ પ્રમાણે,પોતાના જ ગામના બે યુવકો અને અન્ય એક યુવક એમ ત્રણ શખ્સોએ એક હોટેલમાં લઇ જઈ યુવતી સાથે દુષ્કર્મ આચર્યું હતું. ત્યાર બાદ અશ્લીલ વિડીયો પણ બનાવ્યો હતો. બાદમાં,વારંવાર યુવતી સાથે વાતચિત કરી યુવકો ધાક ધમકી આપતા હતા અને સોશિયલ મીડિયામાં વિડીયો વાયરલ કરી દેવાની ધમકીઓ પણ આપતા હતા. પરીવારજનો,મોબાઈલ રેકોર્ડીંગને પૂરાવા રૂપે પાંથવાડા પોલીસ મથકે લઇ ગયા અને ત્રણ ઇસમો વિરુદ્ધ દુષ્કર્મ,ધાક-ધમકી,બ્લેક મેલિંગ,આત્મહત્યા માટે મજબૂર કર્યા સબબની ફરિયાદ નોંધાવી હતી. પરિવારજનોએ યુવતીના  પોસ્ટમોર્ટમ માટે પણ માંગણી કરી હતી.

યુવકોને ઝડપી લેવા ચક્રો ગતિમાન 
સમગ્ર ઘટનામાં નવો વળાંક આવતા પોલીસે ત્રણ યુવકો  મહેન્દ્ર ઉર્ફે ભુરો ગોવિંદ પુરોહિત, તેનો ભાઇ નટવર ઉર્ફે નમન ગોવિંદ પુરોહિત અને દાંતીવાડાના ધનિયાવાડાના રતનસિંહ ધોખાજી રાઠોડ સામે વિધિવત ફરિયાદ નોંધી કાર્યવાહી હાથ ધરી છે. તો મૃતક યુવતીના પોસ્ટ મોર્ટમની માંગ કરાતા શુક્રવારે દાંતીવાડા મામલતદાર તેમજ પાંથાવાડા પોલીસ તેમજ થરાદ ડિવિઝનના એસસીએસટી સેલના ડીવાયએસપી ની હાજરીમાં મૃતક યુવતીના કંકાલને 7 દિવસે બહાર કઢાયું હતું. ઘટનાને લઇ સમાજના લોકો ઘટના સ્થળે ઉમટયા હતા. જોકે મામલતદાર અને પોલીસ વિભાગના અધિકારીઓની હાજરીમાં બહાર કઢાયેલા કંકાલ ને પીએમ અર્થે ખસેડી પોલીસે આરોપીઓને ઝડપી પાડવા ચક્રો ગતિમાન કર્યા છે