ભાવનગરમાં સ્ટેટ GST વિભાગની ટીમે 322 પેઢીમાં દરોડા પાડ્યા છે જેમાં 229 બોગસ પેઢીમાંથી 2750 કરોડનું બોગસ બિલિંગ ઝડપી પાડવામાં આવ્યું છે. આમ બોગસ બિલિંગ બનાવીને મોટા પાયે કૌભાંડ આચરવામાં આવતું હોવાનું સામે આવ્યું છે. સ્ટેટ GSTની ટીમ દ્વારા ચકાસણીની કામગીરી કરવામાં આવી જેમાં 72 ટકા પેઠી બોગસ હોવાનું સામે આવ્યું છે. ત્યારે બોગસ પેઢીઓના રજિસ્ટ્રેશન રદ્દ કરી આગળની કાર્યવાહી શરૂ કરવામાં આવી છે.
ભાવનગરમાં 2750 કરોડનું બોગસ બિલિંગ કૌભાંડ ખુલ્યુ
મહત્વનું છે કે આટલું મોટું કૌભાંડ સામે આવ્યા બાદ હવે GST વિભાગ દ્વારા નવા રજીસ્ટ્રેશનની પ્રક્રિયા પણ વધુ કડક બનાવવામાં આવી રહી છે, સ્ટેટ જીએસટીના ભાવનગર એકમ દ્વારા શંકાસ્પદ વ્યવહારો ધરાવતી પેઢીઓને ડેટા એનાલીસીસના આધારે સર્ચ ઓપરેશન હાથ ધરવામાં આવ્યું હતું.
જેમાં અમદાવાદ-સુરતના ઇન્સપેક્ટરો ટીમને સાથે રાખીને ભાવનગરમાં 322 પેઢીઓ પર દરોડા પાડવામાં આવ્યા હતા જેમાંથી 229 પેઢીઓ બોગસ મળી આવતા ચકચાર મચી ગઈ છે જ્યારે અન્ય વેપારીઓમાં ફફડાટ વ્યાપી ગયો છે સમગ્ર મામલે સ્ટેટ GST વિભાગે કાર્યવાહી કરતા આવી પેઢીઓના રજીસ્ટ્રેશન રદ્દ કરાવવાની પ્રક્રિયા હાથ ધરી છે
સ્ટેટ GSTની કામગીરીમાં 72 ટકા પેઢી બોગસ મળી
સ્ટેટ જીએસટીના અધિકારીઓ દ્વારા પેઢીના સરનામા, દસ્તાવેજો, માલીકોના નામ, રજીસ્ટ્રેશનમાં દર્શાવવામાં આવ્યા મુજબનો ધંધો થાય છે કે કેમ, ટ્રેડિંગ કંપની હોય તો ખરીદ-વેચાણની માહિતી, સ્ટોરેજ ગોડાઉન અંગે અધિકારીઓ દ્વારા તપાસ હાથ ધરવામાં આવી હતી, મહત્વનું છે કે સ્ટેટ GST વિભાગના ડેટા એનાલિસીસમાં જ પેઢીઓ પ્રવૃતિઓ શંકાસ્પદ જણાઇ આવતા 2750 કરોડનું બોગસ બિલિંગ કૌભાંડ ઝડપી પાડવામાં આવ્યું છે. આમ સ્ટેટ GST વિભાગની કાર્યવાહીમાં 72 ટકા કિસ્સામાં પેઢીઓ બોગસ મળી આવી છે. જે મામલે સ્ટેટ GST વિભાગે આગળની કાર્યવાહી હાથ ધરી છે.