ચિમકી / હડતાળના કારણે સતત 3 દિવસ બૅન્ક બંધ રહે તેવી શક્યતા, તારીખો જાણી લેજો નહીંતર ધક્કો પડશે 

• ફાઈવ-ડે વીકની માગણીને લઈ 27 જૂને સરકારી બૅન્ક કર્મીઓની હડતાળ
• ત્રણ દિવસ સુધી બૅન્ક બંધ રહેશે, નવ બૅન્ક યુનિયનોનું એલાન
• દેશભરના સાત લાખ બૅન્ક કર્મચારીઓ આ હડતાળમાં જોડાશે

જૂનના છેલ્લા સપ્તાહમાં સરકારી બૅન્કોના કર્માચારીઓ હડતાળ પર જવાની ચીમકી

જૂન મહિનાના આખરી સપ્તાહમાં જાહેર ક્ષેત્રની સરકારી બૅન્કોના કર્મચારીઓ હડતાળ પર જઈ શકે છે. હકીકતમાં નવ બૅન્ક યુનિયનની સંયુક્ત સંસ્થા યુનાઈટેડ ફોરમ ઓફ બૅન્ક યુનિયન (UFBU)એ 27 જૂને હડતાળ પર જવાની ચીમકી આપી છે. UFBUએ જણાવ્યું છે કે જો સરકાર તેમની માગણીઓ સ્વીકારશે નહીં તો સરકારી બૅન્કોના કર્મચારીઓ એક દિવસ કામકાજથી અળગા રહેશે.

જો કર્મચારીઓ 27 જૂને હડતાળ પાડશે સતત ત્રણ દિ' સુધી બંધ રહેશે

જો કર્મચારીઓ 27 જૂને હડતાળ પાડશે તો બૅન્કો સતત ત્રણ દિવસ સુધી બંધ રહેશે, કારણ કે 25 જૂને મહિનાનો ચોથો અને છેલ્લો શનિવાર છે અને 26 જૂને રવિવાર છે. આ બંને દિવસોએ બૅન્કોમાં સામાન્યતઃ રજા હોવાથી ત્રણ દિવસ સુધી બૅન્કનાં તમામ કામકાજ ખોરવાશે. ઉલ્લેખનીય છે કે, UFBUએ ઘણા લાંબા સમયથી બૅન્કોમાં પાંચ દિવસનું સપ્તાહ એટલે કે ફાઈવ-ડે વીક લાગુ કરવાની માગણી કરી છે. તેમનું કહેવું છે કે બૅન્કો સપ્તાહમાં માત્ર પાંચ દિવસ જ ચાલવી જોઈએ. પ્રાઈવેટ સેક્ટરની મોટા ભાગની બૅન્કોમાં આ નિયમન લાગુ છે.

દેશભરના સાત લાખ બૅન્ક કર્મચારીઓ આ હડતાળમાં જોડાશે

UFBUએ જણાવ્યું છે કે જો સરકાર ફાઈવ-ડે વીક અને પેન્શન સંબંધી તેમની અન્ય માગણીઓ સ્વીકારશે નહીં તો સરકારી બૅન્કોના કર્મચારીઓ 27 જૂને અવશ્ય હડતાળ પાડશે. ઓલ ઈન્ડિયા બૅન્ક ઓફિસર્સ કન્ફેડરેશન (AIBOC)ના જનરલ સેક્રેટરી સૌમ્યા દત્તાએ જણાવ્યું છે કે, દેશભરના સાત લાખ બૅન્ક કર્મચારીઓ આ હડતાળમાં જોડાશે. ઓલ ઈન્ડિયા બૅન્ક એમ્પ્લોઈ એસોસિયેશનના જનરલ સેક્રેટરી સી.એચ. વેંકટચલમે UFBUની બેઠક બાદ જણાવ્યું હતું કે તેમની માગણીઓમાં ફાઈવ-ડે વીક ઉપરાંત પેન્શનધારકો માટે પેન્શન યોજનામાં સુધારા, રાષ્ટ્રીય પેન્શન યોજનાની નાબૂદી અને તમામ બેન્ક કર્મચારીઓ માટે જૂની પેન્શન યોજના પુનઃ શરૂ કરવા વગેરેનો સમાવેશ થાય છે.