માનવતાને લાંછન / બનાસકાંઠામાં 4 દિવસના બાળકને થેલામાં ભરી બાંકડા પર મૂકી ગયો શખ્સ, રડવાનો અવાજ આવતા ઘટના આવી સામે

•  ભાભરના બોરિયા ગામે માનવતાને લાંછન લગાવતી ઘટના
• અજાણ્યો શખ્સ બંધ થેલામાં બાળકને ત્યજીને થયો ફરાર
• 3-4 દિવસનું બાળક થેલામાં બંધ કરીને બાંકડા પર મૂકીને ફરાર 

રાજ્યમાં  નવજાત બાળકને ત્યજી દેવાની ઘટના વધી રહી છે. અવારનવાર આવી ઘટનાઓ સામે આવી રહી છે ત્યારે વધુ એકવાર ગુજરાતમાં  માનવતાને લાંછન લગાવતો કિસ્સો સામે આવ્યો. કૂમળા ફુલ જેવા બાળકને કોઇ કોથળામાં પુરીને રઝળતુ મુકી દીધુ.  આ ઘટના છે બનાસકાંઠાના ભાભરની. અજાણ્યા શખ્સો બંધ થેલામાં બાળકને ત્યજીને ફરાર થઇ ગયા. આ મામલે  ભાભર પોલીસે વધુ તપાસ હાથ ધરી છે.

કોથળામાં બંધ બાળક મળી આવ્યું

ભાભરના બોરિયા ગામે માનવતાને શર્મસાર કરતી આ ઘટના બની. 3-4 દિવસનું બાળક કોઇ બંધ થેલામાં મૂકીને ફરાર થઇ ગયુ. બાંકડા પરથી આ થેલો મળી આવ્યો હતો. જ્યારે બાળકનો રડવાનો અવાજ આવ્યો તો આસપાસના લોકો દોડી આવ્યા હતા અને 108ને જાણ કરી. 108 દ્વારા  બાળકને  સારવાર અર્થે ભાભર સામૂહિક આરોગ્ય કેન્દ્રમાં લઇ જવામાં આવ્યું છે. હાલમાં બાળકની સારવાર  ચાલી રહી છે. 

માનવતા થઇ શર્મસાર 

ત્યારે અહીં સવાલ એ થાય કે કૂમળા છોડ જેવા બાળકને છોડતા એ માનો જીવ કેવી રીતે ચાલ્યો ? 9 મહિના સારસંભાળ રાખીને પોતાના પેટમાં ઉછરેલા બાળકને એક મા કેવી રીતે તરછોડી શકે ?  કે પછી માની જાણ બહાર તેના બાળકને કોઇ આ રીતે મૂકી ગયું ? બાળકનો જન્મ થાય એટલે ઘરમાં કેટલી ખુશી હોય, કેટલો હરખ હોય. પરિવારનો દરેક વ્યક્તિ એક એક પળ બાળક સાથે વિતાવવા આતુર હોય છે ત્યારે નવજાત બાળકને બંધ થેલામાં મૂકીને ફરાર થઇ જવુ એ કેટલી હદે ક્રૂરતા છે.

દાહોદમાં પણ નવજાત બાળક મળી આવ્યું.

ગઈ કાલે દાહોદમાં ત્યજી દેવાયેલું નવજાતશીશું મળી આવ્યું હતું. નાની ખરજ ગામેથી ત્યજી દેવાયેલું બાળક મળી આવ્યું. નિષ્ઠુર જનેતાએ પોતાનું પાપ છુપાવવા બાળકને રોડ ઉપર ત્યજી દીધું. એમ્બ્યુલન્સને અને  પોલીસ પણ ઘટના સ્થળે પહોંચી કાર્યવાહી હાથ ધરી. મૃતદેહને પોસ્ટમોટમ માટે લઈ જવાયો હતો.