મુંદ્રા પોર્ટ બાદ હવે કંડલા પોર્ટ ઉપર ડ્રગ્સનો મોટો જથ્થો ઝડપાતાં ખળભળાટ , આ મામલે DRIને સોંપાઇ તપાસ
કંડલા પોર્ટ પર ડ્રગ્સનો જથ્થો ઝડપાયો
કન્ટેનર ફ્રેઇટ સ્ટેશન પરથી 250 કિલો ડ્રગ્સનો જથ્થો મળી આવ્યો
કસ્ટમ વિભાગના અધિકારીની સંડોવણી હોવાની શક્યતા
ગુજરાતનો દરિયાકાંઠો ડ્રગ્સની હેરફેર માટેનું એપી સેન્ટર બની ગયો છે, કારણ કે એક પછી એક કરોડો રૂપિયાના ડ્રગ્સનો જથ્થો સુરક્ષા એજન્સીઓ પકડી રહી છે. 21એપ્રિલે કચ્છના કંડલા બંદરેથી થોડાક જ દૂર આવેલા સીએફએસ (કન્ટેનર ફ્રેઇટ સ્ટેશન) પરથી 2500 કરોડ રૂપિયાના 250 કિલો ડ્રગ્સનો જથ્થો મળી આવતાં ચકચાર મચી ગઇ છે. આ ઘટનામાં ચોંકાવનારી વાત એ છે કે ડ્રગ્સનો જથ્થો છ મહિનાથી બિનવારસી પડ્યો રહ્યો હતો, જેની જાણ સ્થાનિક કસ્ટમ અધિકારીઓને હતી નહીં. સૂત્રોના જણાવ્યા અનુસાર ડ્રગ્સ ઘુસાડવાના રેકેટમાં કેટલાક ભ્રષ્ટ કસ્ટમના અધિકારીઓની સંડોવણી હોવાની પણ આશંકા સેવાઇ રહી છે. એટીએસ અને ડીઆરઆઇની ટીમે સંયુક્ત ઓપરેશન કરીને ડ્રગ્સનો જથ્થો ઝડપી પાડ્યો છે.
પાવડરની આડમાં ડ્રગ્સ લવાયું
મુંદ્રા પોર્ટ બાદ હવે કંડલા પોર્ટ ઉપર ડ્રગ્સનો મોટો જથ્થો ઝડપાતાં ખળભળાટ મચ્યો છે. આ વખતે ઝડપાયેલું ડ્રગ્સ પણ પાઉડરની આડમાં લાવવામાં આવતું હતું. આ ડ્રગ્સ ઉચ્ચ ગુણવત્તાનું હોવાની વાત જાણવા મળી છે. એક કન્ટેનરમાં 250 કિલો ડ્રગ્સ ઓપરેશન દરમિયાન મળી આવ્યું હતું, જેની આંતરરાષ્ટ્રીય બજાર કિંમત જોઇએ તો 2500 કરોડની આસપાસ થાય છે.
એટીએસની બાતમી અને તપાસ કરશે DRI
એટીએસની બાતમીના આધારે ડ્રગ્સ ઝડપાયું છે. આ બાબતની તપાસ ડીઆરઆઇએ લઇ લીધી છે. સૂત્રોના જણાવ્યા અનુસાર 250 કિલો ડ્રગ્સ થોડા દિવસો પહેલાં નહીં, પરંતુ અંદાજિત છ મહિના પહેલાં આવ્યું હતું. ડ્રગ્સના કન્ટેનરને ચેક કર્યા વગર તેને બારોબાર કન્ટેનર ફ્રેઇટ સ્ટેશનમાં મોકલી દેવાયું હતું. આ ઘટનામાં કેટલાક કસ્ટમના ભ્રષ્ટ અધિકારીઓની સંડોવણી સામે આવે તેવી શક્યતા છે, જેના કારણે આ કેસની તપાસ હવે ડીઆરઆઇ કરશે.એટીએસના ડીવાયએસપી બી.પી. રોજિયાએ જણાવ્યું છે કે ડ્રગ્સ કેસની તપાસ ડીઆરઆઇ કરી રહ્યું છે, જેથી એટીએસ કોઇ માહિતી નહીં આપી શકે. ડીઆરઆઇ હાલ ડ્રગ્સ મામલે કાર્યવાહી કરી રહી છે.
છ મહિના પહેલા કંડલા પોર્ટ પર લવાયુ હતુ ડ્રગ્સ
પોર્ટ પર રોજેરોજ હજારો કન્ટેનર વિદેશથી દરિયાઇ રસ્તે આવી રહ્યાં છે. તમામ કન્ટેનરનું ચેકિંગ કરવાની જવાબદારી પોર્ટ પર તહેનાત કસ્ટમ વિભાગની હોય છે. કન્ટેનરમાં રહેલી ચીજવસ્તુઓનું ચેકિંગ થયા બાદ તેને બહાર કાઢવામાં આવે છે. છ મહિના પહેલાં 2500 કરોડ રૂપિયાનું ડ્રગ્સ કન્ટેનરમાં ભરીને કંડલા પોર્ટ પર લાવવામાં આવ્યું હતું, જેનું ચેકિંગ થયા બાદ તેને સીએફએસ ખાતે રાખવામાં આવ્યું હતું. ગુજરાત એટીએસ તેમજ ડીઆરઆઇએ ગઇ કાલે સંયુક્ત ઓપરેશન પાર પાડીને કન્ટેનરમાંથી ડ્રગ્સનો જથ્થો ઝડપી પાડ્યો હતો. સૂત્રો પાસેથી મળેલી વિગત અનુસાર આ ડ્રગ્સ અફઘાનિસ્તાનથી કંડલા પોર્ટ પર લાવવામાં આવ્યું હતું.
આ કેસ એજન્સીની સફળતા કે નિષ્ફળતા નક્કી કરશે
બાતમી મળે ત્યારે એટીએસ, ડીઆરઆઇ સહિતની એજન્સીઓ ડ્રગ્સનો જથ્થો પકડે છે, પરંતુ આ સિવાય કેટલા હજાર કરોડ રૂપિયાનું ડ્રગ્સ આવતું હતું, જેનો પર્દાફાશ થતો નથી. ડ્રગ્સ માફિયાઓની મોડસ ઓપરેન્ડીની ખબર પડી ગઇ હોવા છતાંય કન્ટેનર ફ્રેઇટ સ્ટેશનમાં આ ડ્રગ્સ કેવી રીતે પહોંચ્યું. એજન્સીઓને શંકા છે કે ડ્રગ્સથી ભરેલા આવાં ઘણાં કન્ટેનર હોઈ શકે છે. હાલમાં તપાસ ચાલી રહી છે. મહત્ત્વનું એ છે કે રો-ડ્રગ્સ અફઘાનિસ્તાન અને ઇરાન મારફતે ભારત લાવવામાં આવતું હોય છે. ત્યારબાદ બીજા દેશોમાં મોકલવામાં આવતું હોય છે. અગાઉ પણ ઝડપાયેલા ડ્રગ્સના મોટા જથ્થાને પણ આ રીતે જ લાવવામાં આવ્યો હતો, તેની ખપત ભારતમાં થવાની ન હતી.