સલામ / અમદાવાદ પોલીસની પ્રશંસનીય કામગીરી, પરિવારથી વિખૂટા પડેલા યુવકનું કરાવ્યું મિલન

અમદાવાદ પોલીસે માનસિક અસ્થિર યુવકનો પરિવાર સાથે કરાવ્યો ભેટો

25 વર્ષીય  મનોજ સિંગ નામનો આ યુવક માનસિક રીતે અસ્થિર છે. પરંતુ તે હવે જલદી ઠીક થઈ જશે તેવું લાગે છે કેમ કે, અમદાવાદ પોલીસના માનવતાભર્યા અભિગમના કારણે આ યુવકનું મિલન હવે તેના પરિવારજનો સાથે થઈ ગયું છે. આ યુવક સાથે જોવા મળતાં તેના પરિજન ઉત્તરપ્રદેશના પીલીભીતથી આજે તેને લેવા માટે અમદાવાદ આવ્યા છે. 

પરિવારે આશા છોડી પરંતુ અમદાવાદ પોલીસ આવી મદદે 

દોઢ મહિના પહેલા ઉત્તરપ્રદેશથી ગુમ થયેલા રાજેન્દ્રની તેના પરિવારે ઘણી શોધ કરી હતી પરંતુ તે મળી આવ્યો ન હતો. પરિવારે રાજેન્દ્ર પરત મળશે તેની આશા પણ છોડી દીધી હતી. પરંતુ અમદાવાદ પોલીસે રાજેન્દ્રના પરિવારની શોધ કરી અને આખરે યુવકને તેનો પરિવાર મળી ગયો. 

મનોજ નામના દિવ્યાંગ યુવકનું તેના પરિવાર સાથે મિલન કરાવનારી ઘટના જેટલી માનવીય અભિગમના દર્શન કરાવે છે તેટલી જ પોલીસની મહેનત અને ટેકનોલોજીના સદુપયોગની વાત પણ જણાવી રહી છે. આ યુવક ગત 10 ઓગસ્ટના રોજ અમદાવાદ એરપોર્ટ પરથી રખડતી હાલતમાં સીઆઈએસએફને મળી આવ્યો હતો. પોલીસે પહેલાતો તેને કોઈ ગુનાઈત પ્રવૃત્તિમાં સંડોવાયેલો માનીને તેના વિરુદ્ધ ગુનો નોંધ્યો હતો. 

25 વર્ષીય યુવકને મેન્ટલ હોસ્પિટલમાં કરાયો દાખલ

પરંતુ તપાસ દરમિયાન સામે આવ્યુ કે, ઝડપાયેલ યુવક રાજેન્દ્ર ઉર્ફે સોકા પુશદ સિંગ માનસિક બીમાર છે. આથી તેને મેન્ટલ હોસ્પિટલમાં સારવાર માટે દાખલ કરવામાં આવ્યો, પરંતુ યુવક કોણ છે, ક્યાંથી આવ્યો હતો ,પરિવાર ક્યાં છે, તે અંગે કોઈ જ હકીકત સામે આવી ન હતી, પરંતુ પોલીસે 25 વર્ષીય રાજેન્દ્રની સારવાર દરમિયાન પ્રેમથી પૂછપરછ કરતાં તેણે પોતાના ગામનું નામ ખમરીયા પુલ જણાવ્યુ હતું પરંતુ ગામ ક્યાં છે. પોતાનું સાચુ નામ શુ તે અંગે તેણે કોઈ હકીકત જણાવી ન હતી.

ઇન્ટરનેટના માધ્મય થકી શોધવામાં આવ્યો પરિવારને 

જો કે, ત્યારબાદ પોલીસે ટેક્નોલોજી અને ઈન્ટરનેટનો સહારો લીધો, પોલીસે ખમરીયા પુલ ગામનું નામ ગુગલ મેપમાં સર્ચ કરીને તપાસ કરી તો આ ગામ ઉત્તર પ્રદેશમાં હોવાનુ સામે આવ્યુ,   પોલીસે  તે ગામની મોબાઈલની દુકાનનો એક કોન્ટેક્ટ નંબર પણ સોશિયલ મીડીયા દ્વારા મેળવ્યો. બાદમાં પોલીસ તે મોબાઈલ ધારક સાથે વાત કરી યુવકનો ફોટો મોકલ્યો. એ વ્યક્તિ રાજેન્દ્રને ઓળખી બતાવ્યો અને પરિવારને જાણ કરી.  

VTV ની સલામ 

પોલીસની  ફરજ નિષ્ઠા અને ટેકનોલોજીની મદદનો સમન્વય સમાજ માટે  કેટલાક  ઉપકારક બની રહે છે તેણે આ વાત પરથી સાબિત કરી આપ્યું છે. ટેકનોલોજીની મદદથી પોલીસ ગુનેગારોને જેલના સળિયા પાછળ ધકેલી શકે છે. સાથે વિખૂટા પડેલા નાગરિકોની ઘરવાપસી પણ કરાવી શકે છે. અમદાવાદ પોલીસના માનવતા ભર્યા અભિગમને વીટીવીના સો સો સલામ.