આગામી ટી-20 વર્લ્ડકપ વેસ્ટ ઇન્ડીઝ અને અમેરિકાનાં મેદાનોમાં રમાવાનો છે. જેમાં ના તો ફર્સ્ટ રાઉન્ડ હશે કે ના તો સુપર-12 રાઉન્ડ હશે. ટી-20 વર્લ્ડકપમાં કુલ 20 ટીમ ભાગ લેશે.
T20 ફોર્મેટમાં થયા મોટા ફેરફાર
2024ના વર્લ્ડ કપમાં 16 નહીં 20 ટીમો રમશે
જાણો તેના વિશે વિગતે
T20 વર્લ્ડકપ, 2022નો ખિતાબ ઈંગ્લેન્ડે જીત્યો હતો. હવે આઇસીસીએ આગામી 2024માં રમાનારા T20 વર્લ્ડકપની તૈયારીઓ શરૂ કરી દીધી છે. આ વર્લ્ડકપ માટે આઇસીસીએ ફોર્મેટમાં મોટા ફેરફાર કર્યા છે.
આગામી T20 વર્લ્ડકપ વેસ્ટ ઇન્ડીઝ અને અમેરિકાનાં મેદાનોમાં રમાવાનો છે. જેમાં ના તો ફર્સ્ટ રાઉન્ડ હશે કે ના તો સુપર-12 રાઉન્ડ હશે. T20 વર્લ્ડકપમાં કુલ 20 ટીમ ભાગ લેશે. ચાર ગ્રૂપ રહેશે દરેક ગ્રૂપમાં પાંચ ટીમને રખાશે.
બે-બે ટોપની ટીમ સેમિફાઈનલમાં લેશે એન્ટ્રી
વર્ષ 2024ના T20 વર્લ્ડકપની યજમાની વેસ્ટ ઇન્ડીઝ અને અમેરિકા પાસે છે, જેમાં કુલ 20 ટીમ ભાગ લેશે. આ ટૂર્નામેન્ટ કુલ નોકઆઉટ સહિત ત્રણ સ્ટેજમાં રમાશે. દરેક ટીમને ચાર ગ્રૂપમાં વહેંચવામાં આવશે.
દરેક ગ્રૂપની બે ટોચની ટીમ સુપર-8 રાઉન્ડમાં એન્ટ્રી કરશે. ત્યાર બાદ સુપર-8 રાઉન્ડની બધી આઠ ટીમને ચાર-ચારના ગ્રૂપમાં વહેંચવામાં આવશે. સુપર-8 સ્ટેજમાં બંને ગ્રૂપની બધી ટીમ એકબીજા સામે રમશે અને તેમાંની બે-બે ટોચની ટીમ સેમિફાઇનલમાં એન્ટ્રી કરશે.
2022માં રમી હતી 16 ટીમ
બે સેમિફાઇનલ મુકાબલા દ્વારા ચાર ટીમમાંથી બે ટીમ ફાઇનલમાં પહોંચશે. એટલે કે આગામી T20 વિશ્વકપ ઘણી અલગ રીતે રમાવાનો છે અને તેમાં ક્વોલિફાઇંગ રાઉન્ડ નહીં રમાય કે ના તો સુપર-12નું સ્ટેજ હશે. ઉલ્લેખનીય છે કે T20 વિશ્વકપ, 2022માં 16 ટીમ રમી હતી. જેમાંની આઠ ટીમને સીધા સુપર-12માં સ્થાન મળ્યું હતું અને ચાર ટીમ ક્વોલિફાઇંગ રાઉન્ડ દ્વારા સુપર-12માં પહોંચી હતી.
આઠ ટીમને 2024ના વર્લ્ડકપમાં સીધી એન્ટ્રી
T20 વર્લ્ડકપ 2024 માટે યજમાન અમેરિકા અને વેસ્ટ ઇન્ડીઝની ટીમે પહેલાથી જ ક્વોલિફાય કરી લીધું છે. આ ઉપરાંત T-20 વિશ્વકપ, 2022ની ટોચની આઠ ટીમને 2024ના વર્લ્ડકપમાં સીધી એન્ટ્રી મળી ચૂકી છે.
આ ટીમમાં ઈંગ્લેન્ડ, ભારત, પાકિસ્તાન, ન્યૂઝીલેન્ડ, શ્રીલંકા, ઓસ્ટ્રેલિયા, સાઉથ આફ્રિકા અને નેધરલેન્ડ્સનો સમાવેશ થાય છે. આ ઉપરાંત આઇસીસી રેન્કિંગમાં ટોપ-10 ટીમમાં સામેલ રહેલી અફઘાનિસ્તાન અને બાંગ્લાદેશને પણ આગામી T-20 વર્લ્ડકપ માટે એન્ટ્રી મળી ગઈ છે. બાકીની આઠ ટીમ વચ્ચે ક્વોલિફાઇંગ મુકાબલા રમાશે.